૧. અવારિયવગ્ગો

૩૭૬. અવારિયજાતકં (૬-૧-૧)

૧. માસુ કુજ્ઝ ભૂમિપતિ, માસુ કુજ્ઝ રથેસભ;

કુદ્ધં અપ્પટિકુજ્ઝન્તો, રાજા રટ્ઠસ્સ પૂજિતો.

૨. ગામે વા યદિ વારઞ્ઞે, નિન્ને વા યદિ વા થલે;

સબ્બત્થ અનુસાસામિ, માસુ કુજ્ઝ [માસ્સુ કુજ્ઝિ (સી. પી.)] રથેસભ.

૩. અવારિયપિતા નામ, અહુ ગઙ્ગાય નાવિકો;

પુબ્બે જનં તારેત્વાન, પચ્છા યાચતિ વેતનં;

તેનસ્સ ભણ્ડનં હોતિ, ન ચ ભોગેહિ વડ્ઢતિ.

૪. અતિણ્ણંયેવ યાચસ્સુ, અપારં તાત નાવિક;

અઞ્ઞો હિ તિણ્ણસ્સ મનો, અઞ્ઞો હોતિ પારેસિનો [તરેસિનો (સી. પી.), તિરેસિનો (સ્યા.)].

૫. ગામે વા યદિ વારઞ્ઞે, નિન્ને વા યદિ વા થલે;

સબ્બત્થ અનુસાસામિ, માસુ કુજ્ઝિત્થ નાવિક.

૬. યાયેવાનુસાસનિયા, રાજા ગામવરં અદા;

તાયેવાનુસાસનિયા, નાવિકો પહરી મુખં.

૭. ભત્તં ભિન્નં હતા ભરિયા, ગબ્ભો ચ પતિતો છમા;

મિગોવ જાતરૂપેન, ન તેનત્થં અબન્ધિ સૂતિ [અવડ્ઢિતુન્તિ (સી. સ્યા.), અવડ્ઢિ સૂતિ (?)].

અવારિયજાતકં પઠમં.

૩૭૭. સેતકેતુજાતકં (૬-૧-૨)

૮. મા તાત કુજ્ઝિ ન હિ સાધુ કોધો, બહુમ્પિ તે અદિટ્ઠમસ્સુતઞ્ચ;

માતા પિતા દિસતા [દિસા તાત (સ્યા.), દિસા તા (પી.)] સેતકેતુ, આચરિયમાહુ દિસતં પસત્થા.

૯. અગારિનો અન્નદપાનવત્થદા [અન્નપાનવત્થદા (સ્યા. ક.)], અવ્હાયિકા તમ્પિ દિસં વદન્તિ;

એસા દિસા પરમા સેતકેતુ, યં પત્વા દુક્ખી સુખિનો ભવન્તિ.

૧૦. ખરાજિના જટિલા પઙ્કદન્તા, દુમ્મક્ખરૂપા [દુમુક્ખરૂપા (સી. સ્યા.), દુમ્મુક્ખરૂપા (પી. ક.)] યેમે જપ્પન્તિ મન્તે;

કચ્ચિ નુ તે માનુસકે પયોગે, ઇદં વિદૂ પરિમુત્તા અપાયા.

૧૧. પાપાનિ કમ્માનિ કત્વાન રાજ, બહુસ્સુતો ચે ન [બહુસ્સુતો નેવ (સી. સ્યા.)] ચરેય્ય ધમ્મં;

સહસ્સવેદોપિ ન તં પટિચ્ચ, દુક્ખા પમુઞ્ચે ચરણં અપત્વા.

૧૨. સહસ્સવેદોપિ ન તં પટિચ્ચ, દુક્ખા પમુઞ્ચે ચરણં અપત્વા;

મઞ્ઞામિ વેદા અફલા ભવન્તિ, સસંયમં ચરણમેવ [ચરણઞ્ઞેવ (સી. સ્યા. પી.)] સચ્ચં.

૧૩. ન હેવ વેદા અફલા ભવન્તિ, સસંયમં ચરણમેવ સચ્ચં;

કિત્તિઞ્હિ પપ્પોતિ અધિચ્ચ વેદે, સન્તિં પુણેતિ [સન્તં પુને’તિ (સી. પી.)] ચરણેન દન્તોતિ.

સેતકેતુજાતકં દુતિયં.

૩૭૮. દરીમુખજાતકં (૬-૧-૩)

૧૪. પઙ્કો ચ કામા પલિપો ચ કામા, ભયઞ્ચ મેતં તિમૂલં પવુત્તં;

રજો ચ ધૂમો ચ મયા પકાસિતા, હિત્વા તુવં પબ્બજ બ્રહ્મદત્ત.

