૪૪૬. તક્કલજાતકં (૮)

૮૨. ન તક્કલા સન્તિ ન આલુવાનિ [આલુપાનિ (સી. સ્યા. પી.)], ન બિળાલિયો ન કળમ્બાનિ તાત;

એકો અરઞ્ઞમ્હિ સુસાનમજ્ઝે, કિમત્થિકો તાત ખણાસિ કાસું.

૮૩. પિતામહો તાત સુદુબ્બલો તે, અનેકબ્યાધીહિ દુખેન ફુટ્ઠો;

તમજ્જહં નિખણિસ્સામિ સોબ્ભે, ન હિસ્સ તં જીવિતં રોચયામિ.

૮૪. સઙ્કપ્પમેતં પટિલદ્ધ પાપકં, અચ્ચાહિતં કમ્મ કરોસિ લુદ્દં;

મયાપિ તાત પટિલચ્છસે તુવં, એતાદિસં કમ્મ જરૂપનીતો;

તં કુલ્લવત્તં અનુવત્તમાનો, અહમ્પિ તં નિખણિસ્સામિ સોબ્ભે.

૮૫. ફરુસાહિ વાચાહિ પકુબ્બમાનો, આસજ્જ મં ત્વં વદસે કુમાર;

પુત્તો મમં ઓરસકો સમાનો, અહિતાનુકમ્પી મમ ત્વંસિ પુત્ત.

૮૬. ન તાહં [ત્યાહં (સ્યા.)] તાત અહિતાનુકમ્પી, હિતાનુકમ્પી તે અહમ્પિ [અહઞ્હિ (સ્યા.)] તાત;

પાપઞ્ચ તં કમ્મ પકુબ્બમાનં, અરહામિ નો વારયિતું તતો.

૮૭. યો માતરં વા પિતરં સવિટ્ઠ [માતરં પિતરં વા વસિટ્ઠ (સી. પી.)], અદૂસકે હિંસતિ પાપધમ્મો;

કાયસ્સ ભેદા અભિસમ્પરાયં, અસંસયં સો નિરયં ઉપેતિ [પરેતિ (સી. પી.)].

૮૮. યો માતરં વા પિતરં સવિટ્ઠ, અન્નેન પાનેન ઉપટ્ઠહાતિ;

કાયસ્સ ભેદા અભિસમ્પરાયં, અસંસયં સો સુગતિં ઉપેતિ.

૮૯. ન મે ત્વં પુત્ત અહિતાનુકમ્પી, હિતાનુકમ્પી મે [મમ (?)] ત્વંસિ પુત્ત;

અહઞ્ચ તં માતરા વુચ્ચમાનો, એતાદિસં કમ્મ કરોમિ લુદ્દં.

૯૦. યા તે સા ભરિયા અનરિયરૂપા, માતા મમેસા સકિયા જનેત્તિ;

નિદ્ધાપયે [નિદ્ધામસે (પી.)] તઞ્ચ સકા અગારા, અઞ્ઞમ્પિ તે સા દુખમાવહેય્ય.

૯૧. યા તે સા ભરિયા અનરિયરૂપા, માતા મમેસા સકિયા જનેત્તિ;

દન્તા કરેણૂવ વસૂપનીતા, સા પાપધમ્મા પુનરાવજાતૂતિ.

તક્કલજાતકં અટ્ઠમં.