૩૯૬. કુક્કુજાતકં (૭-૧-૧)

૧. દિયડ્ઢકુક્કૂ ઉદયેન કણ્ણિકા, વિદત્થિયો અટ્ઠ પરિક્ખિપન્તિ નં;

સા સિંસપા [સસિંસપા (સી. પી.), સા સીસપા (સ્યા.), યા સિંસપા (ક. સી. નિય્ય)] સારમયા અફેગ્ગુકા, કુહિં ઠિતા ઉપ્પરિતો [ઉપરિતો (સી. સ્યા. પી.)] ન ધંસતિ.

૨. યા તિંસતિ સારમયા અનુજ્જુકા, પરિકિરિય [પકિરિયા (ક.)] ગોપાણસિયો સમં ઠિતા [સમટ્ઠિતા (સી. સ્યા.)];

તાહિ સુસઙ્ગહિતા બલસા પીળિતા [તા સઙ્ગહિતા બલસા ચ પીળિતા (સી.), તાહિ સુસઙ્ગહિતા બલસા ચ પીળિતા (સ્યા.), તાહિ સઙ્ગહીતા બલસા ચ પીળિતા (પી.)], સમં ઠિતા ઉપ્પરિતો ન ધંસતિ.

૩. એવમ્પિ મિત્તેહિ દળ્હેહિ પણ્ડિતો, અભેજ્જરૂપેહિ સુચીહિ મન્તિભિ;

સુસઙ્ગહીતો સિરિયા ન ધંસતિ, ગોપાણસી ભારવહાવ કણ્ણિકા.

૪. ખરત્તચં બેલ્લં યથાપિ સત્થવા, અનામસન્તોપિ કરોતિ તિત્તકં;

સમાહરં સાદું કરોતિ પત્થિવ, અસાદું કયિરા તનુબન્ધમુદ્ધરં [તનુવટ્ટમુદ્ધરં (સી. પી.)].

૫. એવમ્પિ ગામનિગમેસુ પણ્ડિતો, અસાહસં રાજધનાનિ સઙ્ઘરં;

ધમ્માનુવત્તી પટિપજ્જમાનો, સ ફાતિ કયિરા અવિહેઠયં પરં.

૬. ઓદાતમૂલં સુચિવારિસમ્ભવં, જાતં યથા પોક્ખરણીસુ અમ્બુજં;

પદુમં યથા અગ્ગિનિકાસિફાલિમં, ન કદ્દમો ન રજો ન વારિ લિમ્પતિ.

૭. એવમ્પિ વોહારસુચિં અસાહસં, વિસુદ્ધકમ્મન્તમપેતપાપકં;

ન લિમ્પતિ કમ્મકિલેસ તાદિસો, જાતં યથા પોક્ખરણીસુ અમ્બુજન્તિ.

કુક્કુજાતકં પઠમં.