૪૩૮. દદ્દરજાતકં (૧૨)

૧૦૫. યો તે પુત્તકે અખાદિ, દિન્નભત્તો અદૂસકે;

તસ્મિં દાઠં નિપાતેહિ, મા તે મુચ્ચિત્થ જીવતો.

૧૦૬. આકિણ્ણલુદ્દો પુરિસો, ધાતિચેલંવ મક્ખિતો;

પદેસં તં ન પસ્સામિ, યત્થ દાઠં નિપાતયે.

૧૦૭. અકતઞ્ઞુસ્સ પોસસ્સ, નિચ્ચં વિવરદસ્સિનો;

સબ્બં ચે પથવિં દજ્જા, નેવ નં અભિરાધયે.

૧૦૮. કિન્નુ સુબાહુ તરમાનરૂપો, પચ્ચાગતોસિ સહ માણવેન;

કિં કિચ્ચમત્થં ઇધમત્થિ તુય્હં, અક્ખાહિ મે પુચ્છિતો એતમત્થં.

૧૦૯. યો તે સખા દદ્દરો સાધુરૂપો, તસ્સ વધં પરિસઙ્કામિ અજ્જ;

પુરિસસ્સ કમ્માયતનાનિ સુત્વા, નાહં સુખિં દદ્દરં અજ્જ મઞ્ઞે.

૧૧૦. કાનિસ્સ કમ્માયતનાનિ અસ્સુ, પુરિસસ્સ વુત્તિસમોધાનતાય;

કં વા પટિઞ્ઞં પુરિસસ્સ સુત્વા, પરિસઙ્કસિ દદ્દરં માણવેન.

૧૧૧. ચિણ્ણા કલિઙ્ગા ચરિતા વણિજ્જા, વેત્તાચરો સઙ્કુપથોપિ ચિણ્ણો;

નટેહિ ચિણ્ણં સહ વાકુરેહિ [વાકરેહિ (પી. સી. નિય્ય), વાગુરેહિ (?)], દણ્ડેન યુદ્ધમ્પિ સમજ્જમજ્ઝે.

૧૧૨. બદ્ધા કુલીકા [કુલિઙ્કા (સી. પી.)] મિતમાળ્હકેન, અક્ખા જિતા [અક્ખાચિતા (સી. અટ્ઠ.)] સંયમો અબ્ભતીતો;

અબ્બાહિતં [અપ્પહિતં (સી. સ્યા.), અબ્બૂહિતં (પી. સી. નિય્ય)] પુબ્બકં [પુપ્ફકં (સી. સ્યા.)] અડ્ઢરત્તં, હત્થા દડ્ઢા પિણ્ડપટિગ્ગહેન.

૧૧૩. તાનિસ્સ કમ્માયતનાનિ અસ્સુ, પુરિસસ્સ વુત્તિસમોધાનતાય;

યથા અયં દિસ્સતિ લોમપિણ્ડો, ગાવો હતા કિં પન દદ્દરસ્સાતિ.

દદ્દરજાતકં દ્વાદસમં.

નવકનિપાતં નિટ્ઠિતં.