૪૬૫. ભદ્દસાલજાતકં (૨)

૧૩. કા ત્વં સુદ્ધેહિ વત્થેહિ, અઘે વેહાયસં [વેહાસયં (સી. પી.)] ઠિતા;

કેન ત્યાસ્સૂનિ વત્તન્તિ, કુતો તં ભયમાગતં.

૧૪. તવેવ દેવ વિજિતે, ભદ્દસાલોતિ મં વિદૂ;

સટ્ઠિ [સટ્ઠિં (સી. પી.)] વસ્સસહસ્સાનિ, તિટ્ઠતો પૂજિતસ્સ મે.

૧૫. કારયન્તા નગરાનિ, અગારે ચ દિસમ્પતિ;

વિવિધે ચાપિ પાસાદે, ન મં તે અચ્ચમઞ્ઞિસું;

યથેવ મં તે પૂજેસું, તથેવ ત્વમ્પિ પૂજય.

૧૬. તં ઇવાહં [તઞ્ચ અહં (સી. સ્યા. પી.)] ન પસ્સામિ, થૂલં કાયેન તે દુમં;

આરોહપરિણાહેન, અભિરૂપોસિ જાતિયા.

૧૭. પાસાદં કારયિસ્સામિ, એકત્થમ્ભં મનોરમં;

તત્થ તં ઉપનેસ્સામિ, ચિરં તે યક્ખ જીવિતં.

૧૮. એવં ચિત્તં ઉદપાદિ, સરીરેન વિનાભાવો;

પુથુસો મં વિકન્તિત્વા, ખણ્ડસો અવકન્તથ.

૧૯. અગ્ગે ચ છેત્વા મજ્ઝે ચ, પચ્છા મૂલમ્હિ છિન્દથ [મૂલઞ્ચ છિન્દથ (સી.), મૂલં વિછિન્દથ (પી.)];

એવં મે છિજ્જમાનસ્સ, ન દુક્ખં મરણં સિયા.

૨૦. હત્થપાદં [હત્થપાદે (ક.)] યથા છિન્દે [છિન્ને (ક.)], કણ્ણનાસઞ્ચ જીવતો;

તતો પચ્છા સિરો છિન્દે, તં દુક્ખં મરણં સિયા.

૨૧. સુખં નુ ખણ્ડસો છિન્નં, ભદ્દસાલવનપ્પતિ;

કિં હેતુ કિં ઉપાદાય, ખણ્ડસો છિન્નમિચ્છસિ.

૨૨. યઞ્ચ હેતુમુપાદાય, હેતું ધમ્મૂપસંહિતં;

ખણ્ડસો છિન્નમિચ્છામિ, મહારાજ સુણોહિ મે.

૨૩. ઞાતી મે સુખસંવદ્ધા, મમ પસ્સે નિવાતજા;

તેપિહં ઉપહિંસેય્યં, પરેસં અસુખોચિતં.

૨૪. ચેતેય્યરૂપં [ચેતબ્બરૂપં (સી. પી.)] ચેતેસિ, ભદ્દસાલવનપ્પતિ;

હિતકામોસિ ઞાતીનં, અભયં સમ્મ દમ્મિ તેતિ.

ભદ્દસાલજાતકં દુતિયં.