૪૯૦. પઞ્ચુપોસથિકજાતકં (૭)

૧૨૭. અપ્પોસ્સુક્કો દાનિ તુવં કપોત, વિહઙ્ગમ ન તવ ભોજનત્થો;

ખુદં [ખુદ્દં (સ્યા. ક.), ખુધં (સક્કત-પાકતાનુરૂપં)] પિપાસં અધિવાસયન્તો, કસ્મા ભવંપોસથિકો કપોત [કપોતો (સી. પી.)].

૧૨૮. અહં પુરે ગિદ્ધિગતો કપોતિયા, અસ્મિં પદેસસ્મિમુભો રમામ;

અથગ્ગહી સાકુણિકો કપોતિં, અકામકો તાય વિના અહોસિં.

૧૨૯. નાનાભવા વિપ્પયોગેન તસ્સા, મનોમયં વેદન વેદયામિ [વેદનં વેદિયામિ (સી. પી.)];

તસ્મા અહંપોસથં પાલયામિ, રાગો મમં મા પુનરાગમાસિ.

૧૩૦. અનુજ્જુગામી ઉરગા દુજિવ્હ [ઉરગ દ્વિજિવ્હ (સી.)], દાઠાવુધો ઘોરવિસોસિ સપ્પ;

ખુદં પિપાસં અધિવાસયન્તો, કસ્મા ભવંપોસથિકો નુ દીઘ [દીઘો (સી. પી.)].

૧૩૧. ઉસભો અહૂ બલવા ગામિકસ્સ, ચલક્કકૂ વણ્ણબલૂપપન્નો;

સો મં અક્કમિ તં કુપિતો અડંસિ, દુક્ખાભિતુણ્ણો મરણં ઉપાગા [ઉપાગમિ (સી. પી.)].

૧૩૨. તતો જના નિક્ખમિત્વાન ગામા, કન્દિત્વા રોદિત્વા [કન્દિત્વ રોદિત્વ (સી.)] અપક્કમિંસુ;

તસ્મા અહંપોસથં પાલયામિ, કોધો મમં મા પુનરાગમાસિ.

૧૩૩. મતાન મંસાનિ બહૂ સુસાને, મનુઞ્ઞરૂપં તવ ભોજને તં;

ખુદં પિપાસં અધિવાસયન્તો, કસ્મા ભવંપોસથિકો સિઙ્ગાલ [સિગાલો (સી. પી.)].

૧૩૪. પવિસિ [પવિસ્સં (સી. પી.), પવિસ્સ (સ્યા.)] કુચ્છિં મહતો ગજસ્સ, કુણપે રતો હત્થિમંસેસુ ગિદ્ધો [હત્થિમંસે પગિદ્ધો (સી. પી.)];

ઉણ્હો ચ વાતો તિખિણા ચ રસ્મિયો, તે સોસયું તસ્સ કરીસમગ્ગં.

૧૩૫. કિસો ચ પણ્ડૂ ચ અહં ભદન્તે, ન મે અહૂ નિક્ખમનાય મગ્ગો;

મહા ચ મેઘો સહસા પવસ્સિ, સો તેમયી તસ્સ કરીસમગ્ગં.

૧૩૬. તતો અહં નિક્ખમિસં ભદન્તે, ચન્દો યથા રાહુમુખા પમુત્તો;

તસ્મા અહંપોસથં પાલયામિ, લોભો મમં મા પુનરાગમાસિ.

૧૩૭. વમ્મીકથૂપસ્મિં કિપિલ્લિકાનિ, નિપ્પોથયન્તો તુવં પુરે ચરાસિ;

ખુદં પિપાસં અધિવાસયન્તો, કસ્મા ભવંપોસથિકો નુ અચ્છ [અચ્છો (સી. પી.)].

૧૩૮. સકં નિકેતં અતિહીળયાનો [અતિહેળયાનો (સ્યા. ક.)], અત્રિચ્છતા [અત્રિચ્છતાય (સી. સ્યા. પી.)] મલ્લગામં [મલતં (સી. પી.), મલ્લયતં (ક.)] અગચ્છિં;

તતો જના નિક્ખમિત્વાન ગામા, કોદણ્ડકેન પરિપોથયિંસુ મં.

૧૩૯. સો ભિન્નસીસો રુહિરમક્ખિતઙ્ગો, પચ્ચાગમાસિં સકં [સ સકં (સ્યા. ક.),’થ સકં (?)] નિકેતં;

તસ્મા અહંપોસથં પાલયામિ, અત્રિચ્છતા મા પુનરાગમાસિ.

૧૪૦. યં નો અપુચ્છિત્થ તુવં ભદન્તે, સબ્બેવ બ્યાકરિમ્હ યથા પજાનં;

મયમ્પિ પુચ્છામ તુવં ભદન્તે, કસ્મા ભવંપોસથિકો નુ બ્રહ્મે.

૧૪૧. અનૂપલિત્તો મમ અસ્સમમ્હિ, પચ્ચેકબુદ્ધો મુહુત્તં નિસીદિ;

સો મં અવેદી ગતિમાગતિઞ્ચ, નામઞ્ચ ગોત્તં ચરણઞ્ચ સબ્બં.

૧૪૨. એવમ્પહં વન્દિ ન [એવમ્પહં નગ્ગહે (સી. પી.)] તસ્સ પાદે, ન ચાપિ નં માનગતેન પુચ્છિં;

તસ્મા અહંપોસથં પાલયામિ, માનો મમં મા પુનરાગમાસીતિ.

પઞ્ચુપોસથિકજાતકં સત્તમં.