૩૮૨. સિરિકાળકણ્ણિજાતકં (૬-૧-૭)

૪૦. કા નુ કાળેન વણ્ણેન, ન ચાપિ [ન ચાસિ (સી.)] પિયદસ્સના;

કા વા ત્વં કસ્સ વા ધીતા, કથં જાનેમુ તં મયં.

૪૧. મહારાજસ્સહં ધીતા, વિરૂપક્ખસ્સ ચણ્ડિયા;

અહં કાળી અલક્ખિકા, કાળકણ્ણીતિ મં વિદૂ;

ઓકાસં યાચિતો દેહિ, વસેમુ તવ સન્તિકે.

૪૨. કિંસીલે કિંસમાચારે, પુરિસે નિવિસસે તુવં;

પુટ્ઠા મે કાળિ અક્ખાહિ, કથં [યથા (સી. પી.)] જાનેમુ તં મયં.

૪૩. મક્ખી પળાસી સારમ્ભી, ઇસ્સુકી મચ્છરી સઠો;

સો મય્હં પુરિસો કન્તો, લદ્ધં યસ્સ વિનસ્સતિ.

૪૪. કોધનો ઉપનાહી ચ, પિસુણો ચ વિભેદકો;

કણ્ડકવાચો [અણ્ડકવાચો (ક. સી. પી.)] ફરુસો, સો મે કન્તતરો તતો.

૪૫. અજ્જ સુવેતિ પુરિસો, સદત્થં નાવબુજ્ઝતિ;

ઓવજ્જમાનો કુપ્પતિ, સેય્યં સો અતિમઞ્ઞતિ.

૪૬. દવપ્પલુદ્ધો [દેવપ્પલુદ્ધો (ક.), દવપ્પલદ્ધો (પી.)] પુરિસો, સબ્બમિત્તેહિ ધંસતિ;

સો મય્હં પુરિસો કન્તો, તસ્મિં હોમિ અનામયા.

૪૭. અપેહિ એત્તો ત્વં કાળિ, નેતં અમ્હેસુ વિજ્જતિ;

અઞ્ઞં જનપદં ગચ્છ, નિગમે રાજધાનિયો.

૪૮. અહમ્પિ ખો તં [ચેતં (સી.)] જાનામિ, નેતં તુમ્હેસુ વિજ્જતિ;

સન્તિ લોકે અલક્ખિકા, સઙ્ઘરન્તિ બહું ધનં;

અહં દેવો ચ મે ભાતા, ઉભો નં વિધમામસે.

૪૯. કા નુ દિબ્બેન વણ્ણેન, પથબ્યા સુપતિટ્ઠિતા;

કા વા ત્વં કસ્સ વા ધીતા, કથં જાનેમુ તં મયં.

૫૦. મહારાજસ્સહં ધીતા, ધતરટ્ઠસ્સ સિરીમતો [ધતરટ્ઠસિરીમતો (સ્યા. ક.)];

અહં સિરી ચ લક્ખી ચ, ભૂરિપઞ્ઞાતિ મં વિદૂ;

ઓકાસં યાચિતો દેહિ, વસેમુ તવ સન્તિકે.

૫૧. કિંસીલે કિંસમાચારે, પુરિસે નિવિસસે તુવં;

પુટ્ઠા મે લક્ખિ અક્ખાહિ, કથં [યથા (સી. પી.)] જાનેમુ તં મયં.

૫૨. યો ચાપિ સીતે અથવાપિ ઉણ્હે, વાતાતપે ડંસસરીસપે ચ;

ખુધં [ખુદ્દં (સ્યા. ક.), ખુદં (પી.)] પિપાસં અભિભુય્ય સબ્બં, રત્તિન્તિવં યો સતતં નિયુત્તો;

કાલાગતઞ્ચ ન હાપેતિ અત્થં, સો મે મનાપો નિવિસે ચ તમ્હિ.

૫૩. અક્કોધનો મિત્તવા ચાગવા ચ, સીલૂપપન્નો અસઠોજુભૂતો [અસઠો ઉજ્જુભૂતો (પી.)];

સઙ્ગાહકો સખિલો સણ્હવાચો, મહત્તપત્તોપિ નિવાતવુત્તિ;

તસ્મિંહં [તસ્માહં (સી. પી.)] પોસે વિપુલા ભવામિ, ઊમિ સમુદ્દસ્સ યથાપિ વણ્ણં.

૫૪. યો ચાપિ મિત્તે અથવા અમિત્તે, સેટ્ઠે સરિક્ખે અથ વાપિ હીને;

અત્થં ચરન્તં અથવા અનત્થં, આવી રહો સઙ્ગહમેવ વત્તે [વત્તો (સ્યા. ક.)].

વાચં ન વજ્જા ફરુસં કદાચિ, મતસ્સ જીવસ્સ ચ તસ્સ હોમિ.

૫૫. એતેસં યો અઞ્ઞતરં લભિત્વા, કન્તા સિરી [કન્તસિરિં (કત્થચિ), કન્તં સિરિં (સ્યા.) અટ્ઠકથાયં દુતિયતતિયપાઠન્તરાનિ] મજ્જતિ અપ્પપઞ્ઞો;

તં દિત્તરૂપં વિસમં ચરન્તં, કરીસઠાનંવ [કરીસજાતં વ (સી. સ્યા.)] વિવજ્જયામિ.

૫૬. અત્તના કુરુતે લક્ખિં, અલક્ખિં કુરુતત્તના;

ન હિ લક્ખિં અલક્ખિં વા, અઞ્ઞો અઞ્ઞસ્સ કારકોતિ.

સિરિકાળકણ્ણિજાતકં સત્તમં.