૪૮૪. સાલિકેદારજાતકં (૧)

૧. સમ્પન્નં સાલિકેદારં, સુવા ભુઞ્જન્તિ કોસિય;

પટિવેદેમિ તે બ્રહ્મે, ન ને [તે (સી. સ્યા.), નં (સી. સ્યા. પી. અટ્ઠ.), તં (ક. અટ્ઠ.)] વારેતુમુસ્સહે.

૨. એકો ચ તત્થ સકુણો, યો નેસં [તેસં (સી. અટ્ઠ.)] સબ્બસુન્દરો;

ભુત્વા સાલિં યથાકામં, તુણ્ડેનાદાય ગચ્છતિ.

૩. ઓડ્ડેન્તુ [ઉજ્ઝુન્તુ (સ્યા. ક.) અઙ્ગુત્તરનિકાયે પસ્સિતબ્બં] વાળપાસાનિ, યથા વજ્ઝેથ સો દિજો;

જીવઞ્ચ નં ગહેત્વાન, આનયેહિ [આનયેથ (સી. પી.)] મમન્તિકે.

૪. એતે ભુત્વા પિવિત્વા ચ [ભુત્વા ચ પિત્વા ચ (પી.)], પક્કમન્તિ વિહઙ્ગમા;

એકો બદ્ધોસ્મિ પાસેન, કિં પાપં પકતં મયા.

૫. ઉદરં નૂન અઞ્ઞેસં, સુવ અચ્ચોદરં તવ;

ભુત્વા સાલિં યથાકામં, તુણ્ડેનાદાય ગચ્છસિ.

૬. કોટ્ઠં નુ તત્થ પૂરેસિ, સુવ વેરં નુ તે મયા;

પુટ્ઠો મે સમ્મ અક્ખાહિ, કુહિં સાલિં નિદાહસિ [નિધીયસિ (પી.)].

૭. ન મે વેરં તયા સદ્ધિં, કોટ્ઠો મય્હં ન વિજ્જતિ;

ઇણં મુઞ્ચામિણં દમ્મિ, સમ્પત્તો કોટસિમ્બલિં;

નિધિમ્પિ તત્થ નિદહામિ, એવં જાનાહિ કોસિય.

૮. કીદિસં તે ઇણદાનં, ઇણમોક્ખો ચ કીદિસો;

નિધિનિધાનમક્ખાહિ, અથ પાસા પમોક્ખસિ.

૯. અજાતપક્ખા તરુણા, પુત્તકા મય્હ કોસિય;

તે મં ભતા ભરિસ્સન્તિ, તસ્મા તેસં ઇણં દદે.

૧૦. માતા પિતા ચ મે વુદ્ધા, જિણ્ણકા ગતયોબ્બના;

તેસં તુણ્ડેન હાતૂન, મુઞ્ચે પુબ્બકતં [પુબ્બે કતં (સી.)] ઇણં.

૧૧. અઞ્ઞેપિ તત્થ સકુણા, ખીણપક્ખા સુદુબ્બલા;

તેસં પુઞ્ઞત્થિકો દમ્મિ, તં નિધિં આહુ પણ્ડિતા.

૧૨. ઈદિસં [એદિસં (સી. પી.)] મે ઇણદાનં, ઇણમોક્ખો ચ ઈદિસો;

નિધિનિધાનમક્ખામિ [નિધિં નિધાનં અક્ખાતં (સી. પી.)], એવં જાનાહિ કોસિય.

૧૩. ભદ્દકો વતયં પક્ખી, દિજો પરમધમ્મિકો;

એકચ્ચેસુ મનુસ્સેસુ, અયં ધમ્મો ન વિજ્જતિ.

૧૪. ભુઞ્જ સાલિં યથાકામં, સહ સબ્બેહિ ઞાતિભિ;

પુનાપિ સુવ પસ્સેમુ, પિયં મે તવ દસ્સનં.

૧૫. ભુત્તઞ્ચ પીતઞ્ચ તવસ્સમમ્હિ [તવસ્સબ્યમ્હિ (ક.)], રત્તિઞ્ચ [રતી ચ (સી. પી.)] નો કોસિય તે સકાસે;

નિક્ખિત્તદણ્ડેસુ દદાહિ દાનં, જિણ્ણે ચ માતાપિતરો ભરસ્સુ.

૧૬. લક્ખી વત મે ઉદપાદિ અજ્જ, યો અદ્દસાસિં પવરં [યોહં અદસ્સં પરમં (સ્યા. ક.)] દિજાનં;

સુવસ્સ સુત્વાન સુભાસિતાનિ, કાહામિ પુઞ્ઞાનિ અનપ્પકાનિ.

૧૭. સો કોસિયો અત્તમનો ઉદગ્ગો, અન્નઞ્ચ પાનઞ્ચભિસઙ્ખરિત્વા [અન્નઞ્ચ પાનં અભિસંહરિત્વા (ક.)];

અન્નેન પાનેન પસન્નચિત્તો, સન્તપ્પયિ સમણબ્રાહ્મણે ચાતિ.

સાલિકેદારજાતકં [કેદારજાતકં (ક.)] પઠમં.