૪૩૩. લોમસકસ્સપજાતકં (૭)

૬૦. અસ્સ ઇન્દસમો રાજ, અચ્ચન્તં અજરામરો;

સચે ત્વં યઞ્ઞં યાજેય્ય, ઇસિં લોમસકસ્સપં.

૬૧. સસમુદ્દપરિયાયં, મહિં સાગરકુણ્ડલં;

ન ઇચ્છે સહ નિન્દાય, એવં સેય્ય [સય્હ (સી. સ્યા. પી.)] વિજાનહિ.

૬૨. ધિરત્થુ તં યસલાભં, ધનલાભઞ્ચ બ્રાહ્મણ;

યા વુત્તિ વિનિપાતેન, અધમ્મચરણેન વા.

૬૩. અપિ ચે પત્તમાદાય, અનગારો પરિબ્બજે;

સાયેવ જીવિકા સેય્યો, યા ચાધમ્મેન એસના.

૬૪. અપિ ચે પત્તમાદાય, અનગારો પરિબ્બજે;

અઞ્ઞં અહિંસયં લોકે, અપિ રજ્જેન તં વરં.

૬૫. બલં ચન્દો બલં સુરિયો, બલં સમણબ્રાહ્મણા;

બલં વેલા સમુદ્દસ્સ, બલાતિબલમિત્થિયો.

૬૬. યથા ઉગ્ગતપં સન્તં, ઇસિં લોમસકસ્સપં;

પિતુ અત્થા ચન્દવતી, વાજપેય્યં [વાચપેય્યં (પી. ક.)] અયાજયિ.

૬૭. તં લોભપકતં કમ્મં, કટુકં કામહેતુકં;

તસ્સ મૂલં ગવેસિસ્સં, છેચ્છં રાગં સબન્ધનં.

૬૮. ધિરત્થુ કામે સુબહૂપિ લોકે, તપોવ સેય્યો કામગુણેહિ રાજ;

તપો કરિસ્સામિ પહાય કામે, તવેવ રટ્ઠં ચન્દવતી ચ હોતૂતિ.

લોમસકસ્સપજાતકં સત્તમં.