૧. સઙ્કપ્પવગ્ગો

૨૫૧. સઙ્કપ્પરાગજાતકં (૩-૧-૧)

૧. સઙ્કપ્પરાગધોતેન, વિતક્કનિસિતેન ચ;

નાલઙ્કતેન ભદ્રેન [નેવાલઙ્કતભદ્રેન (સ્યા.)], ઉસુકારાકતેન ચ [ન ઉસુકારકતેન ચ (સી. સ્યા. પી.)].

૨. ન કણ્ણાયતમુત્તેન, નાપિ મોરૂપસેવિના;

તેનમ્હિ હદયે વિદ્ધો, સબ્બઙ્ગપરિદાહિના.

૩. આવેધઞ્ચ ન પસ્સામિ, યતો રુહિરમસ્સવે;

યાવ અયોનિસો ચિત્તં, સયં મે દુક્ખમાભતન્તિ.

સઙ્કપ્પરાગજાતકં પઠમં.

૨૫૨. તિલમુટ્ઠિજાતકં (૩-૧-૨)

૪. અજ્જાપિ મે તં મનસિ [સરસિ (ક.)], યં મં ત્વં તિલમુટ્ઠિયા;

બાહાય મં ગહેત્વાન, લટ્ઠિયા અનુતાળયિ.

૫. નનુ જીવિતે ન રમસિ, યેનાસિ બ્રાહ્મણાગતો;

યં મં બાહા ગહેત્વાન, તિક્ખત્તું અનુતાળયિ.

૬. અરિયો અનરિયં કુબ્બન્તં [કુબ્બાનં (સી. પી.), કુબ્બં (સ્યા.)], યો દણ્ડેન નિસેધતિ;

સાસનં તં ન તં વેરં, ઇતિ નં પણ્ડિતા વિદૂતિ.

તિલમુટ્ઠિજાતકં દુતિયં.

૨૫૩. મણિકણ્ઠજાતકં (૩-૧-૩)

૭. મમન્નપાનં વિપુલં ઉળારં, ઉપ્પજ્જતીમસ્સ મણિસ્સ હેતુ;

તં તે ન દસ્સં અતિયાચકોસિ, ન ચાપિ તે અસ્સમમાગમિસ્સં.

૮. સુસૂ યથા સક્ખરધોતપાણી, તાસેસિ મં સેલં યાચમાનો;

તં તે ન દસ્સં અતિયાચકોસિ, ન ચાપિ તે અસ્સમમાગમિસ્સં.

૯. ન તં યાચે યસ્સ પિયં જિગીસે [જિગિંસે (સી. સ્યા. પી.)], દેસ્સો હોતિ અતિયાચનાય;

નાગો મણિં યાચિતો બ્રાહ્મણેન, અદસ્સનંયેવ તદજ્ઝગમાતિ.

મણિકણ્ઠજાતકં તતિયં.

૨૫૪. કુણ્ડકકુચ્છિસિન્ધવજાતકં (૩-૧-૪)

૧૦. ભુત્વા તિણપરિઘાસં, ભુત્વા આચામકુણ્ડકં;

એતં તે ભોજનં આસિ, કસ્મા દાનિ ન ભુઞ્જસિ.

૧૧. યત્થ પોસં ન જાનન્તિ, જાતિયા વિનયેન વા;

બહું [પહૂ (સી. પી.), પહું (સ્યા. ક.)] તત્થ મહાબ્રમ્હે, અપિ આચામકુણ્ડકં.

૧૨. ત્વઞ્ચ ખો મં પજાનાસિ, યાદિસાયં હયુત્તમો;

જાનન્તો જાનમાગમ્મ, ન તે ભક્ખામિ કુણ્ડકન્તિ.

કુણ્ડકકુચ્છિસિન્ધવજાતકં ચતુત્થં.

૨૫૫. સુકજાતકં (૩-૧-૫)

૧૩. યાવ સો મત્તમઞ્ઞાસિ, ભોજનસ્મિં વિહઙ્ગમો;

તાવ અદ્ધાનમાપાદિ, માતરઞ્ચ અપોસયિ.

૧૪. યતો ચ ખો બહુતરં, ભોજનં અજ્ઝવાહરિ [અજ્ઝુપાહરિ (સી. પી.)];

તતો તત્થેવ સંસીદિ, અમત્તઞ્ઞૂ હિ સો અહુ.

૧૫. તસ્મા મત્તઞ્ઞુતા સાધુ, ભોજનસ્મિં અગિદ્ધતા [અગિદ્ધિતા (સ્યા. ક.)];

અમત્તઞ્ઞૂ હિ સીદન્તિ, મત્તઞ્ઞૂ ચ ન સીદરેતિ.

સુકજાતકં પઞ્ચમં.

૨૫૬. જરૂદપાનજાતકં (૩-૧-૬)

૧૬. જરૂદપાનં ખણમાના, વાણિજા ઉદકત્થિકા;

અજ્ઝગમું અયસં લોહં [અજ્ઝગંસુ અયોલોહં (સી. સ્યા. પી.)], તિપુસીસઞ્ચ વાણિજા;

રજતં જાતરૂપઞ્ચ, મુત્તા વેળૂરિયા બહૂ.