૧૫. ગધિતો [ગથિતો (સી.)] ચ રત્તો ચ અધિમુચ્છિતો ચ, કામેસ્વહં બ્રાહ્મણ ભિંસરૂપં;

તં નુસ્સહે જીવિકત્થો પહાતું, કાહામિ પુઞ્ઞાનિ અનપ્પકાનિ.

૧૬. યો અત્થકામસ્સ હિતાનુકમ્પિનો, ઓવજ્જમાનો ન કરોતિ સાસનં;

ઇદમેવ સેય્યો ઇતિ મઞ્ઞમાનો, પુનપ્પુનં ગબ્ભમુપેતિ મન્દો.

૧૭. સો ઘોરરૂપં નિરયં ઉપેતિ, સુભાસુભં મુત્તકરીસપૂરં;

સત્તા સકાયે ન જહન્તિ ગિદ્ધા, યે હોન્તિ કામેસુ અવીતરાગા.

૧૮. મીળ્હેન લિત્તા રુહિરેન મક્ખિતા, સેમ્હેન લિત્તા ઉપનિક્ખમન્તિ;

યં યઞ્હિ કાયેન ફુસન્તિ તાવદે, સબ્બં અસાતં દુખમેવ કેવલં.

૧૯. દિસ્વા વદામિ ન હિ અઞ્ઞતો સવં, પુબ્બેનિવાસં બહુકં સરામિ;

ચિત્રાહિ ગાથાહિ સુભાસિતાહિ, દરીમુખો નિજ્ઝાપયિ સુમેધન્તિ.

દરીમુખજાતકં તતિયં.

૩૭૯. નેરુજાતકં (૬-૧-૪)

૨૦. કાકોલા કાકસઙ્ઘા ચ, મયઞ્ચ પતતં વરા [વર (ક.) મયન્તિપદસ્સ હિ વિસેસનં];

સબ્બેવ સદિસા હોમ, ઇમં આગમ્મ પબ્બતં.

૨૧. ઇધ સીહા ચ બ્યગ્ઘા ચ, સિઙ્ગાલા ચ મિગાધમા;

સબ્બેવ સદિસા હોન્તિ, અયં કો નામ પબ્બતો.

૨૨. ઇમં નેરૂતિ [નેરુન્તિ (સી. સ્યા.)] જાનન્તિ, મનુસ્સા પબ્બતુત્તમં;

ઇધ વણ્ણેન સમ્પન્ના, વસન્તિ સબ્બપાણિનો.

૨૩. અમાનના યત્થ સિયા, સન્તાનં વા વિમાનના;

હીનસમ્માનના વાપિ, ન તત્થ વસતિં વસે [વસતી વસે (સ્યા.), વસ દિવસે (પી.)].

૨૪. યત્થાલસો ચ દક્ખો ચ, સૂરો ભીરુ ચ પૂજિયા;

ન તત્થ સન્તો વસન્તિ, અવિસેસકરે નરે [નગે (સી. સ્યા. પી.)].

૨૫. નાયં નેરુ વિભજતિ, હીનઉક્કટ્ઠમજ્ઝિમે;

અવિસેસકરો નેરુ, હન્દ નેરું જહામસેતિ.

નેરુજાતકં ચતુત્થં.

૩૮૦. આસઙ્કજાતકં (૬-૧-૫)

૨૬. આસાવતી નામ લતા, જાતા ચિત્તલતાવને;

તસ્સા વસ્સસહસ્સેન, એકં નિબ્બત્તતે ફલં.

૨૭. તં દેવા પયિરુપાસન્તિ, તાવ દૂરફલં સતિં;

આસીસેવ [આસિંસેવ (સી. સ્યા. પી.)] તુવં રાજ, આસા ફલવતી સુખા.

૨૮. આસીસતેવ [આસિંસેથેવ (સી. સ્યા. પી.)] સો પક્ખી, આસીસતેવ [આસિંસેથેવ (સી. સ્યા. પી.)] સો દિજો;

તસ્સ ચાસા [તસ્સેવાસા (સ્યા.)] સમિજ્ઝતિ, તાવ દૂરગતા સતી;

આસીસેવ તુવં રાજ, આસા ફલવતી સુખા.

૨૯. સમ્પેસિ ખો મં વાચાય, ન ચ સમ્પેસિ [સંસેસિ (ક.)] કમ્મુના;

માલા સેરેય્યકસ્સેવ, વણ્ણવન્તા અગન્ધિકા.

૩૦. અફલં મધુરં વાચં, યો મિત્તેસુ પકુબ્બતિ;

અદદં અવિસ્સજં ભોગં, સન્ધિ તેનસ્સ જીરતિ.

૩૧. યઞ્હિ કયિરા તઞ્હિ વદે, યં ન કયિરા ન તં વદે;

અકરોન્તં ભાસમાનં, પરિજાનન્તિ પણ્ડિતા.

