૪૩૦. ચૂળસુવજાતકં (૪)

૩૦. સન્તિ રુક્ખા હરિપત્તા [હરિતપત્તા (સી. સ્યા. પી.)], દુમા નેકફલા બહૂ;

કસ્મા નુ સુક્ખે [સુક્ખ (ક.)] કોળાપે, સુવસ્સ નિરતો મનો.

૩૧. ફલસ્સ ઉપભુઞ્જિમ્હા, નેકવસ્સગણે બહૂ;

અફલમ્પિ વિદિત્વાન, સાવ મેત્તિ યથા પુરે.

૩૨. સુખઞ્ચ રુક્ખં કોળાપં, ઓપત્તમફલં દુમં;

ઓહાય સકુણા યન્તિ, કિં દોસં પસ્સસે દિજ.

૩૩. યે ફલત્થા સમ્ભજન્તિ, અફલોતિ જહન્તિ નં;

અત્તત્થપઞ્ઞા દુમ્મેધા, તે હોન્તિ પક્ખપાતિનો.

૩૪. સાધુ સક્ખિ કતં હોતિ, મેત્તિ સંસતિ સન્થવો;

સચેતં ધમ્મં રોચેસિ, પાસંસોસિ વિજાનતં.

૩૫. સો તે સુવ વરં દમ્મિ, પત્તયાન વિહઙ્ગમ;

વરં વરસ્સુ વક્કઙ્ગ, યં કિઞ્ચિ મનસિચ્છસિ.

૩૬. અપિ નામ નં પસ્સેય્યં [અપિ નામ નં પુન પસ્સે (સી. સ્યા.)], સપત્તં સફલં દુમં;

દલિદ્દોવ નિધિ લદ્ધા, નન્દેય્યાહં પુનપ્પુનં.

૩૭. તતો અમતમાદાય, અભિસિઞ્ચિ મહીરુહં;

તસ્સ સાખા વિરૂહિંસુ [વિરૂળ્હસ્સ (ક.)], સીતચ્છાયા મનોરમા.

૩૮. એવં સક્ક સુખી હોહિ, સહ સબ્બેહિ ઞાતિભિ;

યથાહમજ્જ સુખિતો, દિસ્વાન સફલં દુમં.

૩૯. સુવસ્સ ચ વરં દત્વા, કત્વાન સફલં દુમં;

પક્કામિ સહ ભરિયાય, દેવાનં નન્દનં વનન્તિ.

ચૂળસુવજાતકં ચતુત્થં.