૪૯૭. માતઙ્ગજાતકં (૧)

૧. કુતો નુ આગચ્છસિ દુમ્મવાસી [રુમ્મવાસી (સી. પી.)], ઓતલ્લકો પંસુપિસાચકોવ;

સઙ્કારચોળં પટિમુઞ્ચ [પટિમુચ્ચ (સી. પી.)] કણ્ઠે, કો રે તુવં હોસિ [હોહિસિ (સી. પી.)] અદક્ખિણેય્યો.

૨. અન્નં તવેદં [તવ ઇદં (ક. સી. પી.), તવયિદં (સ્યા.)] પકતં યસસ્સિ, તં ખજ્જરે ભુઞ્જરે પિય્યરે ચ;

જાનાસિ મં ત્વં પરદત્તૂપજીવિં, ઉત્તિટ્ઠપિણ્ડં લભતં સપાકો.

૩. અન્નં મમેદં [મમ ઇદં (ક. સી. પી.), મમયિદં (સ્યા.)] પકતં બ્રાહ્મણાનં, અત્તત્થાય સદ્દહતો મમેદં [મમ ઇદં (ક. સી. પી.), મમયિદં (સ્યા.)];

અપેહિ એત્તો કિમિધટ્ઠિતોસિ, ન માદિસા તુય્હં દદન્તિ જમ્મ.

૪. થલે ચ નિન્ને ચ વપન્તિ બીજં, અનૂપખેત્તે ફલમાસમાના [માસસાના (સી. પી.), માસિં સમાના (સ્યા.)];

એતાય સદ્ધાય દદાહિ દાનં, અપ્પેવ આરાધયે દક્ખિણેય્યે.

૫. ખેત્તાનિ મય્હં વિદિતાનિ લોકે, યેસાહં બીજાનિ પતિટ્ઠપેમિ;

યે બ્રાહ્મણા જાતિમન્તૂપપન્ના, તાનીધ ખેત્તાનિ સુપેસલાનિ.

૬. જાતિમદો ચ અતિમાનિતા ચ, લોભો ચ દોસો ચ મદો ચ મોહો;

એતે અગુણા યેસુ ચ સન્તિ [યેસુ વસન્તિ (સી. પી.)] સબ્બે, તાનીધ ખેત્તાનિ અપેસલાનિ.

૭. જાતિમદો ચ અતિમાનિતા ચ, લોભો ચ દોસો ચ મદો ચ મોહો;

એતે અગુણા યેસુ ન સન્તિ સબ્બે, તાનીધ ખેત્તાનિ સુપેસલાનિ.

૮. ક્વેત્થ ગતા [ક્વત્થ ગતા (સ્યા.), કત્થેવ ભટ્ઠા (પી.)] ઉપજોતિયો ચ, ઉપજ્ઝાયો ચ અથવા ગણ્ડકુચ્છિ [અણ્ડકુચ્છિ (સી. સ્યા. પી.)];

ઇમસ્સ દણ્ડઞ્ચ વધઞ્ચ દત્વા, ગલે ગહેત્વા ખલયાથ [ગલયાથ (ક.)] જમ્મં.

૯. ગિરિં નખેન ખણસિ, અયો દન્તેહિ [દન્તેન (સી. પી.)] ખાદસિ;

જાતવેદં પદહસિ, યો ઇસિં પરિભાસસિ.

૧૦. ઇદં વત્વાન માતઙ્ગો, ઇસિ સચ્ચપરક્કમો;

અન્તલિક્ખસ્મિં પક્કામિ [પક્કમિ (ક.)], બ્રાહ્મણાનં ઉદિક્ખતં.

૧૧. આવેલ્લિતં [અવેઠિતં (સી. પી.)] પિટ્ઠિતો ઉત્તમઙ્ગં, બાહું [બાહં (સી. પી.)] પસારેતિ અકમ્મનેય્યં [અકમ્પનેય્યં (ક.)];

સેતાનિ અક્ખીનિ યથા મતસ્સ, કો મે ઇમં પુત્તમકાસિ એવં.

