૪૯૧. મહામોરજાતકં (૮)

૧૪૩. સચે હિ ત્યાહં ધનહેતુ ગાહિતો, મા મં વધી જીવગાહં ગહેત્વા;

રઞ્ઞો ચ [રઞ્ઞોવ (સી. પી.)] મં સમ્મ ઉપન્તિકં [ઉપન્તિ (સી. સ્યા. પી.)] નેહિ, મઞ્ઞે ધનં લચ્છસિનપ્પરૂપં.

૧૪૪. ન મે અયં તુય્હ વધાય અજ્જ, સમાહિતો ચાપધુરે [ચાપવરે (સી. પી.), ચાપવરો (સ્યા.)] ખુરપ્પો;

પાસઞ્ચ ત્યાહં અધિપાતયિસ્સં, યથાસુખં ગચ્છતુ મોરરાજા.

૧૪૫. યં સત્ત વસ્સાનિ મમાનુબન્ધિ, રત્તિન્દિવં ખુપ્પિપાસં સહન્તો;

અથ કિસ્સ મં પાસવસૂપનીતં, પમુત્તવે ઇચ્છસિ બન્ધનસ્મા.

૧૪૬. પાણાતિપાતા વિરતો નુસજ્જ, અભયં નુ તે સબ્બભૂતેસુ દિન્નં;

યં મં તુવં પાસવસૂપનીતં, પમુત્તવે ઇચ્છસિ બન્ધનસ્મા.

૧૪૭. પાણાતિપાતા વિરતસ્સ બ્રૂહિ, અભયઞ્ચ યો સબ્બભૂતેસુ દેતિ;

પુચ્છામિ તં મોરરાજેતમત્થં, ઇતો ચુતો કિં લભતે સુખં સો.

૧૪૮. પાણાતિપાતા વિરતસ્સ બ્રૂમિ, અભયઞ્ચ યો સબ્બભૂતેસુ દેતિ;

દિટ્ઠેવ ધમ્મે લભતે પસંસં, સગ્ગઞ્ચ સો યાતિ સરીરભેદા.

૧૪૯. ન સન્તિ દેવા ઇતિ આહુ [ઇચ્ચાહુ (સી. પી.)] એકે, ઇધેવ જીવો વિભવં ઉપેતિ;

તથા ફલં સુકતદુક્કટાનં, દત્તુપઞ્ઞત્તઞ્ચ વદન્તિ દાનં;

તેસં વચો અરહતં સદ્દહાનો, તસ્મા અહં સકુણે બાધયામિ.

૧૫૦. ચન્દો ચ સુરિયો ચ ઉભો સુદસ્સના, ગચ્છન્તિ ઓભાસયમન્તલિક્ખે;

ઇમસ્સ લોકસ્સ પરસ્સ વા તે, કથં નુ તે આહુ મનુસ્સલોકે.

૧૫૧. ચન્દો ચ સુરિયો ચ ઉભો સુદસ્સના, ગચ્છન્તિ ઓભાસયમન્તલિક્ખે;

પરસ્સ લોકસ્સ ન તે ઇમસ્સ, દેવાતિ તે આહુ મનુસ્સલોકે.

૧૫૨. એત્થેવ તે નીહતા હીનવાદા, અહેતુકા યે ન વદન્તિ કમ્મં;

તથા ફલં સુકતદુક્કટાનં, દત્તુપઞ્ઞત્તં યે ચ વદન્તિ દાનં.

૧૫૩. અદ્ધા હિ સચ્ચં વચનં તવેદં [તવેતં (સી. સ્યા. પી.)], કથઞ્હિ દાનં અફલં ભવેય્ય [વદેય્ય (સી. પી.)];

તથા ફલં સુકતદુક્કટાનં, દત્તુપઞ્ઞત્તઞ્ચ કથં ભવેય્ય.

૧૫૪. કથંકરો કિન્તિકરો કિમાચરં, કિં સેવમાનો કેન તપોગુણેન;

અક્ખાહિ [અક્ખાહિ તં દાનિ (ક.)] મે મોરરાજેતમત્થં, યથા અહં નો નિરયં પતેય્યં.

૧૫૫. યે કેચિ અત્થિ સમણા પથબ્યા, કાસાયવત્થા અનગારિયા તે;

પાતોવ પિણ્ડાય ચરન્તિ કાલે, વિકાલચરિયા વિરતા હિ સન્તો.

૧૫૬. તે તત્થ કાલેનુપસઙ્કમિત્વા, પુચ્છાહિ યં તે મનસો પિયં સિયા;

તે તે પવક્ખન્તિ યથાપજાનં, ઇમસ્સ લોકસ્સ પરસ્સ ચત્થં.

૧૫૭. તચંવ જિણ્ણં ઉરગો પુરાણં, પણ્ડૂપલાસં હરિતો દુમોવ;

એસપ્પહીનો મમ લુદ્દભાવો, જહામહં લુદ્દકભાવમજ્જ.

૧૫૮. યે ચાપિ મે સકુણા અત્થિ બદ્ધા, સતાનિનેકાનિ નિવેસનસ્મિં;

તેસમ્પહં [તેસં અહં (સ્યા. ક.)] જીવિતમજ્જ દમ્મિ, મોક્ખઞ્ચ તે પત્તા [પત્તો (સી.), અચ્છ (સ્યા.)] સકં નિકેતં.

૧૫૯. લુદ્દો ચરી પાસહત્થો અરઞ્ઞે, બાધેતુ મોરાધિપતિં યસસ્સિં;

બન્ધિત્વા [બન્ધિત્વ (સી. પી.)] મોરાધિપતિં યસસ્સિં, દુક્ખા સ પમુચ્ચિ [દુક્ખા પમુચ્ચિ (સી.), દુક્ખા પમુઞ્ચિ (સ્યા. પી.)] યથાહં પમુત્તોતિ.

મહામોરજાતકં અટ્ઠમં.