૪૭૯. કાલિઙ્ગબોધિજાતકં (૬)

૬૭. રાજા કાલિઙ્ગો ચક્કવત્તિ, ધમ્મેન પથવિમનુસાસં [મનુસાસિ (સ્યા. ક.)];

અગમા [અગમાસિ (સ્યા. ક.)] બોધિસમીપં, નાગેન મહાનુભાવેન.

૬૮. કાલિઙ્ગો ભારદ્વાજો ચ, રાજાનં કાલિઙ્ગં સમણકોલઞ્ઞં;

ચક્કં વત્તયતો પરિગ્ગહેત્વા [પરિણેત્વા (પી.)], પઞ્જલી ઇદમવોચ.

૬૯. પચ્ચોરોહ મહારાજ, ભૂમિભાગો યથા સમણુગ્ગતો [સમનુગીતો (સી. સ્યા. પી.)];

ઇધ અનધિવરા બુદ્ધા, અભિસમ્બુદ્ધા વિરોચન્તિ.

૭૦. પદક્ખિણતો આવટ્ટા, તિણલતા અસ્મિં ભૂમિભાગસ્મિં;

પથવિયા નાભિયં [પુથુવિયા અયં (સી.), પઠવિયા અયં (સ્યા.), પુથવિયા’યં (પી.)] મણ્ડો, ઇતિ નો સુતં મન્તે મહારાજ [સુતં મહારાજ (સી. સ્યા. પી.)].

૭૧. સાગરપરિયન્તાય, મેદિનિયા સબ્બભૂતધરણિયા;

પથવિયા અયં મણ્ડો, ઓરોહિત્વા નમો કરોહિ.

૭૨. યે તે ભવન્તિ નાગા ચ, અભિજાતા ચ કુઞ્જરા;

એત્તાવતા પદેસં તે, નાગા નેવ મુપયન્તિ.

૭૩. અભિજાતો નાગો [અભિજાતો તે નાગો (સી. પી. અટ્ઠ.)] કામં, પેસેહિ કુઞ્જરં દન્તિં;

એત્તાવતા પદેસો [પદેસો ચ (સ્યા. ક.)], સક્કા [ન સક્કા (સ્યા.)] નાગેન મુપગન્તું.

૭૪. તં સુત્વા રાજા કાલિઙ્ગો, વેય્યઞ્જનિકવચો નિસામેત્વા;

સમ્પેસેસિ નાગં ઞસ્સામ, મયં યથિમસ્સિદં [યથા ઇદં (સી. સ્યા. પી.)] વચનં.

૭૫. સમ્પેસિતો ચ રઞ્ઞા, નાગો કોઞ્ચોવ અભિનદિત્વાન;

પટિસક્કિત્વા [પટિઓસક્કિત્વા (ક.)] નિસીદિ, ગરુંવ ભારં અસહમાનો.

૭૬. કાલિઙ્ગભારદ્વાજો, નાગં ખીણાયુકં વિદિત્વાન;

રાજાનં કાલિઙ્ગં, તરમાનો અજ્ઝભાસિત્થ;

અઞ્ઞં સઙ્કમ નાગં, નાગો ખીણાયુકો મહારાજ.

૭૭. તં સુત્વા કાલિઙ્ગો, તરમાનો સઙ્કમી નાગં;

સઙ્કન્તેવ રઞ્ઞે, નાગો તત્થેવ પતિ [પતિતો (ક.)] ભુમ્યા;

વેય્યઞ્જનિકવચો, યથા તથા અહુ નાગો.

૭૮. કાલિઙ્ગો રાજા કાલિઙ્ગં, બ્રાહ્મણં એતદવોચ;

ત્વમેવ અસિ સમ્બુદ્ધો, સબ્બઞ્ઞૂ સબ્બદસ્સાવી.

૭૯. તં અનધિવાસેન્તો કાલિઙ્ગં [કાલિઙ્ગો (સી. સ્યા. પી.)], બ્રાહ્મણો ઇદમવોચ;

વેય્યઞ્જનિકા હિ મયં, બુદ્ધા સબ્બઞ્ઞુનો મહારાજ.

૮૦. સબ્બઞ્ઞૂ સબ્બવિદૂ ચ, બુદ્ધા ન લક્ખણેન જાનન્તિ;

આગમબલસા [આગમપુરિસા (પી.)] હિ મયં, બુદ્ધા સબ્બં પજાનન્તિ.

૮૧. મહયિત્વા સમ્બોધિં [મહાયિત્વાન સમ્બોધિં (સી. પી.), પહંસિત્વાન સમ્બોધિં (સ્યા.), મમાયિત્વાન તં બોધિં (ક.)], નાનાતુરિયેહિ વજ્જમાનેહિ;

માલાવિલેપનં અભિહરિત્વા [માલાગન્ધવિલેપનં આહરિત્વા (સી. પી.); પાકારપરિક્ખેપં કારેસિ; અથ રાજા પાયાસિ (સી. સ્યા. પી.)] અથ રાજા મનુપાયાસિ [પાકારપરિક્ખેપં કારેસિ; અથ રાજા પાયાસિ (સી. સ્યા. પી.)].

૮૨. સટ્ઠિ વાહસહસ્સાનિ, પુપ્ફાનં સન્નિપાતયિ;

પૂજેસિ રાજા કાલિઙ્ગો, બોધિમણ્ડમનુત્તરન્તિ [વરુત્તમેતિ (સી.)].

કાલિઙ્ગબોધિજાતકં છટ્ઠં.