૪૮૬. મહાઉક્કુસજાતકં (૩)

૪૪. ઉક્કા ચિલાચા [મિલાચા (સી. સ્યા. પી.)] બન્ધન્તિ દીપે [બન્ધન્તિ લુદ્દા, દીપે (ક.)], પજા મમં ખાદિતું પત્થયન્તિ;

મિત્તં સહાયઞ્ચ વદેહિ સેનક, આચિક્ખ ઞાતિબ્યસનં દિજાનં.

૪૫. દિજો દિજાનં પવરોસિ પક્ખિમ [પક્ખિ (સી. પી.), પક્ખિ ચ (સ્યા.)], ઉક્કુસરાજ સરણં તં ઉપેમ [ઉપેમિ (સી. સ્યા. પી.)];

પજા મમં ખાદિતું પત્થયન્તિ, લુદ્દા ચિલાચા [મિલાચા (સી. સ્યા. પી.)] ભવ મે સુખાય.

૪૬. મિત્તં સહાયઞ્ચ કરોન્તિ પણ્ડિતા, કાલે અકાલે સુખમેસમાના [માસયાના (પી.)];

કરોમિ તે સેનક એતમત્થં, અરિયો હિ અરિયસ્સ કરોતિ કિચ્ચં.

૪૭. યં હોતિ કિચ્ચં અનુકમ્પકેન, અરિયસ્સ અરિયેન કતં તયીદં [તવ યિદં (સી. પી.)];

અત્તાનુરક્ખી ભવ મા અદય્હિ [અડય્હ (સી. પી.)], લચ્છામ પુત્તે તયિ જીવમાને.

૪૮. તવેવ [તમેવ (સ્યા. ક.)] રક્ખાવરણં કરોન્તો, સરીરભેદાપિ ન સન્તસામિ;

કરોન્તિ હેકે [હેતે (ક. સી. સ્યા. પી.)] સખીનં સખારો, પાણં ચજન્તા [ચજન્તિ (સી. પી.)] સતમેસ [સતાનેસ (પી.)] ધમ્મો.

૪૯. સુદુક્કરં કમ્મમકાસિ [મકા (સી. પી.)], અણ્ડજાયં વિહઙ્ગમો;

અત્થાય કુરરો પુત્તે, અડ્ઢરત્તે અનાગતે.

૫૦. ચુતાપિ હેકે [એકે (સી. પી.)] ખલિતા સકમ્મુના, મિત્તાનુકમ્પાય પતિટ્ઠહન્તિ;

પુત્તા મમટ્ટા ગતિમાગતોસ્મિ, અત્થં ચરેથો [ચરેથ (સી. સ્યા. પી.)] મમ વારિચર [વારિછન્ન (સી. પી.)].

૫૧. ધનેન ધઞ્ઞેન ચ અત્તના ચ, મિત્તં સહાયઞ્ચ કરોન્તિ પણ્ડિતા;

કરોમિ તે સેનક એતમત્થં, અરિયો હિ અરિયસ્સ કરોતિ કિચ્ચં.

૫૨. અપ્પોસ્સુક્કો તાત તુવં નિસીદ, પુત્તો પિતુ ચરતિ અત્થચરિયં;

અહં ચરિસ્સામિ તવેતમત્થં, સેનસ્સ પુત્તે પરિતાયમાનો.

૫૩. અદ્ધા હિ તાત સતમેસ ધમ્મો, પુત્તો પિતુ યં ચરે [પિતુનં ચરે (ક.), પિતુ યઞ્ચરેથ (સી. પી.)] અત્થચરિયં;

અપ્પેવ મં દિસ્વાન પવડ્ઢકાયં, સેનસ્સ પુત્તા ન વિહેઠયેય્યું.

૫૪. પસૂ મનુસ્સા મિગવીરસેટ્ઠ [મિગવિરિયસેટ્ઠ (સી. પી.)], ભયટ્ટિતા [ભયદ્દિતા (સી. પી.)] સેટ્ઠમુપબ્બજન્તિ;

પુત્તા મમટ્ટા ગતિમાગતોસ્મિ, ત્વં નોસિ રાજા ભવ મે સુખાય.

૫૫. કરોમિ તે સેનક એતમત્થં, આયામિ તે તં દિસતં વધાય;

કથઞ્હિ વિઞ્ઞૂ પહુ સમ્પજાનો, ન વાયમે અત્તજનસ્સ ગુત્તિયા.

૫૬. મિત્તઞ્ચ કયિરાથ સુહદયઞ્ચ [સુહદ્દયઞ્ચ (સી.), સખાઘરઞ્ચ (પી.)], અયિરઞ્ચ કયિરાથ સુખાગમાય;

નિવત્થકોચોવ [કોજોવ (સી. પી.)] સરેભિહન્ત્વા, મોદામ પુત્તેહિ સમઙ્ગિભૂતા.

૫૭. સકમિત્તસ્સ કમ્મેન, સહાયસ્સાપલાયિનો;

કૂજન્તમુપકૂજન્તિ, લોમસા હદયઙ્ગમં.

૫૮. મિત્તં સહાયં અધિગમ્મ પણ્ડિતો, સો ભુઞ્જતી પુત્ત પસું ધનં વા;

અહઞ્ચ પુત્તા ચ પતી ચ મય્હં, મિત્તાનુકમ્પાય સમઙ્ગિભૂતા.

૫૯. રાજવતા સૂરવતા ચ અત્થો, સમ્પન્નસખિસ્સ ભવન્તિ હેતે;

સો મિત્તવા યસવા ઉગ્ગતત્તો, અસ્મિંધલોકે [અસ્મિઞ્ચ લોકે (સી. સ્યા. પી.)] મોદતિ કામકામી.

૬૦. કરણીયાનિ મિત્તાનિ, દલિદ્દેનાપિ સેનક;

પસ્સ મિત્તાનુકમ્પાય, સમગ્ગમ્હા સઞાતકે [સઞાતકા (?)].

૬૧. સૂરેન બલવન્તેન, યો મિત્તે [મેત્તે (સી.), મિત્તં (સ્યા.)] કુરુતે દિજો;

એવં સો સુખિતો હોતિ, યથાહં ત્વઞ્ચ સેનકાતિ.

મહાઉક્કુસજાતકં તતિયં.