૪૦૨. સત્તુભસ્તજાતકં (૭-૧-૭)

૪૬. વિબ્ભન્તચિત્તો કુપિતિન્દ્રિયોસિ, નેત્તેહિ તે વારિગણા સવન્તિ;

કિં તે નટ્ઠં કિં પન પત્થયાનો, ઇધાગમા બ્રહ્મે તદિઙ્ઘ [બ્રાહ્મણ ઇઙ્ઘ (સી. સ્યા.)] બ્રૂહિ.

૪૭. મિય્યેથ ભરિયા વજતો મમજ્જ, અગચ્છતો મરણમાહ યક્ખો;

એતેન દુક્ખેન પવેધિતોસ્મિ, અક્ખાહિ મે સેનક એતમત્થં.

૪૮. બહૂનિ ઠાનાનિ વિચિન્તયિત્વા, યમેત્થ વક્ખામિ તદેવ સચ્ચં;

મઞ્ઞામિ તે બ્રાહ્મણ સત્તુભસ્તં, અજાનતો કણ્હસપ્પો પવિટ્ઠો.

૪૯. આદાય દણ્ડં પરિસુમ્ભ ભસ્તં, પસ્સેળમૂગં ઉરગં દુજિવ્હં [દિજિવ્હં (સી. પી.)];

છિન્દજ્જ કઙ્ખં વિચિકિચ્છિતાનિ, ભુજઙ્ગમં પસ્સ પમુઞ્ચ ભસ્તં.

૫૦. સંવિગ્ગરૂપો પરિસાય મજ્ઝે, સો બ્રાહ્મણો સત્તુભસ્તં પમુઞ્ચિ;

અથ નિક્ખમિ ઉરગો ઉગ્ગતેજો, આસીવિસો સપ્પો ફણં કરિત્વા.

૫૧. સુલદ્ધલાભા જનકસ્સ રઞ્ઞો, યો પસ્સતી સેનકં સાધુપઞ્ઞં;

વિવટ્ટછદ્દો [વિવત્તચ્છદ્દો (સી.), વિવટ્ટચ્છદો (સ્યા.), વિવટ્ટચ્છદ્દા (પી.)] નુસિ સબ્બદસ્સી, ઞાણં નુ તે બ્રાહ્મણ ભિંસરૂપં.

૫૨. ઇમાનિ મે સત્તસતાનિ અત્થિ, ગણ્હાહિ સબ્બાનિ દદામિ તુય્હં;

તયા હિ મે જીવિતમજ્જ લદ્ધં, અથોપિ ભરિયાય મકાસિ સોત્થિં.

૫૩. ન પણ્ડિતા વેતનમાદિયન્તિ, ચિત્રાહિ ગાથાહિ સુભાસિતાહિ;

ઇતોપિ તે બ્રહ્મે દદન્તુ વિત્તં, આદાય ત્વં ગચ્છ સકં નિકેતન્તિ.

સત્તુભસ્તજાતકં [સેનકજાતકં (સ્યા.)] સત્તમં.