૪૮૭. ઉદ્દાલકજાતકં (૪)

૬૨. ખરાજિના જટિલા પઙ્કદન્તા, દુમ્મક્ખરૂપા [દુમ્મુધરૂપા (સી. પી. ક.)] યે મન્તં જપ્પન્તિ [યેમે જપન્તિ (સી. પી.), યે’મે જપ્પન્તિ મન્તે (જા. ૧.૬.૧૦)];

કચ્ચિન્નુ તે માનુસકે પયોગે, ઇદં વિદૂ પરિમુત્તા અપાયા.

૬૩. પાપાનિ કમ્માનિ કરેથ [કરેય્ય (સ્યા.), કત્વાન (જા. ૧.૬.૧૧)] રાજ, બહુસ્સુતો ચે ન ચરેય્ય ધમ્મં;

સહસ્સવેદોપિ ન તં પટિચ્ચ, દુક્ખા પમુચ્ચે [પમુઞ્ચે (સ્યા.)] ચરણં અપત્વા.

૬૪. સહસ્સવેદોપિ ન તં પટિચ્ચ, દુક્ખા પમુચ્ચે ચરણં અપત્વા;

મઞ્ઞામિ વેદા અફલા ભવન્તિ, સસંયમં ચરણઞ્ઞેવ સચ્ચં.

૬૫. ન હેવ વેદા અફલા ભવન્તિ, સસંયમં ચરણઞ્ઞેવ સચ્ચં;

કિત્તિઞ્હિ [કિત્તિઞ્ચ (સ્યા.)] પપ્પોતિ અધિચ્ચ વેદે, સન્તિં પુણાતિ [પુનોતિ (સી. અટ્ઠ.), પુણેતિ (સ્યા. જા. ૧.૬.૧૩), પુનેતિ (પી.)] ચરણેન દન્તો.

૬૬. ભચ્ચા માતા પિતા બન્ધૂ, યેન જાતો સયેવ સો;

ઉદ્દાલકો અહં ભોતો [ભોતિ (ક.)], સોત્તિયાકુલવંસકો [વંસતો (ક.)].

૬૭. કથં ભો બ્રાહ્મણો હોતિ, કથં ભવતિ કેવલી;

કથઞ્ચ પરિનિબ્બાનં, ધમ્મટ્ઠો કિન્તિ વુચ્ચતિ.

૬૮. નિરંકત્વા અગ્ગિમાદાય બ્રાહ્મણો, આપો સિઞ્ચં યજં ઉસ્સેતિ યૂપં;

એવંકરો બ્રાહ્મણો હોતિ ખેમી, ધમ્મે ઠિતં તેન અમાપયિંસુ.

૬૯. ન સુદ્ધિ સેચનેનત્થિ, નાપિ કેવલી બ્રાહ્મણો;

ન ખન્તી નાપિ સોરચ્ચં, નાપિ સો પરિનિબ્બુતો.

૭૦. કથં સો [ભો (સ્યા. ક.)] બ્રાહ્મણો હોતિ, કથં ભવતિ કેવલી;

કથઞ્ચ પરિનિબ્બાનં, ધમ્મટ્ઠો કિન્તિ વુચ્ચતિ.

૭૧. અખેત્તબન્ધૂ અમમો નિરાસો, નિલ્લોભપાપો ભવલોભખીણો;

એવંકરો બ્રાહ્મણો હોતિ ખેમી, ધમ્મે ઠિતં તેન અમાપયિંસુ.

૭૨. ખત્તિયા બ્રાહ્મણા વેસ્સા, સુદ્દા ચણ્ડાલપુક્કુસા;

સબ્બેવ સોરતા દન્તા, સબ્બેવ પરિનિબ્બુતા;

સબ્બેસં સીતિભૂતાનં, અત્થિ સેય્યોથ [સેય્યોવ (સી. પી.)] પાપિયો.

૭૩. ખત્તિયા બ્રાહ્મણા વેસ્સા, સુદ્દા ચણ્ડાલપુક્કુસા;

સબ્બેવ સોરતા દન્તા, સબ્બેવ પરિનિબ્બુતા;

સબ્બેસં સીતિભૂતાનં, નત્થિ સેય્યોથ પાપિયો.

૭૪. ખત્તિયા બ્રાહ્મણા વેસ્સા, સુદ્દા ચણ્ડાલપુક્કુસા;

સબ્બેવ સોરતા દન્તા, સબ્બેવ પરિનિબ્બુતા.

૭૫. સબ્બેસં સીતિભૂતાનં, નત્થિ સેય્યોથ પાપિયો;

પનત્થં [પસત્થં (સ્યા.), પસટ્ઠં (ક.)] ચરસિ બ્રહ્મઞ્ઞં, સોત્તિયાકુલવંસતં.

૭૬. નાનારત્તેહિ વત્થેહિ, વિમાનં ભવતિ છાદિતં;

ન તેસં છાયા વત્થાનં, સો રાગો અનુપજ્જથ.

૭૭. એવમેવ [એવમેવં (પી.)] મનુસ્સેસુ, યદા સુજ્ઝન્તિ માણવા;

તે સજાતિં પમુઞ્ચન્તિ [ન તેસં જાતિં પુચ્છન્તિ (સી. સ્યા. પી.), ન તેસં જાતિ સુજ્ઝતિ (ક.)], ધમ્મમઞ્ઞાય સુબ્બતાતિ.

ઉદ્દાલકજાતકં ચતુત્થં.