૪૯૪. સાધિનજાતકં (૧૧)

૨૦૨. અબ્ભુતો વત લોકસ્મિં, ઉપ્પજ્જિ લોમહંસનો;

દિબ્બો રથો પાતુરહુ, વેદેહસ્સ યસસ્સિનો.

૨૦૩. દેવપુત્તો મહિદ્ધિકો, માતલિ [માતલી (સી.)] દેવસારથિ;

નિમન્તયિત્થ રાજાનં, વેદેહં મિથિલગ્ગહં.

૨૦૪. એહિમં રથમારુય્હ, રાજસેટ્ઠ દિસમ્પતિ;

દેવા દસ્સનકામા તે, તાવતિંસા સઇન્દકા;

સરમાના હિ તે દેવા, સુધમ્માયં સમચ્છરે.

૨૦૫. તતો ચ રાજા સાધિનો [સાધીનો (સી. પી.)], વેદેહો મિથિલગ્ગહો [પમુખો રથમારુહિ (સી. પી.)];

સહસ્સયુત્તમારુય્હ [યુત્તં અભિરુય્હ (સી.)], અગા દેવાન સન્તિકે;

તં દેવા પટિનન્દિંસુ, દિસ્વા રાજાનમાગતં.

૨૦૬. સ્વાગતં તે મહારાજ, અથો તે અદુરાગતં;

નિસીદ દાનિ રાજીસિ [રાજિસિ (સી. સ્યા. પી.)], દેવરાજસ્સ સન્તિકે.

૨૦૭. સક્કોપિ પટિનન્દિત્થ, વેદેહં મિથિલગ્ગહં;

નિમન્તયિત્થ [નિમન્તયી ચ (સી. પી.)] કામેહિ, આસનેન ચ વાસવો.

૨૦૮. સાધુ ખોસિ અનુપ્પત્તો, આવાસં વસવત્તિનં;

વસ દેવેસુ રાજીસિ, સબ્બકામસમિદ્ધિસુ;

તાવતિંસેસુ દેવેસુ, ભુઞ્જ કામે અમાનુસે.

૨૦૯. અહં પુરે સગ્ગગતો રમામિ, નચ્ચેહિ ગીતેહિ ચ વાદિતેહિ;

સો દાનિ અજ્જ ન રમામિ સગ્ગે, આયું નુ ખીણો [ખીણં (સ્યા.)] મરણં નુ સન્તિકે;

ઉદાહુ મૂળ્હોસ્મિ જનિન્દસેટ્ઠ.

૨૧૦. ન તાયુ [ન ચાયુ (સી. પી. ક.)] ખીણં મરણઞ્ચ [મરણં તે (સી. પી.)] દૂરે, ન ચાપિ મૂળ્હો નરવીરસેટ્ઠ;

તુય્હઞ્ચ [તવઞ્ચ (સી. પી.), તવ ચ (ક.)] પુઞ્ઞાનિ પરિત્તકાનિ, યેસં વિપાકં ઇધ વેદયિત્થો [વેદયતો (પી. ક.)].

૨૧૧. વસ દેવાનુભાવેન, રાજસેટ્ઠ દિસમ્પતિ;

તાવતિંસેસુ દેવેસુ, ભુઞ્જ કામે અમાનુસે.

૨૧૨. યથા યાચિતકં યાનં, યથા યાચિતકં ધનં;

એવં સમ્પદમેવેતં, યં પરતો દાનપચ્ચયા.

૨૧૩. ન ચાહમેતમિચ્છામિ, યં પરતો દાનપચ્ચયા;

સયંકતાનિ પુઞ્ઞાનિ, તં મે આવેણિકં [આવેણિયં (સી. સ્યા. પી.), આવેનિકં (ક.)] ધનં.

૨૧૪. સોહં ગન્ત્વા મનુસ્સેસુ, કાહામિ કુસલં બહું;

દાનેન સમચરિયાય, સંયમેન દમેન ચ;

યં કત્વા સુખિતો હોતિ, ન ચ પચ્છાનુતપ્પતિ.

૨૧૫. ઇમાનિ તાનિ ખેત્તાનિ, ઇમં નિક્ખં સુકુણ્ડલં;

ઇમા તા હરિતાનૂપા, ઇમા નજ્જો સવન્તિયો.

૨૧૬. ઇમા તા પોક્ખરણી રમ્મા, ચક્કવાકપકૂજિતા [ચક્કવાકૂપકૂજિતા (સી. પી.)];

મન્દાલકેહિ સઞ્છન્ના, પદુમુપ્પલકેહિ ચ;

યસ્સિમાનિ મમાયિંસુ, કિં નુ તે દિસતં ગતા.

૨૧૭. તાનીધ ખેત્તાનિ સો ભૂમિભાગો, તેયેવ આરામવનુપચારા [તે આરામા તે વન’મે પચારા (સી. પી.), તે યેવ આરામવનાનિ સઞ્ચરા (ક.)];

તમેવ મય્હં જનતં અપસ્સતો, સુઞ્ઞંવ મે નારદ ખાયતે દિસા.

૨૧૮. દિટ્ઠા મયા વિમાનાનિ, ઓભાસેન્તા ચતુદ્દિસા;

સમ્મુખા દેવરાજસ્સ, તિદસાનઞ્ચ સમ્મુખા.

૨૧૯. વુત્થં મે ભવનં દિબ્યં [દિબ્બં (સી. પી.)], ભુત્તા કામા અમાનુસા;

તાવતિંસેસુ દેવેસુ, સબ્બકામસમિદ્ધિસુ.

૨૨૦. સોહં એતાદિસં હિત્વા, પુઞ્ઞાયમ્હિ ઇધાગતો;

ધમ્મમેવ ચરિસ્સામિ, નાહં રજ્જેન અત્થિકો.

૨૨૧. અદણ્ડાવચરં મગ્ગં, સમ્માસમ્બુદ્ધદેસિતં;

તં મગ્ગં પટિપજ્જિસ્સં, યેન ગચ્છન્તિ સુબ્બતાતિ.

સાધિનજાતકં [સાધિનરાજજાતકં (સ્યા.)] એકાદસમં.