૧૨. ઇધાગમા સમણો દુમ્મવાસી, ઓતલ્લકો પંસુપિસાચકોવ;

સઙ્કારચોળં પટિમુઞ્ચ કણ્ઠે, સો તે ઇમં પુત્તમકાસિ એવં.

૧૩. કતમં દિસં અગમા ભૂરિપઞ્ઞો, અક્ખાથ મે માણવા એતમત્થં;

ગન્ત્વાન તં પટિકરેમુ અચ્ચયં, અપ્પેવ નં પુત્ત લભેમુ જીવિતં.

૧૪. વેહાયસં અગમા ભૂરિપઞ્ઞો, પથદ્ધુનો પન્નરસેવ ચન્દો;

અપિ ચાપિ સો પુરિમદિસં અગચ્છિ, સચ્ચપ્પટિઞ્ઞો ઇસિ સાધુરૂપો.

૧૫. આવેલ્લિતં પિટ્ઠિતો ઉત્તમઙ્ગં, બાહું પસારેતિ અકમ્મનેય્યં;

સેતાનિ અક્ખીનિ યથા મતસ્સ, કો મે ઇમં પુત્તમકાસિ એવં.

૧૬. યક્ખા હવે સન્તિ મહાનુભાવા, અન્વાગતા ઇસયો સાધુરૂપા;

તે દુટ્ઠચિત્તં કુપિતં વિદિત્વા, યક્ખા હિ તે પુત્તમકંસુ એવં.

૧૭. યક્ખા ચ મે પુત્તમકંસુ એવં, ત્વઞ્ઞેવ મે મા કુદ્ધો [કુદ્ધ (ક.)] બ્રહ્મચારિ;

તુમ્હેવ [તુય્હેવ (ક.)] પાદે સરણં ગતાસ્મિ, અન્વાગતા પુત્તસોકેન ભિક્ખુ.

૧૮. તદેવ હિ એતરહિ ચ મય્હં, મનોપદોસો ન મમત્થિ [મમ નત્થિ (પી.)] કોચિ;

પુત્તો ચ તે વેદમદેન મત્તો, અત્થં ન જાનાતિ અધિચ્ચ વેદે.

૧૯. અદ્ધા હવે ભિક્ખુ મુહુત્તકેન, સમ્મુય્હતેવ પુરિસસ્સ સઞ્ઞા;

એકાપરાધં [એતાપરાધં (ક.)] ખમ ભૂરિપઞ્ઞ, ન પણ્ડિતા કોધબલા ભવન્તિ.

૨૦. ઇદઞ્ચ મય્હં ઉત્તિટ્ઠપિણ્ડં, તવ [નત્થિ સી. પી. પોત્થકેસુ] મણ્ડબ્યો ભુઞ્જતુ અપ્પપઞ્ઞો;

યક્ખા ચ તે નં [તે પુત્તં (સ્યા.)] ન વિહેઠયેય્યું, પુત્તો ચ તે હેસ્સતિ [હોહિતિ (સી. પી.)] સો અરોગો.

૨૧. મણ્ડબ્ય બાલોસિ પરિત્તપઞ્ઞો, યો પુઞ્ઞખેત્તાનમકોવિદોસિ;

મહક્કસાવેસુ દદાસિ દાનં, કિલિટ્ઠકમ્મેસુ અસઞ્ઞતેસુ.

૨૨. જટા ચ કેસા અજિના નિવત્થા, જરૂદપાનંવ મુખં પરૂળ્હં;

પજં ઇમં પસ્સથ દુમ્મરૂપં [રુમ્મરૂપિં (સી. પી.)], ન જટાજિનં તાયતિ અપ્પપઞ્ઞં.

૨૩. યેસં રાગો ચ દોસો ચ, અવિજ્જા ચ વિરાજિતા;

ખીણાસવા અરહન્તો, તેસુ દિન્નં મહપ્ફલન્તિ.

માતઙ્ગજાતકં પઠમં.