૪૩૫. હલિદ્દિરાગજાતકં (૯)

૭૮. સુતિતિક્ખં અરઞ્ઞમ્હિ, પન્તમ્હિ સયનાસને;

યે ચ ગામે તિતિક્ખન્તિ, તે ઉળારતરા તયા.

૭૯. અરઞ્ઞા ગામમાગમ્મ, કિંસીલં કિંવતં અહં;

પુરિસં તાત સેવેય્યં, તં મે અક્ખાહિ પુચ્છિતો.

૮૦. યો તે [યો તં (સ્યા. જા. ૧.૪.૧૯૦ અરઞ્ઞજાતકેપિ)] વિસ્સાસયે તાત, વિસ્સાસઞ્ચ ખમેય્ય તે;

સુસ્સૂસી ચ તિતિક્ખી ચ, તં ભજેહિ ઇતો ગતો.

૮૧. યસ્સ કાયેન વાચાય, મનસા નત્થિ દુક્કટં;

ઉરસીવ પતિટ્ઠાય, તં ભજેહિ ઇતો ગતો.

૮૨. યો ચ ધમ્મેન ચરતિ, ચરન્તોપિ ન મઞ્ઞતિ;

વિસુદ્ધકારિં સપ્પઞ્ઞં, તં ભજેહિ ઇતો ગતો.

૮૩. હલિદ્દિરાગં કપિચિત્તં, પુરિસં રાગવિરાગિનં;

તાદિસં તાત મા સેવિ, નિમ્મનુસ્સમ્પિ ચે સિયા.

૮૪. આસીવિસંવ કુપિતં, મીળ્હલિત્તં મહાપથં;

આરકા પરિવજ્જેહિ, યાનીવ વિસમં પથં.

૮૫. અનત્થા તાત વડ્ઢન્તિ, બાલં અચ્ચુપસેવતો;

માસ્સુ બાલેન સંગચ્છિ, અમિત્તેનેવ સબ્બદા.

૮૬. તં તાહં તાત યાચામિ, કરસ્સુ વચનં મમ;

માસ્સુ બાલેન સંગચ્છિ [સંગઞ્છિ (સી. પી.)], દુક્ખો બાલેહિ સઙ્ગમોતિ.

હલિદ્દિરાગજાતકં નવમં.