૪૩૨. પદકુસલમાણવજાતકં (૬)

૪૯. બહુસ્સુતં ચિત્તકથિં [ચિત્તકથં (સ્યા. ક.)], ગઙ્ગા વહતિ પાટલિં [પાટલં (સી. પી.)];

વુય્હમાનક ભદ્દન્તે, એકં મે દેહિ ગાથકં [ગીતકં (ક. અટ્ઠ.)].

૫૦. યેન સિઞ્ચન્તિ દુક્ખિતં, યેન સિઞ્ચન્તિ આતુરં;

તસ્સ મજ્ઝે મરિસ્સામિ, જાતં સરણતો ભયં.

૫૧. યત્થ બીજાનિ રૂહન્તિ, સત્તા યત્થ પતિટ્ઠિતા;

સા મે સીસં નિપીળેતિ, જાતં સરણતો ભયં.

૫૨. યેન ભત્તાનિ પચ્ચન્તિ, સીતં યેન વિહઞ્ઞતિ;

સો મં ડહતિ [દય્હતિ (ક.)] ગત્તાનિ, જાતં સરણતો ભયં.

૫૩. યેન ભુત્તેન [ભત્તેન (સ્યા. ક.)] યાપેન્તિ, પુથૂ બ્રાહ્મણખત્તિયા;

સો મં ભુત્તો બ્યાપાદેતિ, જાતં સરણતો ભયં.

૫૪. ગિમ્હાનં પચ્છિમે માસે, વાતમિચ્છન્તિ પણ્ડિતા;

સો મં [સો મે (સી. પી.)] ભઞ્જતિ ગત્તાનિ, જાતં સરણતો ભયં.

૫૫. યં નિસ્સિતા જગતિરુહં, સ્વાયં અગ્ગિં પમુઞ્ચતિ;

દિસા ભજથ વક્કઙ્ગા, જાતં સરણતો ભયં.

૫૬. યમાનયિં સોમનસ્સં, માલિનિં ચન્દનુસ્સદં;

સા મં ઘરા નિચ્છુભતિ [નીહરતિ (સી. સ્યા.)], જાતં સરણતો ભયં.

૫૭. યેન જાતેન નન્દિસ્સં, યસ્સ ચ ભવમિચ્છિસં;

સો મં ઘરા નિચ્છુભતિ [નીહરતિ (સી. સ્યા.)], જાતં સરણતો ભયં.

૫૮. સુણન્તુ મે જાનપદા, નેગમા ચ સમાગતા;

યતોદકં તદાદિત્તં, યતો ખેમં તતો ભયં.

૫૯. રાજા વિલુમ્પતે રટ્ઠં, બ્રાહ્મણો ચ પુરોહિતો;

અત્તગુત્તા વિહરથ, જાતં સરણતો ભયન્તિ.

પદકુસલમાણવજાતકં છટ્ઠં.