૮. નિધિકણ્ડસુત્તં

૧. નિધિં નિધેતિ પુરિસો, ગમ્ભીરે ઓદકન્તિકે;

અત્થે કિચ્ચે સમુપ્પન્ને, અત્થાય મે ભવિસ્સતિ.

૨. રાજતો વા દુરુત્તસ્સ, ચોરતો પીળિતસ્સ વા;

ઇણસ્સ વા પમોક્ખાય, દુબ્ભિક્ખે આપદાસુ વા;

એતદત્થાય લોકસ્મિં, નિધિ નામ નિધીયતિ.

૩. તાવસ્સુનિહિતો [તાવ સુનિહિતો (સી.)] સન્તો, ગમ્ભીરે ઓદકન્તિકે;

ન સબ્બો સબ્બદા એવ, તસ્સ તં ઉપકપ્પતિ.

૪. નિધિ વા ઠાના ચવતિ, સઞ્ઞા વાસ્સ વિમુય્હતિ;

નાગા વા અપનામેન્તિ, યક્ખા વાપિ હરન્તિ નં.

૫. અપ્પિયા વાપિ દાયાદા, ઉદ્ધરન્તિ અપસ્સતો;

યદા પુઞ્ઞક્ખયો હોતિ, સબ્બમેતં વિનસ્સતિ.

૬. યસ્સ દાનેન સીલેન, સંયમેન દમેન ચ;

નિધી સુનિહિતો હોતિ, ઇત્થિયા પુરિસસ્સ વા.

૭. ચેતિયમ્હિ ચ સઙ્ઘે વા, પુગ્ગલે અતિથીસુ વા;

માતરિ પિતરિ ચાપિ [વાપિ (સ્યા. કં.)], અથો જેટ્ઠમ્હિ ભાતરિ.

૮. એસો નિધિ સુનિહિતો, અજેય્યો અનુગામિકો;

પહાય ગમનીયેસુ, એતં આદાય ગચ્છતિ.

૯. અસાધારણમઞ્ઞેસં, અચોરાહરણો નિધિ;

કયિરાથ ધીરો પુઞ્ઞાનિ, યો નિધિ અનુગામિકો.

૧૦. એસ દેવમનુસ્સાનં, સબ્બકામદદો નિધિ;

યં યદેવાભિપત્થેન્તિ, સબ્બમેતેન લબ્ભતિ.

૧૧. સુવણ્ણતા સુસરતા, સુસણ્ઠાના સુરૂપતા [સુસણ્ઠાનસુરૂપતા (સી.), સુસણ્ઠાનં સુરૂપતા (સ્યા. કં.)];

આધિપચ્ચપરિવારો, સબ્બમેતેન લબ્ભતિ.

૧૨. પદેસરજ્જં ઇસ્સરિયં, ચક્કવત્તિસુખં પિયં;

દેવરજ્જમ્પિ દિબ્બેસુ, સબ્બમેતેન લબ્ભતિ.

૧૩. માનુસ્સિકા ચ સમ્પત્તિ, દેવલોકે ચ યા રતિ;

યા ચ નિબ્બાનસમ્પત્તિ, સબ્બમેતેન લબ્ભતિ.

૧૪. મિત્તસમ્પદમાગમ્મ, યોનિસોવ [યોનિસો વે (સી.), યોનિસો ચે (સ્યા.), યોનિસો ચ (?)] પયુઞ્જતો;

વિજ્જા વિમુત્તિ વસીભાવો, સબ્બમેતેન લબ્ભતિ.

૧૫. પટિસમ્ભિદા વિમોક્ખા ચ, યા ચ સાવકપારમી;

પચ્ચેકબોધિ બુદ્ધભૂમિ, સબ્બમેતેન લબ્ભતિ.

૧૬. એવં મહત્થિકા એસા, યદિદં પુઞ્ઞસમ્પદા;

તસ્મા ધીરા પસંસન્તિ, પણ્ડિતા કતપુઞ્ઞતન્તિ.

નિધિકણ્ડસુત્તં નિટ્ઠિતં.