૪૩૬. સમુગ્ગજાતકં (૧૦)

૮૭. કુતો નુ આગચ્છથ ભો તયો જના, સ્વાગતા એથ [સ્વાગતં એત્થ (સી. પી.)] નિસીદથાસને;

કચ્ચિત્થ ભોન્તો કુસલં અનામયં, ચિરસ્સમબ્ભાગમનં હિ વો ઇધ.

૮૮. અહમેવ એકો ઇધ મજ્જ પત્તો, ન ચાપિ મે દુતિયો કોચિ વિજ્જતિ;

કિમેવ સન્ધાય તે ભાસિતં ઇસે, ‘‘કુતો નુ આગચ્છથ ભો તયો જના’’.

૮૯. તુવઞ્ચ એકો ભરિયા ચ તે પિયા, સમુગ્ગપક્ખિત્તનિકિણ્ણમન્તરે;

સા રક્ખિતા કુચ્છિગતાવ [કુચ્છિગતા ચ (ક.)] તે સદા, વાયુસ્સ [હરિસ્સ (ક.)] પુત્તેન સહા તહિં રતા.

૯૦. સંવિગ્ગરૂપો ઇસિના વિયાકતો [પબ્યાકતો (ક.), બ્યાકતો (સ્યા. પી.)], સો દાનવો તત્થ સમુગ્ગમુગ્ગિલિ;

અદ્દક્ખિ ભરિયં સુચિ માલધારિનિં, વાયુસ્સ પુત્તેન સહા તહિં રતં.

૯૧. સુદિટ્ઠરૂપમુગ્ગતપાનુવત્તિના [સુદિટ્ઠરૂપુગ્ગતપાનુવત્તિના (સી. સ્યા. પી.)], હીના નરા યે પમદાવસં ગતા;

યથા હવે પાણરિવેત્થ રક્ખિતા, દુટ્ઠા મયી અઞ્ઞમભિપ્પમોદયિ.

૯૨. દિવા ચ રત્તો ચ મયા ઉપટ્ઠિતા, તપસ્સિના જોતિરિવા વને વસં;

સા ધમ્મમુક્કમ્મ અધમ્મમાચરિ, અકિરિયરૂપો પમદાહિ સન્થવો.

૯૩. સરીરમજ્ઝમ્હિ ઠિતાતિમઞ્ઞહં, મય્હં અયન્તિ અસતિં અસઞ્ઞતં;

સા ધમ્મમુક્કમ્મ અધમ્મમાચરિ, અકિરિયરૂપો પમદાહિ સન્થવો.

૯૪. સુરક્ખિતં મેતિ કથં નુ વિસ્સસે, અનેકચિત્તાસુ ન હત્થિ [અનેકચિત્તા પુન હેત્થ (ક.)] રક્ખણા;

એતા હિ પાતાલપપાતસન્નિભા, એત્થપ્પમત્તો બ્યસનં નિગચ્છતિ.

૯૫. તસ્મા હિ તે સુખિનો વીતસોકા, યે માતુગામેહિ ચરન્તિ નિસ્સટા;

એતં સિવં ઉત્તમમાભિપત્થયં, ન માતુગામેહિ કરેય્ય સન્થવન્તિ.

સમુગ્ગજાતકં દસમં.