૪૬૭. કામજાતકં (૪)

૩૭. કામં કામયમાનસ્સ, તસ્સ ચે તં સમિજ્ઝતિ;

અદ્ધા પીતિમનો હોતિ, લદ્ધા મચ્ચો યદિચ્છતિ.

૩૮. કામં કામયમાનસ્સ, તસ્સ ચે તં સમિજ્ઝતિ;

તતો નં અપરં કામે, ધમ્મે તણ્હંવ વિન્દતિ.

૩૯. ગવંવ સિઙ્ગિનો સિઙ્ગં, વડ્ઢમાનસ્સ વડ્ઢતિ;

એવં મન્દસ્સ પોસસ્સ, બાલસ્સ અવિજાનતો;

ભિય્યો તણ્હા પિપાસા ચ, વડ્ઢમાનસ્સ વડ્ઢતિ.

૪૦. પથબ્યા સાલિયવકં, ગવસ્સં [ગવાસં (સી. સ્યા. પી.)] દાસપોરિસં;

દત્વા ચ [દત્વાપિ (સી. સ્યા.), દત્વા વા (પી.)] નાલમેકસ્સ, ઇતિ વિદ્વા [વિદ્ધા (સ્યા.)] સમં ચરે.

૪૧. રાજા પસય્હ પથવિં વિજિત્વા, સસાગરન્તં મહિમાવસન્તો;

ઓરં સમુદ્દસ્સ અતિત્તરૂપો [અતિત્તિરૂપો (ક.)], પારં સમુદ્દસ્સપિ પત્થયેથ.

૪૨. યાવ અનુસ્સરં કામે, મનસા તિત્તિ નાજ્ઝગા;

તતો નિવત્તા પટિકમ્મ દિસ્વા, તે વે સુતિત્તા યે [તિત્તા (સી. સ્યા. પી.)] પઞ્ઞાય તિત્તા.

૪૩. પઞ્ઞાય તિત્તિનં [તિત્તીનં (સી. સ્યા.)] સેટ્ઠં, ન સો કામેહિ તપ્પતિ;

પઞ્ઞાય તિત્તં પુરિસં, તણ્હા ન કુરુતે વસં.

૪૪. અપચિનેથેવ કામાનં [કામાનિ (સી. સ્યા. પી.)], અપ્પિચ્છસ્સ અલોલુપો;

સમુદ્દમત્તો પુરિસો, ન સો કામેહિ તપ્પતિ.

૪૫. રથકારોવ ચમ્મસ્સ, પરિકન્તં ઉપાહનં;

યં યં ચજતિ [જહતિ (સ્યા. ક.)] કામાનં, તં તં સમ્પજ્જતે સુખં;

સબ્બં ચે સુખમિચ્છેય્ય, સબ્બે કામે પરિચ્ચજે.

૪૬. અટ્ઠ તે ભાસિતા ગાથા, સબ્બા હોન્તિ સહસ્સિયો [સહસ્સિયા (?) ઉપરિ સુતસોમજાતકે તથા દિસ્સતિ];

પટિગણ્હ મહાબ્રહ્મે, સાધેતં તવ ભાસિતં.

૪૭. ન મે અત્થો સહસ્સેહિ, સતેહિ નહુતેહિ વા;

પચ્છિમં ભાસતો ગાથં, કામે મે ન રતો મનો.

૪૮. ભદ્રકો [સદ્દો (સી.)] વતાયં માણવકો, સબ્બલોકવિદૂ મુનિ;

યો ઇમં તણ્હં [યો તણ્હં (સી. સ્યા.)] દુક્ખજનનિં, પરિજાનાતિ પણ્ડિતોતિ.

કામજાતકં ચતુત્થં.