૪૩૪. ચક્કવાકજાતકં (૮)

૬૯. કાસાયવત્થે સકુણે વદામિ, દુવે દુવે નન્દમને [નન્દિમને (સી. પી.)] ચરન્તે;

કં અણ્ડજં અણ્ડજા માનુસેસુ, જાતિં પસંસન્તિ તદિઙ્ઘ બ્રૂથ.

૭૦. અમ્હે મનુસ્સેસુ મનુસ્સહિંસ, અનુબ્બતે [અનુપુબ્બકે (ક.)] ચક્કવાકે વદન્તિ;

કલ્યાણભાવમ્હે [ભાવ’મ્હ (સી. પી.)] દિજેસુ સમ્મતા, અભિરૂપા [અભીતરૂપા (સી. સ્યા. પી.)] વિચરામ અણ્ણવે. ( ) [(ન ઘાસહેતૂપિ કરોમ પાપં) (ક.)]

૭૧. કિં અણ્ણવે કાનિ ફલાનિ ભુઞ્જે, મંસં કુતો ખાદથ ચક્કવાકા;

કિં ભોજનં ભુઞ્જથ વો અનોમા [અભિણ્હં (ક.)], બલઞ્ચ વણ્ણો ચ અનપ્પરૂપા [અનપ્પરૂપો (સી. સ્યા. પી.)].

૭૨. ન અણ્ણવે સન્તિ ફલાનિ ધઙ્ક, મંસં કુતો ખાદિતું ચક્કવાકે;

સેવાલભક્ખમ્હ [ભક્ખિમ્હ (ક.)] અપાણભોજના [અવાકભોજના (સી. પી.)], ન ઘાસહેતૂપિ કરોમ પાપં.

૭૩. ન મે ઇદં રુચ્ચતિ ચક્કવાક, અસ્મિં ભવે ભોજનસન્નિકાસો;

અહોસિ પુબ્બે તતો મે અઞ્ઞથા, ઇચ્ચેવ મે વિમતિ એત્થ જાતા.

૭૪. અહમ્પિ મંસાનિ ફલાનિ ભુઞ્જે, અન્નાનિ ચ લોણિયતેલિયાનિ;

રસં મનુસ્સેસુ લભામિ ભોત્તું, સૂરોવ સઙ્ગામમુખં વિજેત્વા;

ન ચ મે તાદિસો વણ્ણો, ચક્કવાક યથા તવ.

૭૫. અસુદ્ધભક્ખોસિ ખણાનુપાતી, કિચ્છેન તે લબ્ભતિ અન્નપાનં;

ન તુસ્સસી રુક્ખફલેહિ ધઙ્ક, મંસાનિ વા યાનિ સુસાનમજ્ઝે.

૭૬. યો સાહસેન અધિગમ્મ ભોગે, પરિભુઞ્જતિ ધઙ્ક ખણાનુપાતી;

તતો ઉપક્કોસતિ નં સભાવો, ઉપક્કુટ્ઠો વણ્ણબલં જહાતિ.

૭૭. અપ્પમ્પિ ચે નિબ્બુતિં ભુઞ્જતી યદિ, અસાહસેન અપરૂપઘાતી [અસાહસેનાનુપઘાતિનો (ક.)];

બલઞ્ચ વણ્ણો ચ તદસ્સ હોતિ, ન હિ સબ્બો આહારમયેન વણ્ણોતિ.

ચક્કવાકજાતકં અટ્ઠમં.