૪૮૮. ભિસજાતકં (૫)

૭૮. અસ્સં ગવં રજતં જાતરૂપં, ભરિયઞ્ચ સો ઇધ લભતં મનાપં;

પુત્તેહિ દારેહિ સમઙ્ગિ હોતુ, ભિસાનિ તે બ્રાહ્મણ યો અહાસિ.

૭૯. માલઞ્ચ સો કાસિકચન્દનઞ્ચ, ધારેતુ પુત્તસ્સ બહૂ ભવન્તુ;

કામેસુ તિબ્બં કુરુતં અપેક્ખં, ભિસાનિ તે બ્રાહ્મણ યો અહાસિ.

૮૦. પહૂતધઞ્ઞો કસિમા યસસ્સી, પુત્તે ગિહી ધનિમા સબ્બકામે;

વયં અપસ્સં ઘરમાવસાતુ, ભિસાનિ તે બ્રાહ્મણ યો અહાસિ.

૮૧. સો ખત્તિયો હોતુ પસય્હકારી, રાજાભિરાજા [રાજાધિરાજા (સ્યા. ક.)] બલવા યસસ્સી;

સ ચાતુરન્તં મહિમાવસાતુ, ભિસાનિ તે બ્રાહ્મણ યો અહાસિ.

૮૨. સો બ્રાહ્મણો હોતુ અવીતરાગો, મુહુત્તનક્ખત્તપથેસુ યુત્તો;

પૂજેતુ નં રટ્ઠપતી યસસ્સી, ભિસાનિ તે બ્રાહ્મણ યો અહાસિ.

૮૩. અજ્ઝાયકં સબ્બસમન્તવેદં [સબ્બસમત્તવેદં (સી.), સબ્બસમત્તવેદનં (પી.)], તપસ્સીનં મઞ્ઞતુ સબ્બલોકો;

પૂજેન્તુ નં જાનપદા સમેચ્ચ, ભિસાનિ તે બ્રાહ્મણ યો અહાસિ.

૮૪. ચતુસ્સદં ગામવરં સમિદ્ધં, દિન્નઞ્હિ સો ભુઞ્જતુ વાસવેન;

અવીતરાગો મરણં ઉપેતુ, ભિસાનિ તે બ્રાહ્મણ યો અહાસિ.

૮૫. સો ગામણી હોતુ સહાયમજ્ઝે, નચ્ચેહિ ગીતેહિ પમોદમાનો;

સો રાજતો બ્યસન માલત્થ [મા રાજતો વ્યસન’મલત્થ (સી. સ્યા. પી.)] કિઞ્ચિ, ભિસાનિ તે બ્રાહ્મણ યો અહાસિ.

૮૬. યં એકરાજા પથવિં વિજેત્વા, ઇત્થીસહસ્સાન [ઇત્થીસહસ્સસ્સ (સી. પી.)] ઠપેતુ અગ્ગં;

સીમન્તિનીનં પવરા ભવાતુ, ભિસાનિ તે બ્રાહ્મણ યા અહાસિ.

૮૭. ઇસીનઞ્હિ સા સબ્બસમાગતાનં, ભુઞ્જેય્ય સાદું અવિકમ્પમાના;

ચરાતુ લાભેન વિકત્થમાના, ભિસાનિ તે બ્રાહ્મણ યા અહાસિ.

૮૮. આવાસિકો હોતુ મહાવિહારે, નવકમ્મિકો હોતુ ગજઙ્ગલાયં [કજઙ્ગલાયં (સી. સ્યા. પી.)];

આલોકસન્ધિં દિવસં [દિવસા (સી. સ્યા. પી.)] કરોતુ, ભિસાનિ તે બ્રાહ્મણ યો અહાસિ.

૮૯. સો બજ્ઝતૂ પાસસતેહિ છબ્ભિ [છમ્હિ (સી. પી.), છસ્સુ (?)], રમ્મા વના નિય્યતુ રાજધાનિં [રાજઠાનિં (ક.)];

તુત્તેહિ સો હઞ્ઞતુ પાચનેહિ, ભિસાનિ તે બ્રાહ્મણ યો અહાસિ.