૩૨. બલઞ્ચ વત મે ખીણં, પાથેય્યઞ્ચ ન વિજ્જતિ;

સઙ્કે પાણૂપરોધાય, હન્દ દાનિ વજામહં.

૩૩. એતદેવ હિ મે નામં, યં નામસ્મિ રથેસભ;

આગમેહિ મહારાજ, પિતરં આમન્તયામહન્તિ.

આસઙ્કજાતકં પઞ્ચમં.

૩૮૧. મિગાલોપજાતકં (૬-૧-૬)

૩૪. ન મે રુચ્ચિ મિગાલોપ, યસ્સ તે તાદિસી ગતી;

અતુચ્ચં તાત પતસિ, અભૂમિં તાત સેવસિ.

૩૫. ચતુક્કણ્ણંવ કેદારં, યદા તે પથવી સિયા;

તતો તાત નિવત્તસ્સુ, માસ્સુ એત્તો પરં ગમિ.

૩૬. સન્તિ અઞ્ઞેપિ સકુણા, પત્તયાના વિહઙ્ગમા;

અક્ખિત્તા વાતવેગેન, નટ્ઠા તે સસ્સતીસમા.

૩૭. અકત્વા અપનન્દસ્સ [અપરણ્ણસ્સ (સી. સ્યા. પી.)], પિતુ વુદ્ધસ્સ સાસનં;

કાલવાતે અતિક્કમ્મ, વેરમ્ભાનં વસં અગા [ગતો (સી.)].

૩૮. તસ્સ પુત્તા ચ દારા ચ, યે ચઞ્ઞે અનુજીવિનો;

સબ્બે બ્યસનમાપાદું, અનોવાદકરે દિજે.

૩૯. એવમ્પિ ઇધ વુદ્ધાનં, યો વાક્યં નાવબુજ્ઝતિ;

અતિસીમચરો [અતિસીમં ચરો (સી. સ્યા. ક.)] દિત્તો, ગિજ્ઝોવાતીતસાસનો;

સબ્બે બ્યસનં પપ્પોન્તિ, અકત્વા બુદ્ધસાસનન્તિ.

મિગાલોપજાતકં છટ્ઠં.

૩૮૨. સિરિકાળકણ્ણિજાતકં (૬-૧-૭)

૪૦. કા નુ કાળેન વણ્ણેન, ન ચાપિ [ન ચાસિ (સી.)] પિયદસ્સના;

કા વા ત્વં કસ્સ વા ધીતા, કથં જાનેમુ તં મયં.

૪૧. મહારાજસ્સહં ધીતા, વિરૂપક્ખસ્સ ચણ્ડિયા;

અહં કાળી અલક્ખિકા, કાળકણ્ણીતિ મં વિદૂ;

ઓકાસં યાચિતો દેહિ, વસેમુ તવ સન્તિકે.

૪૨. કિંસીલે કિંસમાચારે, પુરિસે નિવિસસે તુવં;

પુટ્ઠા મે કાળિ અક્ખાહિ, કથં [યથા (સી. પી.)] જાનેમુ તં મયં.

૪૩. મક્ખી પળાસી સારમ્ભી, ઇસ્સુકી મચ્છરી સઠો;

સો મય્હં પુરિસો કન્તો, લદ્ધં યસ્સ વિનસ્સતિ.

૪૪. કોધનો ઉપનાહી ચ, પિસુણો ચ વિભેદકો;

કણ્ડકવાચો [અણ્ડકવાચો (ક. સી. પી.)] ફરુસો, સો મે કન્તતરો તતો.

૪૫. અજ્જ સુવેતિ પુરિસો, સદત્થં નાવબુજ્ઝતિ;

ઓવજ્જમાનો કુપ્પતિ, સેય્યં સો અતિમઞ્ઞતિ.

૪૬. દવપ્પલુદ્ધો [દેવપ્પલુદ્ધો (ક.), દવપ્પલદ્ધો (પી.)] પુરિસો, સબ્બમિત્તેહિ ધંસતિ;

સો મય્હં પુરિસો કન્તો, તસ્મિં હોમિ અનામયા.

૪૭. અપેહિ એત્તો ત્વં કાળિ, નેતં અમ્હેસુ વિજ્જતિ;

અઞ્ઞં જનપદં ગચ્છ, નિગમે રાજધાનિયો.

૪૮. અહમ્પિ ખો તં [ચેતં (સી.)] જાનામિ, નેતં તુમ્હેસુ વિજ્જતિ;

સન્તિ લોકે અલક્ખિકા, સઙ્ઘરન્તિ બહું ધનં;

અહં દેવો ચ મે ભાતા, ઉભો નં વિધમામસે.

