૪૩૧. હરિતચજાતકં (૫)

૪૦. સુતં મેતં મહાબ્રહ્મે, કામે ભુઞ્જતિ હારિતો;

કચ્ચેતં વચનં તુચ્છં, કચ્ચિ સુદ્ધો ઇરિય્યસિ.

૪૧. એવમેતં મહારાજ, યથા તે વચનં સુતં;

કુમ્મગ્ગં પટિપન્નોસ્મિ, મોહનેય્યેસુ મુચ્છિતો.

૪૨. અદુ [આદુ (સી. પી.)] પઞ્ઞા કિમત્થિયા, નિપુણા સાધુચિન્તિની [ચિન્તની (સી. પી.)];

યાય ઉપ્પતિતં રાગં, કિં મનો ન વિનોદયે.

૪૩. ચત્તારોમે મહારાજ, લોકે અતિબલા ભુસા;

રાગો દોસો મદો મોહો, યત્થ પઞ્ઞા ન ગાધતિ.

૪૪. અરહા સીલસમ્પન્નો, સુદ્ધો ચરતિ હારિતો;

મેધાવી પણ્ડિતો ચેવ, ઇતિ નો સમ્મતો ભવં.

૪૫. મેધાવીનમ્પિ હિંસન્તિ, ઇસિં ધમ્મગુણે રતં;

વિતક્કા પાપકા રાજ, સુભા રાગૂપસંહિતા.

૪૬. ઉપ્પન્નાયં સરીરજો, રાગો વણ્ણવિદૂસનો તવ;

તં પજહ ભદ્દમત્થુ તે, બહુન્નાસિ મેધાવિસમ્મતો.

૪૭. તે અન્ધકારકે [કરણે (સી. સ્યા. પી.)] કામે, બહુદુક્ખે મહાવિસે;

તેસં મૂલં ગવેસિસ્સં, છેચ્છં રાગં સબન્ધનં.

૪૮. ઇદં વત્વાન હારિતો, ઇસિ સચ્ચપરક્કમો;

કામરાગં વિરાજેત્વા, બ્રહ્મલોકૂપગો અહૂતિ.

હરિતચજાતકં [હારિતજાતકં (સી. પી.)] પઞ્ચમં.