૫૧૧. કિંછન્દજાતકં (૧)

૧. કિંછન્દો કિમધિપ્પાયો, એકો સમ્મસિ ઘમ્મનિ;

કિં પત્થયાનો કિં એસં, કેન અત્થેન બ્રાહ્મણ.

૨. યથા મહા વારિધરો, કુમ્ભો સુપરિણાહવા [સુપરિણામવા (ક.)];

તથૂપમં અમ્બપક્કં, વણ્ણગન્ધરસુત્તમં.

૩. તં વુય્હમાનં સોતેન, દિસ્વાનામલમજ્ઝિમે;

પાણીહિ નં ગહેત્વાન, અગ્યાયતનમાહરિં.

૪. તતો કદલિપત્તેસુ, નિક્ખિપિત્વા સયં અહં;

સત્થેન નં વિકપ્પેત્વા, ખુપ્પિપાસં અહાસિ મે.

૫. સોહં અપેતદરથો, બ્યન્તીભૂતો [બ્યન્તિભૂતો (સી. પી. ક.)] દુખક્ખમો;

અસ્સાદં નાધિગચ્છામિ, ફલેસ્વઞ્ઞેસુ કેસુચિ [કેસુપિ (ક. સી.)].

૬. સોસેત્વા નૂન મરણં, તં મમં આવહિસ્સતિ;

અમ્બં યસ્સ ફલં સાદુ, મધુરગ્ગં મનોરમં;

યમુદ્ધરિં વુય્હમાનં, ઉદધિસ્મા મહણ્ણવે.

૭. અક્ખાતં તે મયા સબ્બં, યસ્મા ઉપવસામહં;

રમ્મં પતિ નિસિન્નોસ્મિ, પુથુલોમાયુતા પુથુ.

૮. ત્વઞ્ચ ખો મેવ [મે (સી.), મમ (?)] અક્ખાહિ, અત્તાનમપલાયિનિ;

કા વા ત્વમસિ કલ્યાણિ, કિસ્સ વા ત્વં સુમજ્ઝિમે.

૯. રુપ્પપટ્ટપલિમટ્ઠીવ [રુપ્પપટ્ટપ્લમટ્ઠીવ (સ્યા.), રૂપપટ્ટપમટ્ઠીવ (ક.)], બ્યગ્ઘીવ ગિરિસાનુજા;

યા સન્તિ નારિયો દેવેસુ, દેવાનં પરિચારિકા.

૧૦. યા ચ મનુસ્સલોકસ્મિં, રૂપેનાન્વાગતિત્થિયો;

રૂપેન તે સદિસી નત્થિ, દેવેસુ ગન્ધબ્બમનુસ્સલોકે [દેવગન્ધબ્બમાનુસે (સ્યા.)];

પુટ્ઠાસિ મે ચારુપુબ્બઙ્ગિ, બ્રૂહિ નામઞ્ચ બન્ધવે.

૧૧. યં ત્વં પતિ નિસિન્નોસિ, રમ્મં બ્રાહ્મણ કોસિકિં;

સાહં ભુસાલયા વુત્થા, વરવારિવહોઘસા.

૧૨. નાનાદુમગણાકિણ્ણા, બહુકા ગિરિકન્દરા;

મમેવ પમુખા હોન્તિ, અભિસન્દન્તિ પાવુસે.

૧૩. અથો બહૂ વનતોદા, નીલવારિવહિન્ધરા;

બહુકા નાગવિત્તોદા, અભિસન્દન્તિ વારિના.

૧૪. તા અમ્બજમ્બુલબુજા, નીપા તાલા ચુદુમ્બરા [તાલમુદુમ્બરા (સ્યા. ક.)];

બહૂનિ ફલજાતાનિ, આવહન્તિ અભિણ્હસો.

૧૫. યં કિઞ્ચિ ઉભતો તીરે, ફલં પતતિ અમ્બુનિ;

અસંસયં તં સોતસ્સ, ફલં હોતિ વસાનુગં.

૧૬. એતદઞ્ઞાય મેધાવિ, પુથુપઞ્ઞ સુણોહિ મે;

મા રોચય મભિસઙ્ગં, પટિસેધ જનાધિપ.

૧૭. ન વાહં વડ્ઢવં [વદ્ધવં (સી. પી.)] મઞ્ઞે, યં ત્વં રટ્ઠાભિવડ્ઢન;

આચેય્યમાનો રાજિસિ, મરણં અભિકઙ્ખસિ.

