૪૨૯. મહાસુવજાતકં (૩)

૨૦. દુમો યદા હોતિ ફલૂપપન્નો, ભુઞ્જન્તિ નં વિહઙ્ગમા [વિહગા (સી. પી.)] સમ્પતન્તા;

ખીણન્તિ ઞત્વાન દુમં ફલચ્ચયે [ઞત્વા દુમપ્ફલચ્ચયેન (ક.)], દિસોદિસં યન્તિ તતો વિહઙ્ગમા.

૨૧. ચર ચારિકં લોહિતતુણ્ડ મામરિ, કિં ત્વં સુવ સુક્ખદુમમ્હિ ઝાયસિ;

તદિઙ્ઘ મં બ્રૂહિ વસન્તસન્નિભ, કસ્મા સુવ સુક્ખદુમં ન રિઞ્ચસિ.

૨૨. યે વે સખીનં સખારો ભવન્તિ, પાણચ્ચયે [પાણં ચજે (ક.), પાણચ્ચયે મરણકાલે ચ સુખદુક્ખેસુ ચ ન જહન્તીતિ સમ્બન્ધો] દુક્ખસુખેસુ હંસ;

ખીણં અખીણન્તિ ન તં જહન્તિ, સન્તો સતં ધમ્મમનુસ્સરન્તા.

૨૩. સોહં સતં અઞ્ઞતરોસ્મિ હંસ, ઞાતી ચ મે હોતિ સખા ચ રુક્ખો;

તં નુસ્સહે જીવિકત્થો પહાતું, ખીણન્તિ ઞત્વાન ન હેસ ધમ્મો [ન સોસ (ક.), ન એસ (સ્યા.)].

૨૪. સાધુ સક્ખિ કતં હોતિ, મેત્તિ સંસતિ સન્થવો [મિત્તં સઙ્ગતિ સન્ધવો (ક.)];

સચેતં ધમ્મં રોચેસિ, પાસંસોસિ વિજાનતં.

૨૫. સો તે સુવ વરં દમ્મિ, પત્તયાન વિહઙ્ગમ;

વરં વરસ્સુ વક્કઙ્ગ, યં કિઞ્ચિ મનસિચ્છસિ.

૨૬. વરઞ્ચ મે હંસ ભવં દદેય્ય, અયઞ્ચ રુક્ખો પુનરાયું લભેથ;

સો સાખવા ફલિમા સંવિરૂળ્હો, મધુત્થિકો તિટ્ઠતુ સોભમાનો.

૨૭. તં પસ્સ સમ્મ ફલિમં ઉળારં, સહાવ તે હોતુ ઉદુમ્બરેન;

સો સાખવા ફલિમા સંવિરૂળ્હો, મધુત્થિકો તિટ્ઠતુ સોભમાનો.

૨૮. એવં સક્ક સુખી હોહિ, સહ સબ્બેહિ ઞાતિભિ;

યથાહમજ્જ સુખિતો, દિસ્વાન સફલં દુમં.

૨૯. સુવસ્સ ચ વરં દત્વા, કત્વાન સફલં દુમં;

પક્કામિ સહ ભરિયાય, દેવાનં નન્દનં વનન્તિ.

મહાસુવજાતકં તતિયં.