૯૦. અલક્કમાલી તિપુકણ્ણવિદ્ધો, લટ્ઠીહતો સપ્પમુખં ઉપેતુ;

સકચ્છબન્ધો [સક્કચ્ચબદ્ધો (સી. પી.), સંકચ્ચબન્ધો (નિય્ય)] વિસિખં ચરાતુ, ભિસાનિ તે બ્રાહ્મણ યો અહાસિ.

૯૧. યો વે અનટ્ઠંવ [અનટ્ઠં (સી. સ્યા. પી.)] નટ્ઠન્તિ ચાહ, કામેવ સો લભતં ભુઞ્જતઞ્ચ [લભતુ ભુઞ્જતુ ચ (સ્યા.)];

અગારમજ્ઝે મરણં ઉપેતુ, યો વા ભોન્તો સઙ્કતિ કઞ્ચિદેવ [કિઞ્ચિદેવ (ક.)].

૯૨. યદેસમાના વિચરન્તિ લોકે, ઇટ્ઠઞ્ચ કન્તઞ્ચ બહૂનમેતં;

પિયં મનુઞ્ઞં ચિધ જીવલોકે, કસ્મા ઇસયો નપ્પસંસન્તિ કામે.

૯૩. કામેસુ વે હઞ્ઞરે બજ્ઝરે ચ, કામેસુ દુક્ખઞ્ચ ભયઞ્ચ જાતં;

કામેસુ ભૂતાધિપતી પમત્તા, પાપાનિ કમ્માનિ કરોન્તિ મોહા.

૯૪. તે પાપધમ્મા પસવેત્વ પાપં, કાયસ્સ ભેદા નિરયં વજન્તિ;

આદીનવં કામગુણેસુ દિસ્વા, તસ્મા ઇસયો નપ્પસંસન્તિ કામે.

૯૫. વીમંસમાનો ઇસિનો ભિસાનિ, તીરે ગહેત્વાન થલે નિધેસિં;

સુદ્ધા અપાપા ઇસયો વસન્તિ, એતાનિ તે બ્રહ્મચારી ભિસાનિ.

૯૬. ન તે નટા નો પન કીળનેય્યા, ન બન્ધવા નો પન તે સહાયા;

કિસ્મિં વુપત્થમ્ભ સહસ્સનેત્ત, ઇસીહિ ત્વં કીળસિ દેવરાજ.

૯૭. આચરિયો મેસિ પિતા ચ મય્હં, એસા પતિટ્ઠા ખલિતસ્સ બ્રહ્મે;

એકાપરાધં ખમ ભૂરિપઞ્ઞ, ન પણ્ડિતા કોધબલા ભવન્તિ.

૯૮. સુવાસિતં ઇસિનં એકરત્તં, યં વાસવં ભૂતપતિદ્દસામ;

સબ્બેવ ભોન્તો સુમના ભવન્તુ, યં બ્રાહ્મણો પચ્ચુપાદી ભિસાનિ.

૯૯. અહઞ્ચ સારિપુત્તો ચ, મોગ્ગલ્લાનો ચ કસ્સપો;

અનુરુદ્ધો પુણ્ણો આનન્દો, તદાસું સત્ત ભાતરો.

૧૦૦. ભગિની ઉપ્પલવણ્ણા ચ, દાસી ખુજ્જુત્તરા તદા;

ચિત્તો ગહપતિ દાસો, યક્ખો સાતાગિરો તદા.

૧૦૧. પાલિલેય્યો [પારિલેય્યો (સી. પી.)] તદા નાગો, મધુદો [મધુવા (સી. પી.)] સેટ્ઠવાનરો;

કાળુદાયી તદા સક્કો, એવં ધારેથ જાતકન્તિ.

ભિસજાતકં પઞ્ચમં.