૪૮૯. સુરુચિજાતકં (૬)

૧૦૨. મહેસી સુરુચિનો [રુચિનો (સી. સ્યા. પી.)] ભરિયા, આનીતા પઠમં અહં;

દસ વસ્સસહસ્સાનિ, યં મં સુરુચિમાનયિ.

૧૦૩. સાહં બ્રાહ્મણ રાજાનં, વેદેહં મિથિલગ્ગહં;

નાભિજાનામિ કાયેન, વાચાય ઉદ ચેતસા;

સુરુચિં અતિમઞ્ઞિત્થ [અતિમઞ્ઞિત્થો (સી. પી.), અતિમઞ્ઞિતા (?)], આવિ [આવિં (સી. પી.)] વા યદિ વા રહો.

૧૦૪. એતેન સચ્ચવજ્જેન, પુત્તો ઉપ્પજ્જતં ઇસે;

મુસા મે ભણમાનાય, મુદ્ધા ફલતુ સત્તધા.

૧૦૫. ભત્તુ મમ સસ્સુ માતા, પિતા ચાપિ ચ સસ્સુરો;

તે મં બ્રહ્મે વિનેતારો, યાવ અટ્ઠંસુ જીવિતં.

૧૦૬. સાહં અહિંસારતિની, કામસા [કામસો (સી.)] ધમ્મચારિની [ધમ્મચારિણી (સી.)];

સક્કચ્ચં તે ઉપટ્ઠાસિં, રત્તિન્દિવમતન્દિતા.

૧૦૭. એતેન સચ્ચવજ્જેન, પુત્તો ઉપ્પજ્જતં ઇસે;

મુસા મે ભણમાનાય, મુદ્ધા ફલતુ સત્તધા.

૧૦૮. સોળસિત્થિસહસ્સાનિ, સહભરિયાનિ બ્રાહ્મણ;

તાસુ ઇસ્સા વા કોધો વા, નાહુ મય્હં કુદાચનં.

૧૦૯. હિતેન તાસં નન્દામિ, ન ચ મે કાચિ અપ્પિયા;

અત્તાનંવાનુકમ્પામિ, સદા સબ્બા સપત્તિયો.

૧૧૦. એતેન સચ્ચવજ્જેન, પુત્તો ઉપ્પજ્જતં ઇસે;

મુસા મે ભણમાનાય, મુદ્ધા ફલતુ સત્તધા.

૧૧૧. દાસે કમ્મકરે પેસ્સે [પોસે (સ્યા. ક.)], યે ચઞ્ઞે અનુજીવિનો;

પેસેમિ [પોસેમિ (સી. સ્યા. પી.)] સહધમ્મેન, સદા પમુદિતિન્દ્રિયા.

૧૧૨. એતેન સચ્ચવજ્જેન, પુત્તો ઉપ્પજ્જતં ઇસે;

મુસા મે ભણમાનાય, મુદ્ધા ફલતુ સત્તધા.

૧૧૩. સમણે બ્રાહ્મણે ચાપિ, અઞ્ઞે ચાપિ વનિબ્બકે;

તપ્પેમિ અન્નપાનેન, સદા પયતપાણિની.

૧૧૪. એતેન સચ્ચવજ્જેન, પુત્તો ઉપ્પજ્જતં ઇસે;

મુસા મે ભણમાનાય, મુદ્ધા ફલતુ સત્તધા.

૧૧૫. ચાતુદ્દસિં પઞ્ચદ્દસિં [પન્નરસિં (સી. પી.)], યા ચ પક્ખસ્સ અટ્ઠમી [અટ્ઠમિં (સી. પી.)];

પાટિહારિયપક્ખઞ્ચ, અટ્ઠઙ્ગસુસમાગતં [અટ્ઠઙ્ગસુસમાહિતં (સબ્બત્થ) વિ. વ. ૧૨૯ પાળિયા અટ્ઠકથા પસ્સિતબ્બા];

ઉપોસથં ઉપવસામિ [ઉપવસિં (ક.)], સદા સીલેસુ સંવુતા.

૧૧૬. એતેન સચ્ચવજ્જેન, પુત્તો ઉપ્પજ્જતં ઇસે;

મુસા મે ભણમાનાય, મુદ્ધા ફલતુ સત્તધા.

૧૧૭. સબ્બેવ તે ધમ્મગુણા, રાજપુત્તિ યસસ્સિનિ;

સંવિજ્જન્તિ તયિ ભદ્દે, યે ત્વં કિત્તેસિ અત્તનિ.

૧૧૮. ખત્તિયો જાતિસમ્પન્નો, અભિજાતો યસસ્સિમા;

ધમ્મરાજા વિદેહાનં, પુત્તો ઉપ્પજ્જતે તવ [તવં (સી. પી.)].

૧૧૯. દુમ્મી [રુમ્મી (સી. પી.)] રજોજલ્લધરો, અઘે વેહાયસં ઠિતો;

મનુઞ્ઞં ભાસસે વાચં, યં મય્હં હદયઙ્ગમં.

૧૨૦. દેવતાનુસિ સગ્ગમ્હા, ઇસિ વાસિ [ચાપિ (ક.)] મહિદ્ધિકો;

કો વાસિ ત્વં અનુપ્પત્તો, અત્તાનં મે પવેદય.

૧૨૧. યં દેવસઙ્ઘા વન્દન્તિ, સુધમ્માયં સમાગતા;

સોહં સક્કો સહસ્સક્ખો, આગતોસ્મિ તવન્તિકે.

૧૨૨. ઇત્થિયો [ઇત્થિયા (પી.)] જીવલોકસ્મિં, યા હોતિ [હોન્તિ (સી. સ્યા.)] સમચારિની [સમચારિણી (સી.)];

મેધાવિની સીલવતી, સસ્સુદેવા પતિબ્બતા.

૧૨૩. તાદિસાય સુમેધાય, સુચિકમ્માય નારિયા;

દેવા દસ્સનમાયન્તિ, માનુસિયા અમાનુસા.

૧૨૪. ત્વઞ્ચ ભદ્દે સુચિણ્ણેન, પુબ્બે સુચરિતેન ચ;

ઇધ રાજકુલે જાતા, સબ્બકામસમિદ્ધિની.

૧૨૫. અયઞ્ચ તે રાજપુત્તિ, ઉભયત્થ કટગ્ગહો;

દેવલોકૂપપત્તી ચ, કિત્તી ચ ઇધ જીવિતે.

૧૨૬. ચિરં સુમેધે સુખિની, ધમ્મમત્તનિ પાલય;

એસાહં તિદિવં યામિ, પિયં મે તવ દસ્સનન્તિ.

સુરુચિજાતકં છટ્ઠં.