૪૫૦. બિલારકોસિયજાતકં (૧૨)

૧૨૫. અપચન્તાપિ દિચ્છન્તિ, સન્તો લદ્ધાન ભોજનં;

કિમેવ ત્વં પચમાનો, યં ન દજ્જા ન તં સમં.

૧૨૬. મચ્છેરા ચ પમાદા ચ, એવં દાનં ન દિય્યતિ;

પુઞ્ઞં આકઙ્ખમાનેન, દેય્યં હોતિ વિજાનતા.

૧૨૭. યસ્સેવ ભીતો ન દદાતિ મચ્છરી, તદેવાદદતો ભયં;

જિઘચ્છા ચ પિપાસા ચ, યસ્સ ભાયતિ મચ્છરી;

તમેવ બાલં ફુસતિ, અસ્મિં લોકે પરમ્હિ ચ.

૧૨૮. તસ્મા વિનેય્ય મચ્છેરં, દજ્જા દાનં મલાભિભૂ;

પુઞ્ઞાનિ પરલોકસ્મિં, પતિટ્ઠા હોન્તિ પાણિનં.

૧૨૯. દુદ્દદં દદમાનાનં, દુક્કરં કમ્મ કુબ્બતં;

અસન્તો નાનુકુબ્બન્તિ, સતં ધમ્મો દુરન્નયો.

૧૩૦. તસ્મા સતઞ્ચ અસતં [અસતઞ્ચ (સી. સ્યા. પી.)], નાના હોતિ ઇતો ગતિ;

અસન્તો નિરયં યન્તિ, સન્તો સગ્ગપરાયના.

૧૩૧. અપ્પસ્મેકે [અપ્પમ્પેકે (સ્યા.)] પવેચ્છન્તિ, બહુનેકે ન દિચ્છરે;

અપ્પસ્મા દક્ખિણા દિન્ના, સહસ્સેન સમં મિતા.

૧૩૨. ધમ્મં ચરે યોપિ સમુઞ્છકં ચરે, દારઞ્ચ પોસં દદમપ્પકસ્મિં [દદં અપ્પકસ્મિપિ (પી.)];

સતં સહસ્સાનં સહસ્સયાગિનં, કલમ્પિ નાગ્ઘન્તિ તથાવિધસ્સ તે.

૧૩૩. કેનેસ યઞ્ઞો વિપુલો મહગ્ઘતો [મહગ્ગતો (સં. નિ. ૧.૩૨)], સમેન દિન્નસ્સ ન અગ્ઘમેતિ;

કથં સતં સહસ્સાનં [કથં સહસ્સાનં (સી. સ્યા. પી.)] સહસ્સયાગિનં, કલમ્પિ નાગ્ઘન્તિ તથાવિધસ્સ તે.

૧૩૪. દદન્તિ હેકે વિસમે નિવિટ્ઠા, છેત્વા [ઝત્વા (સી. પી.), ઘત્વા (સ્યા.)] વધિત્વા અથ સોચયિત્વા;

સા દક્ખિણા અસ્સુમુખા સદણ્ડા, સમેન દિન્નસ્સ ન અગ્ઘમેતિ;

એવં સતં સહસ્સાનં [એવં સહસ્સાનં (સી. સ્યા. પી.)] સહસ્સયાગિનં, કલમ્પિ નાગ્ઘન્તિ તથાવિધસ્સ તેતિ.

બિલારકોસિયજાતકં દ્વાદસમં.