૪૬૯. મહાકણ્હજાતકં (૬)

૬૧. કણ્હો કણ્હો ચ ઘોરો ચ, સુક્કદાઠો પભાસવા [પતાપવા (સી. સ્યા. પી.)];

બદ્ધો પઞ્ચહિ રજ્જૂહિ, કિં રવિ [ધીર (સી. પી.), વીર (સ્યા.)] સુનખો તવ.

૬૨. નાયં મિગાનમત્થાય, ઉસીનક [ઉસીનર (સી. પી.), ઉસીન્નર (સ્યા.)] ભવિસ્સતિ;

મનુસ્સાનં અનયો હુત્વા, તદા કણ્હો પમોક્ખતિ.

૬૩. પત્તહત્થા સમણકા, મુણ્ડા સઙ્ઘાટિપારુતા;

નઙ્ગલેહિ કસિસ્સન્તિ, તદા કણ્હો પમોક્ખતિ.

૬૪. તપસ્સિનિયો [તપનીયા (ક.) દુતિયન્તપદાનિ હેતાનિ] પબ્બજિતા, મુણ્ડા સઙ્ઘાટિપારુતા;

યદા લોકે ગમિસ્સન્તિ, તદા કણ્હો પમોક્ખતિ.

૬૫. દીઘોત્તરોટ્ઠા જટિલા, પઙ્કદન્તા રજસ્સિરા;

ઇણં ચોદાય [વોદાય (સી. પી.), ચોદય (સ્યા.)] ગચ્છન્તિ, તદા કણ્હો પમોક્ખતિ.

૬૬. અધિચ્ચ વેદે [વેદં (ક.)] સાવિત્તિં, યઞ્ઞતન્તઞ્ચ [તન્ત્રઞ્ચ (સી. સ્યા. પી.)] બ્રાહ્મણા;

ભતિકાય યજિસ્સન્તિ, તદા કણ્હો પમોક્ખતિ.

૬૭. માતરં પિતરઞ્ચાપિ, જિણ્ણકં ગતયોબ્બનં;

પહૂ સન્તો [સન્તા (સી.)] ન ભરન્તિ, તદા કણ્હો પમોક્ખતિ.

૬૮. માતરં પિતરઞ્ચાપિ, જિણ્ણકં ગતયોબ્બનં;

બાલા તુમ્હેતિ વક્ખન્તિ, તદા કણ્હો પમોક્ખતિ.

૬૯. આચરિયભરિયં સખિં [આચરિયભરિયં સખાભરિયં (સી. પી.)], માતુલાનિં પિતુચ્છકિં [પિતુચ્છયં (સી.), પિતુચ્છસં (પી.)];

યદા લોકે ગમિસ્સન્તિ, તદા કણ્હો પમોક્ખતિ.

૭૦. અસિચમ્મં ગહેત્વાન, ખગ્ગં પગ્ગય્હ બ્રાહ્મણા;

પન્થઘાતં કરિસ્સન્તિ, તદા કણ્હો પમોક્ખતિ.

૭૧. સુક્કચ્છવી વેધવેરા, થૂલબાહૂ અપાતુભા;

મિત્તભેદં કરિસ્સન્તિ, તદા કણ્હો પમોક્ખતિ.

૭૨. માયાવિનો નેકતિકા, અસપ્પુરિસચિન્તકા;

યદા લોકે ભવિસ્સન્તિ, તદા કણ્હો પમોક્ખતીતિ.

મહાકણ્હજાતકં છટ્ઠં.