૪૯૩. મહાવાણિજજાતકં (૧૦)

૧૮૦. વાણિજા સમિતિં કત્વા, નાનારટ્ઠતો આગતા;

ધનાહરા પક્કમિંસુ, એકં કત્વાન ગામણિં.

૧૮૧. તે તં કન્તારમાગમ્મ, અપ્પભક્ખં અનોદકં;

મહાનિગ્રોધમદ્દક્ખું, સીતચ્છાયં મનોરમં.

૧૮૨. તે ચ તત્થ નિસીદિત્વા, તસ્સ રુક્ખસ્સ છાયયા [છાદિયા (સી. સ્યા. પી.)];

વાણિજા સમચિન્તેસું, બાલા મોહેન પારુતા.

૧૮૩. અલ્લાયતે [અદ્દાયતે (સી. પી.)] અયં રુક્ખો, અપિ વારીવ [વારિ ચ (સી. પી.)] સન્દતિ;

ઇઙ્ઘસ્સ પુરિમં સાખં, મયં છિન્દામ વાણિજા.

૧૮૪. સા ચ છિન્નાવ પગ્ઘરિ, અચ્છં વારિં અનાવિલં;

તે તત્થ ન્હત્વા પિવિત્વા, યાવતિચ્છિંસુ વાણિજા.

૧૮૫. દુતિયં સમચિન્તેસું, બાલા મોહેન પારુતા;

ઇઙ્ઘસ્સ દક્ખિણં સાખં, મયં છિન્દામ વાણિજા.

૧૮૬. સા ચ છિન્નાવ પગ્ઘરિ, સાલિમંસોદનં બહું;

અપ્પોદવણ્ણે કુમ્માસે, સિઙ્ગિં વિદલસૂપિયો [સિઙ્ગિં બિદલસૂપિયો (સી. પી.), સિઙ્ગીવેરં લસૂપિયો (ક.) સિઙ્ગીન્તિ સિઙ્ગીવેરાદિકં ઉત્તરિભઙ્ગં; વિદલસૂપિયોતિ મુગ્ગસૂપાદયો (અટ્ઠ.) વિદલં કલાયાદિમ્હિ વત્તતીતિ સક્કતાભિધાને].

૧૮૭. તે તત્થ ભુત્વા ખાદિત્વા [ભુત્વા ચ પિવિત્વા ચ (પી.)], યાવતિચ્છિંસુ વાણિજા;

તતિયં સમચિન્તેસું, બાલા મોહેન પારુતા;

ઇઙ્ઘસ્સ પચ્છિમં સાખં, મયં છિન્દામ વાણિજા.

૧૮૮. સા ચ છિન્નાવ પગ્ઘરિ, નારિયો સમલઙ્કતા;

વિચિત્રવત્થાભરણા, આમુત્તમણિકુણ્ડલા.

૧૮૯. અપિ સુ વાણિજા એકા, નારિયો પણ્ણવીસતિ;

સમન્તા પરિવારિંસુ [પરિકરિંસુ (સી. સ્યા. પી.)], તસ્સ રુક્ખસ્સ છાયયા [છાદિયા (સી. સ્યા. પી.)].

૧૯૦. તે તાહિ પરિચારેત્વા [પરિવારેત્વા (સી. સ્યા. પી.)], યાવતિચ્છિંસુ વાણિજા;

ચતુત્થં સમચિન્તેસું, બાલા મોહેન પારુતા;

ઇઙ્ઘસ્સ ઉત્તરં સાખં, મયં છિન્દામ વાણિજા.

૧૯૧. સા ચ છિન્નાવ પગ્ઘરિ, મુત્તા વેળુરિયા બહૂ;

રજતં જાતરૂપઞ્ચ, કુત્તિયો પટિયાનિ ચ.

૧૯૨. કાસિકાનિ ચ વત્થાનિ, ઉદ્દિયાનિ ચ કમ્બલા [ઉદ્દિયાને ચ કમ્બલે (સી. પી.)];

તે તત્થ ભારે બન્ધિત્વા, યાવતિચ્છિંસુ વાણિજા.

૧૯૩. પઞ્ચમં સમચિન્તેસું, બાલા મોહેન પારુતા;

ઇઙ્ઘસ્સ મૂલે [મૂલં (સી. પી. ક.)] છિન્દામ, અપિ ભિય્યો લભામસે.

૧૯૪. અથુટ્ઠહિ સત્થવાહો, યાચમાનો કતઞ્જલી;

નિગ્રોધો કિં પરજ્ઝતિ [અપરજ્ઝથ (સી.), અપરજ્ઝતિ (સ્યા. પી.)], વાણિજા ભદ્દમત્થુ તે.

૧૯૫. વારિદા પુરિમા સાખા, અન્નપાનઞ્ચ દક્ખિણા;

નારિદા પચ્છિમા સાખા, સબ્બકામે ચ ઉત્તરા;

નિગ્રોધો કિં પરજ્ઝતિ, વાણિજા ભદ્દમત્થુ તે.

૧૯૬. યસ્સ રુક્ખસ્સ છાયાય, નિસીદેય્ય સયેય્ય વા;

ન તસ્સ સાખં ભઞ્જેય્ય, મિત્તદુબ્ભો હિ પાપકો.

૧૯૭. તે ચ તસ્સાનાદિયિત્વા [તસ્સ અનાદિત્વા (સી. સ્યા.)], એકસ્સ વચનં બહૂ;

નિસિતાહિ કુઠારીહિ [કુધારીહિ (ક.)], મૂલતો નં ઉપક્કમું.

૧૯૮. તતો નાગા નિક્ખમિંસુ, સન્નદ્ધા પણ્ણવીસતિ;

ધનુગ્ગહાનં તિસતા, છસહસ્સા ચ વમ્મિનો.

૧૯૯. એતે હનથ બન્ધથ, મા વો મુઞ્ચિત્થ [મુચ્ચિત્થ (પી.)] જીવિતં;

ઠપેત્વા સત્થવાહંવ, સબ્બે ભસ્મં [ભસ્મી (સી.)] કરોથ ને.

૨૦૦. તસ્મા હિ પણ્ડિતો પોસો, સમ્પસ્સં અત્થમત્તનો;

લોભસ્સ ન વસં ગચ્છે, હનેય્યારિસકં [હનેય્ય દિસતં (સી.), હનેય્ય દિસકં (સ્યા.)] મનં.

૨૦૧. એવ [એત (સી. પી.)] માદીનવં ઞત્વા, તણ્હા દુક્ખસ્સ સમ્ભવં;

વીતતણ્હો અનાદાનો, સતો ભિક્ખુ પરિબ્બજેતિ.

મહાવાણિજજાતકં દસમં.