૧૭. તે ચ તેન અસન્તુટ્ઠા, ભિય્યો ભિય્યો અખાણિસું;

તે તત્થાસીવિસો [તત્થ આસીવિસો (ક.), તત્થપાસીવિસો (સ્યા.)] ઘોરો, તેજસ્સી તેજસા હનિ.

૧૮. તસ્મા ખણે નાતિખણે, અતિખાતં [અતિખણં (ક.)] હિ પાપકં;

ખાતેન ચ [ખણેન ચ (ક.), ખણનેન (સ્યા.)] ધનં લદ્ધં, અતિખાતેન [અતિખણેન (ક.)] નાસિતન્તિ.

જરૂદપાનજાતકં છટ્ઠં.

૨૫૭. ગામણિચન્દજાતકં (૩-૧-૭)

૧૯. નાયં ઘરાનં કુસલો, લોલો અયં વલીમુખો;

કતં કતં ખો દૂસેય્ય, એવંધમ્મમિદં કુલં.

૨૦. નયિદં ચિત્તવતો લોમં, નાયં અસ્સાસિકો મિગો;

સિટ્ઠં [સત્થં (સી. સ્યા. પી.)] મે જનસન્ધેન, નાયં કિઞ્ચિ વિજાનતિ.

૨૧. ન માતરં પિતરં વા, ભાતરં ભગિનિં સકં;

ભરેય્ય તાદિસો પોસો, સિટ્ઠં દસરથેન મેતિ.

ગામણિચન્દ [ગામણિચણ્ડ (સી. પી.)] જાતકં સત્તમં.

૨૫૮. મન્ધાતુજાતકં (૩-૧-૮)

૨૨. યાવતા ચન્દિમસૂરિયા, પરિહરન્તિ દિસા ભન્તિ વિરોચના [વિરોચમાના (ક.)];

સબ્બેવ દાસા મન્ધાતુ, યે પાણા પથવિસ્સિતા [પઠવિનિસ્સિતા (સી. પી.), પઠવિસ્સિતા (સ્યા.)].

૨૩. ન કહાપણવસ્સેન, તિત્તિ કામેસુ વિજ્જતિ;

અપ્પસ્સાદા દુખા કામા, ઇતિ વિઞ્ઞાય પણ્ડિતો.

૨૪. અપિ દિબ્બેસુ કામેસુ, રતિં સો નાધિગચ્છતિ;

તણ્હક્ખયરતો હોતિ, સમ્માસમ્બુદ્ધસાવકોતિ.

મન્ધાતુજાતકં અટ્ઠમં.

૨૫૯. તિરીટવચ્છજાતકં (૩-૧-૯)

૨૫. નયિમસ્સ વિજ્જામયમત્થિ કિઞ્ચિ, ન બન્ધવો નો પન તે સહાયો;

અથ કેન વણ્ણેન તિરીટવચ્છો [તિરીટિવચ્છો (સ્યા. ક.)], તેદણ્ડિકો ભુઞ્જતિ અગ્ગપિણ્ડં.

૨૬. આપાસુ [આવાસુ (ક.)] મે યુદ્ધપરાજિતસ્સ, એકસ્સ કત્વા વિવનસ્મિ ઘોરે;

પસારયી કિચ્છગતસ્સ પાણિં, તેનૂદતારિં દુખસંપરેતો.

૨૭. એતસ્સ કિચ્ચેન ઇધાનુપત્તો, વેસાયિનો વિસયા જીવલોકે;

લાભારહો તાત તિરીટવચ્છો, દેથસ્સ ભોગં યજથઞ્ચ [યજતઞ્ચ (સી. પી.), યજિતઞ્ચ (સ્યા.)] યઞ્ઞન્તિ.

તિરીટવચ્છજાતકં નવમં.

૨૬૦. દૂતજાતકં (૩-૧-૧૦)

૨૮. યસ્સત્થા દૂરમાયન્તિ, અમિત્તમપિ યાચિતું;

તસ્સૂદરસ્સહં દૂતો, મા મે કુજ્ઝ [કુજ્ઝિ (સી. પી.)] રથેસભ.

૨૯. યસ્સ દિવા ચ રત્તો ચ, વસમાયન્તિ માણવા;

તસ્સૂદરસ્સહં દૂતો, મા મે કુજ્ઝ [કુજ્ઝિ (સી. પી.)] રથેસભ.

૩૦. દદામિ તે બ્રાહ્મણ રોહિણીનં, ગવં સહસ્સં સહ પુઙ્ગવેન;

દૂતો હિ દૂતસ્સ કથં ન દજ્જં, મયમ્પિ તસ્સેવ ભવામ દૂતાતિ.

દૂતજાતકં દસમં.

સઙ્કપ્પવગ્ગો પઠમો.

તસ્સુદ્દાનં –

ઉસુકારવરો તિલમુટ્ઠિ મણિ, હયરાજ વિહઙ્ગમ આસિવિસો;

જનસન્ધ કહાપણવસ્સ પુન, તિરિટં પુન દૂતવરેન દસાતિ.