૪૯. કા નુ દિબ્બેન વણ્ણેન, પથબ્યા સુપતિટ્ઠિતા;

કા વા ત્વં કસ્સ વા ધીતા, કથં જાનેમુ તં મયં.

૫૦. મહારાજસ્સહં ધીતા, ધતરટ્ઠસ્સ સિરીમતો [ધતરટ્ઠસિરીમતો (સ્યા. ક.)];

અહં સિરી ચ લક્ખી ચ, ભૂરિપઞ્ઞાતિ મં વિદૂ;

ઓકાસં યાચિતો દેહિ, વસેમુ તવ સન્તિકે.

૫૧. કિંસીલે કિંસમાચારે, પુરિસે નિવિસસે તુવં;

પુટ્ઠા મે લક્ખિ અક્ખાહિ, કથં [યથા (સી. પી.)] જાનેમુ તં મયં.

૫૨. યો ચાપિ સીતે અથવાપિ ઉણ્હે, વાતાતપે ડંસસરીસપે ચ;

ખુધં [ખુદ્દં (સ્યા. ક.), ખુદં (પી.)] પિપાસં અભિભુય્ય સબ્બં, રત્તિન્તિવં યો સતતં નિયુત્તો;

કાલાગતઞ્ચ ન હાપેતિ અત્થં, સો મે મનાપો નિવિસે ચ તમ્હિ.

૫૩. અક્કોધનો મિત્તવા ચાગવા ચ, સીલૂપપન્નો અસઠોજુભૂતો [અસઠો ઉજ્જુભૂતો (પી.)];

સઙ્ગાહકો સખિલો સણ્હવાચો, મહત્તપત્તોપિ નિવાતવુત્તિ;

તસ્મિંહં [તસ્માહં (સી. પી.)] પોસે વિપુલા ભવામિ, ઊમિ સમુદ્દસ્સ યથાપિ વણ્ણં.

૫૪. યો ચાપિ મિત્તે અથવા અમિત્તે, સેટ્ઠે સરિક્ખે અથ વાપિ હીને;

અત્થં ચરન્તં અથવા અનત્થં, આવી રહો સઙ્ગહમેવ વત્તે [વત્તો (સ્યા. ક.)].

વાચં ન વજ્જા ફરુસં કદાચિ, મતસ્સ જીવસ્સ ચ તસ્સ હોમિ.

૫૫. એતેસં યો અઞ્ઞતરં લભિત્વા, કન્તા સિરી [કન્તસિરિં (કત્થચિ), કન્તં સિરિં (સ્યા.) અટ્ઠકથાયં દુતિયતતિયપાઠન્તરાનિ] મજ્જતિ અપ્પપઞ્ઞો;

તં દિત્તરૂપં વિસમં ચરન્તં, કરીસઠાનંવ [કરીસજાતં વ (સી. સ્યા.)] વિવજ્જયામિ.

૫૬. અત્તના કુરુતે લક્ખિં, અલક્ખિં કુરુતત્તના;

ન હિ લક્ખિં અલક્ખિં વા, અઞ્ઞો અઞ્ઞસ્સ કારકોતિ.

સિરિકાળકણ્ણિજાતકં સત્તમં.

૩૮૩. કુક્કુટજાતકં (૬-૧-૮)

૫૭. સુચિત્તપત્તછદન, તમ્બચૂળ વિહઙ્ગમ;

ઓરોહ દુમસાખાય, મુધા ભરિયા ભવામિ તે.

૫૮. ચતુપ્પદી ત્વં કલ્યાણિ, દ્વિપદાહં મનોરમે;

મિગી પક્ખી અસઞ્ઞુત્તા, અઞ્ઞં પરિયેસ સામિકં.

૫૯. કોમારિકા તે હેસ્સામિ, મઞ્જુકા પિયભાણિની;

વિન્દ મં અરિયેન વેદેન, સાવય મં યદિચ્છસિ.

૬૦. કુણપાદિનિ લોહિતપે, ચોરિ કુક્કુટપોથિનિ;

ન ત્વં અરિયેન વેદેન, મમં ભત્તારમિચ્છસિ.

૬૧. એવમ્પિ ચતુરા [ચાતુરા (સ્યા. ક.)] નારી, દિસ્વાન સધનં [પવરં (સી. સ્યા. પી.)] નરં;

નેન્તિ સણ્હાહિ વાચાહિ, બિળારી વિય કુક્કુટં.

૬૨. યો ચ ઉપ્પતિતં અત્થં, ન ખિપ્પમનુબુજ્ઝતિ;

અમિત્તવસમન્વેતિ, પચ્છા ચ અનુતપ્પતિ.

૬૩. યો ચ ઉપ્પતિતં અત્થં, ખિપ્પમેવ નિબોધતિ;