૧૮. તસ્સ જાનન્તિ પિતરો, ગન્ધબ્બા ચ સદેવકા;

યે ચાપિ ઇસયો લોકે, સઞ્ઞતત્તા તપસ્સિનો;

અસંસયં તેપિ [તે (સી. પી.)] જાનન્તિ, પટ્ઠભૂતા [વદ્ધભૂતા (સી. પી.)] યસસ્સિનો.

૧૯. એવં વિદિત્વા વિદૂ સબ્બધમ્મં, વિદ્ધંસનં ચવનં જીવિતસ્સ;

ન ચીયતી તસ્સ નરસ્સ પાપં, સચે ન ચેતેતિ વધાય તસ્સ.

૨૦. ઇસિપૂગસમઞ્ઞાતે, એવં લોક્યા વિદિતા સતિ [પતિ (ક. સ્યા. ક.)];

અનરિયપરિસમ્ભાસે, પાપકમ્મં જિગીસસિ [જિગિંસસિ (સી. સ્યા. પી.)].

૨૧. સચે અહં મરિસ્સામિ, તીરે તે પુથુસુસ્સોણિ;

અસંસયં તં અસિલોકો, મયિ પેતે આગમિસ્સતિ.

૨૨. તસ્મા હિ પાપકં કમ્મં, રક્ખસ્સેવ [રક્ખસ્સુ ચ (સ્યા.)] સુમજ્ઝિમે;

મા તં સબ્બો જનો પચ્છા, પકુટ્ઠાયિ [પકત્થાસિ (સી. પી.), પત્વક્ખાસિ (સ્યા.)] મયિ મતે.

૨૩. અઞ્ઞાતમેતં અવિસય્હસાહિ, અત્તાનમમ્બઞ્ચ દદામિ તે તં;

સો દુચ્ચજે કામગુણે પહાય, સન્તિઞ્ચ ધમ્મઞ્ચ અધિટ્ઠિતોસિ.

૨૪. યો હિત્વા પુબ્બસઞ્ઞોગં, પચ્છા સંયોજને ઠિતો;

અધમ્મઞ્ચેવ ચરતિ, પાપઞ્ચસ્સ પવડ્ઢતિ.

૨૫. એહિ તં પાપયિસ્સામિ, કામં અપ્પોસ્સુકો ભવ;

ઉપાનયામિ સીતસ્મિં, વિહરાહિ અનુસ્સુકો.

૨૬. તં પુપ્ફરસમત્તેભિ, વક્કઙ્ગેહિ અરિન્દમ;

કોઞ્ચા મયૂરા દિવિયા, કોલટ્ઠિમધુસાળિકા;

કૂજિતા હંસપૂગેહિ, કોકિલેત્થ પબોધરે.

૨૭. અમ્બેત્થ વિપ્પસાખગ્ગા [વિપ્પસૂનગ્ગા (સી. સ્યા. પી.), વિપ્પઓનગ્ગા (ક.)], પલાલખલસન્નિભા;

કોસમ્બસળલા [કોસુમ્ભસલલા (સી. સ્યા. પી.)] નીપા, પક્કતાલવિલમ્બિનો.

૨૮. માલી તિરિટી કાયૂરી, અઙ્ગદી ચન્દનુસ્સદો [ચન્દનસ્સદો (સી.)];

રત્તિં ત્વં પરિચારેસિ, દિવા વેદેસિ વેદનં.

૨૯. સોળસિત્થિસહસ્સાનિ, યા તેમા પરિચારિકા;

એવં મહાનુભાવોસિ, અબ્ભુતો લોમહંસનો.

૩૦. કિં કમ્મમકરી પુબ્બે, પાપં અત્તદુખાવહં;

યં કરિત્વા મનુસ્સેસુ, પિટ્ઠિમંસાનિ ખાદસિ.

૩૧. અજ્ઝેનાનિ પટિગ્ગય્હ, કામેસુ ગધિતો [ગથિતો (સી. પી.), ગિદ્ધિતો (સ્યા. ક.), ગિદ્ધિકો (ક. અટ્ઠ.)] અહં;

અચરિં દીઘમદ્ધાનં, પરેસં અહિતાયહં.

૩૨. યો પિટ્ઠિમંસિકો હોતિ, એવં ઉક્કચ્ચ ખાદતિ;

યથાહં અજ્જ ખાદામિ, પિટ્ઠિમંસાનિ અત્તનોતિ.

કિંછન્દજાતકં પઠમં.