૪૯૬. ભિક્ખાપરમ્પરજાતકં (૧૩)

૨૭૦. સુખુમાલરૂપં દિસ્વા [દિસ્વાન (ક. સી. અટ્ઠ.)], રટ્ઠા વિવનમાગતં;

કૂટાગારવરૂપેતં, મહાસયનમુપાસિતં [મુપોચિતં (બહૂસુ)].

૨૭૧. તસ્સ તે પેમકેનાહં, અદાસિં વડ્ઢમોદનં [બદ્ધમોદનં (સી. પી.)];

સાલીનં વિચિતં ભત્તં, સુચિં મંસૂપસેચનં.

૨૭૨. તં ત્વં ભત્તં પટિગ્ગય્હ, બ્રાહ્મણસ્સ અદાસયિ [અદાપયિ (સી. સ્યા. પી.)];

અત્તાનં [અત્તના (પી. અટ્ઠ. પાઠન્તરં)] અનસિત્વાન, કોયં ધમ્મો નમત્થુ તે.

૨૭૩. આચરિયો બ્રાહ્મણો મય્હં, કિચ્ચાકિચ્ચેસુ બ્યાવટો [વાવટો (ક.)];

ગરુ ચ આમન્તનીયો [આમન્તણીયો (સી. પી.)] ચ, દાતુમરહામિ ભોજનં.

૨૭૪. બ્રાહ્મણં દાનિ પુચ્છામિ, ગોતમં રાજપૂજિતં;

રાજા તે ભત્તં પાદાસિ, સુચિં મંસૂપસેચનં.

૨૭૫. તં ત્વં ભત્તં પટિગ્ગય્હ, ઇસિસ્સ ભોજનં અદા;

અખેત્તઞ્ઞૂસિ દાનસ્સ, કોયં ધમ્મો નમત્થુ તે.

૨૭૬. ભરામિ પુત્ત [પુત્તે (સી. પી.)] દારે ચ, ઘરેસુ ગધિતો [ગથિતો (સી. પી.)] અહં;

ભુઞ્જે માનુસકે કામે, અનુસાસામિ રાજિનો.

૨૭૭. આરઞ્ઞિકસ્સ [આરઞ્ઞકસ્સ (સી. પી.)] ઇસિનો, ચિરરત્તં તપસ્સિનો;

વુડ્ઢસ્સ ભાવિતત્તસ્સ, દાતુમરહામિ ભોજનં.

૨૭૮. ઇસિઞ્ચ દાનિ પુચ્છામિ, કિસં ધમનિસન્થતં;

પરૂળ્હકચ્છનખલોમં, પઙ્કદન્તં રજસ્સિરં.

૨૭૯. એકો અરઞ્ઞે વિહરસિ [વિહાસિ (ક.)], નાવકઙ્ખસિ જીવિતં;

ભિક્ખુ કેન તયા સેય્યો, યસ્સ ત્વં ભોજનં અદા.

૨૮૦. ખણન્તાલુકલમ્બાનિ [ખણમાલુકલમ્બાનિ (સ્યા. ક.)], બિલાલિતક્કલાનિ ચ [બિળાલિતક્કળાનિ ચ (સી. પી.)];

ધુનં સામાકનીવારં, સઙ્ઘારિયં પસારિયં [સંહારિયં પહારિયં (સ્યા.), સંસારિયં પસારિયં (ક.)].

૨૮૧. સાકં ભિસં મધું મંસં, બદરામલકાનિ ચ;

તાનિ આહરિત્વા [આહત્વ (સી. સ્યા.)] ભુઞ્જામિ, અત્થિ મે સો પરિગ્ગહો.

૨૮૨. પચન્તો અપચન્તસ્સ, અમમસ્સ સકિઞ્ચનો [અકિઞ્ચનો (ક.)];

અનાદાનસ્સ સાદાનો, દાતુમરહામિ ભોજનં.

૨૮૩. ભિક્ખુઞ્ચ દાનિ પુચ્છામિ, તુણ્હીમાસીન સુબ્બતં;

ઇસિ તે ભત્તં પાદાસિ, સુચિં મંસૂપસેચનં.

૨૮૪. તં ત્વં ભત્તં પટિગ્ગય્હ, તુણ્હી ભુઞ્જસિ એકકો;

નાઞ્ઞં કઞ્ચિ [કિઞ્ચિ (ક.)] નિમન્તેસિ, કોયં ધમ્મો નમત્થુ તે.

૨૮૫. ન પચામિ ન પાચેમિ, ન છિન્દામિ ન છેદયે;

તં મં અકિઞ્ચનં ઞત્વા, સબ્બપાપેહિ આરતં.

૨૮૬. વામેન ભિક્ખમાદાય, દક્ખિણેન કમણ્ડલું;

ઇસિ મે ભત્તં પાદાસિ, સુચિં મંસૂપસેચનં.

૨૮૭. એતે હિ દાતુમરહન્તિ, સમમા સપરિગ્ગહા;

પચ્ચનીકમહં મઞ્ઞે, યો દાતારં નિમન્તયે.

૨૮૮. અત્થાય વત મે અજ્જ, ઇધાગચ્છિ રથેસભો;

સોહં અજ્જ પજાનામિ [ઇતો પુબ્બે ન જાનામિ (સી. પી.)], યત્થ દિન્નં મહપ્ફલં.

૨૮૯. રટ્ઠેસુ ગિદ્ધા રાજાનો, કિચ્ચાકિચ્ચેસુ બ્રાહ્મણા;

ઇસી મૂલફલે ગિદ્ધા, વિપ્પમુત્તા ચ ભિક્ખવોતિ.

ભિક્ખાપરમ્પરજાતકં તેરસમં.

તસ્સુદ્દાનં –

સુવ કિન્નર મુક્ક ખરાજિનસો, ભિસજાત મહેસિ કપોતવરો;

અથ મોર સતચ્છક વાણિજકો, અથ રાજ સબ્રાહ્મણ ભિક્ખપરન્તિ.

પકિણ્ણકનિપાતં નિટ્ઠિતં.