૧૧. જતુકણ્ણિમાણવપુચ્છા

૧૨૧. ‘‘સુત્વાનહં વીરમકામકામિં, [ઇચ્ચાયસ્મા જતુકણ્ણિ]

ઓઘાતિગં પુટ્ઠુમકામમાગમં;

સન્તિપદં બ્રૂહિ સહજનેત્ત, યથાતચ્છં ભગવા બ્રૂહિ મેતં.

૧૨૨. ‘‘ભગવા હિ કામે અભિભુય્ય ઇરિયતિ, આદિચ્ચોવ પથવિં તેજી તેજસા;

પરિત્તપઞ્ઞસ્સ મે ભૂરિપઞ્ઞ, આચિક્ખ ધમ્મં યમહં વિજઞ્ઞં;

જાતિજરાય ઇધ વિપ્પહાનં’’.

૧૨૩. ‘‘કામેસુ વિનય ગેધં, [જતુકણ્ણીતિ ભગવા]

નેક્ખમ્મં દટ્ઠુ ખેમતો;

ઉગ્ગહિતં નિરત્તં વા, મા તે વિજ્જિત્થ કિઞ્ચનં.

૧૨૪. ‘‘યં પુબ્બે તં વિસોસેહિ, પચ્છા તે માહુ કિઞ્ચનં;

મજ્ઝે ચે નો ગહેસ્સસિ, ઉપસન્તો ચરિસ્સસિ.

૧૨૫. ‘‘સબ્બસો નામરૂપસ્મિં, વીતગેધસ્સ બ્રાહ્મણ;

આસવાસ્સ ન વિજ્જન્તિ, યેહિ મચ્ચુવસં વજે’’તિ.

જતુકણ્ણિમાણવપુચ્છા એકાદસમા.