૪૯૨. તચ્છસૂકરજાતકં (૯)

૧૬૦. યદેસમાના વિચરિમ્હ, પબ્બતાનિ વનાનિ ચ;

અન્વેસં વિચરિં [વિપુલે (સ્યા. ક.)] ઞાતી, તેમે અધિગતા મયા.

૧૬૧. બહુઞ્ચિદં મૂલફલં, ભક્ખો ચાયં અનપ્પકો;

રમ્મા ચિમા ગિરીનજ્જો [ગિરિનદિયો (સી. પી.)], ફાસુવાસો ભવિસ્સતિ.

૧૬૨. ઇધેવાહં વસિસ્સામિ, સહ સબ્બેહિ ઞાતિભિ;

અપ્પોસ્સુક્કો નિરાસઙ્કી, અસોકો અકુતોભયો.

૧૬૩. અઞ્ઞમ્પિ [અઞ્ઞં હિ (સી. પી.)] લેણં પરિયેસ, સત્તુ નો ઇધ વિજ્જતિ;

સો તચ્છ સૂકરે હન્તિ, ઇધાગન્ત્વા વરં વરં.

૧૬૪. કો નુમ્હાકં [કો નમ્હાકં (સી. પી.)] ઇધ સત્તુ, કો ઞાતી સુસમાગતે;

દુપ્પધંસે [અપ્પધંસે (સી. પી.)] પધંસેતિ, તં મે અક્ખાથ પુચ્છિતા.

૧૬૫. ઉદ્ધગ્ગરાજી મિગરાજા, બલી દાઠાવુધો મિગો;

સો તચ્છ સૂકરે હન્તિ, ઇધાગન્ત્વા વરં વરં.

૧૬૬. ન નો દાઠા ન વિજ્જન્તિ [નુ વિજ્જન્તિ (ક.)], બલં કાયે સમોહિતં;

સબ્બે સમગ્ગા હુત્વાન, વસં કાહામ એકકં.

૧૬૭. હદયઙ્ગમં કણ્ણસુખં, વાચં ભાસસિ તચ્છક;

યોપિ યુદ્ધે પલાયેય્ય, તમ્પિ પચ્છા હનામસે.

૧૬૮. પાણાતિપાતા વિરતો નુ અજ્જ, અભયં નુ તે સબ્બભૂતેસુ દિન્નં;

દાઠા નુ તે મિગવધાય [મિગ વિરિયં (સી. સ્યા. પી.)] ન સન્તિ, યો સઙ્ઘપત્તો કપણોવ ઝાયસિ.

૧૬૯. ન મે દાઠા ન વિજ્જન્તિ, બલં કાયે સમોહિતં;

ઞાતી ચ દિસ્વાન સામગ્ગી એકતો, તસ્મા ચ ઝાયામિ વનમ્હિ એકકો.

૧૭૦. ઇમસ્સુદં યન્તિ દિસોદિસં પુરે, ભયટ્ટિતા લેણગવેસિનો પુથુ;

તે દાનિ સઙ્ગમ્મ વસન્તિ એકતો, યત્થટ્ઠિતા દુપ્પસહજ્જ તે મયા.

૧૭૧. પરિણાયકસમ્પન્ના, સહિતા એકવાદિનો;

તે મં સમગ્ગા હિંસેય્યું, તસ્મા નેસં ન પત્થયે [અપત્થવે (પી.)].

૧૭૨. એકોવ ઇન્દો અસુરે જિનાતિ, એકોવ સેનો હન્તિ દિજે પસય્હ;

એકોવ બ્યગ્ઘો મિગસઙ્ઘપત્તો, વરં વરં હન્તિ બલઞ્હિ તાદિસં.

૧૭૩. ન હેવ ઇન્દો ન સેનો, નપિ બ્યગ્ઘો મિગાધિપો;

સમગ્ગે સહિતે ઞાતી, ન બ્યગ્ઘે [બ્યગ્ઘે ચ (સી. પી.), બ્યગ્ઘો ન (સ્યા.)] કુરુતે વસે.

૧૭૪. કુમ્ભીલકા સકુણકા, સઙ્ઘિનો ગણચારિનો;

સમ્મોદમાના એકજ્ઝં, ઉપ્પતન્તિ ડયન્તિ ચ.

૧૭૫. તેસઞ્ચ ડયમાનાનં, એકેત્થ અપસક્કતિ [અપવત્તતિ (સી. પી.)];

તઞ્ચ સેનો નિતાળેતિ, વેય્યગ્ઘિયેવ સા ગતિ.

૧૭૬. ઉસ્સાહિતો જટિલેન, લુદ્દેનામિસચક્ખુના;

દાઠી દાઠીસુ પક્ખન્દિ, મઞ્ઞમાનો યથા પુરે.

૧૭૭. સાધુ સમ્બહુલા ઞાતી, અપિ રુક્ખા અરઞ્ઞજા;

સૂકરેહિ સમગ્ગેહિ, બ્યગ્ઘો એકાયને હતો.

૧૭૮. બ્રાહ્મણઞ્ચેવ બ્યગ્ઘઞ્ચ, ઉભો હન્ત્વાન સૂકરા.

આનન્દિનો પમુદિતા, મહાનાદં પનાદિસું.

૧૭૯. તે સુ ઉદુમ્બરમૂલસ્મિં, સૂકરા સુસમાગતા;

તચ્છકં અભિસિઞ્ચિંસુ, ‘‘ત્વં નો રાજાસિ ઇસ્સરો’’તિ.

તચ્છસૂકરજાતકં નવમં.