૪૪૪. કણ્હદીપાયનજાતકં (૬)

૬૨. સત્તાહમેવાહં પસન્નચિત્તો, પુઞ્ઞત્થિકો આચરિં [અચરિં (સી. સ્યા. પી.)] બ્રહ્મચરિયં;

અથાપરં યં ચરિતં મમેદં [મમ યિદં (સ્યા.), મમાયિદં (પી.)], વસ્સાનિ પઞ્ઞાસ સમાધિકાનિ;

અકામકો વાપિ [વાહિ (પી. ક.)] અહં ચરામિ, એતેન સચ્ચેન સુવત્થિ હોતુ;

હતં વિસં જીવતુ યઞ્ઞદત્તો.

૬૩. યસ્મા દાનં નાભિનન્દિં કદાચિ, દિસ્વાનહં અતિથિં વાસકાલે;

ન ચાપિ મે અપ્પિયતં અવેદું, બહુસ્સુતા સમણબ્રાહ્મણા ચ.

અકામકો વાપિ અહં દદામિ, એતેન સચ્ચેન સુવત્થિ હોતુ;

હતં વિસં જીવતુ યઞ્ઞદત્તો.

૬૪. આસીવિસો તાત પહૂતતેજો, યો તં અદંસી [અડંસી (સ્યા.)] સચરા [બિલરા (સી.), પિળારા (સ્યા.), પતરા (પી.)] ઉદિચ્ચ;

તસ્મિઞ્ચ મે અપ્પિયતાય અજ્જ, પિતરિ ચ તે નત્થિ કોચિ વિસેસો;

એતેન સચ્ચેન સુવત્થિ હોતુ, હતં વિસં જીવતુ યઞ્ઞદત્તો.

૬૫. સન્તા દન્તાયેવ [દન્તા સન્તા યે ચ (સ્યા. ક.)] પરિબ્બજન્તિ, અઞ્ઞત્ર કણ્હા નત્થાકામરૂપા [અનકામરૂપા (સી. સ્યા. પી.)];

દીપાયન કિસ્સ જિગુચ્છમાનો, અકામકો ચરસિ બ્રહ્મચરિયં.

૬૬. સદ્ધાય નિક્ખમ્મ પુનં નિવત્તો, સો એળમૂગોવ બાલો [એળમૂગો ચપલો (સ્યા. ક.)] વતાયં;

એતસ્સ વાદસ્સ જિગુચ્છમાનો, અકામકો ચરામિ બ્રહ્મચરિયં;

વિઞ્ઞુપ્પસત્થઞ્ચ સતઞ્ચ ઠાનં [વિઞ્ઞૂપસત્થં વસિતં ચ ઠાનં (ક.)], એવમ્પહં પુઞ્ઞકરો ભવામિ.

૬૭. સમણે તુવં બ્રાહ્મણે અદ્ધિકે ચ, સન્તપ્પયાસિ અન્નપાનેન ભિક્ખં;

ઓપાનભૂતંવ ઘરં તવ યિદં, અન્નેન પાનેન ઉપેતરૂપં;

અથ કિસ્સ વાદસ્સ જિગુચ્છમાનો, અકામકો દાનમિમં દદાસિ.

૬૮. પિતરો ચ મે આસું પિતામહા ચ, સદ્ધા અહું દાનપતી વદઞ્ઞૂ;

તં કુલ્લવત્તં અનુવત્તમાનો, માહં કુલે અન્તિમગન્ધનો [ગન્ધિનો (સ્યા. પી. ક.), ગન્ધિની (સી.)] અહું;

એતસ્સ વાદસ્સ જિગુચ્છમાનો, અકામકો દાનમિમં દદામિ.

૬૯. દહરિં કુમારિં અસમત્થપઞ્ઞં, યં તાનયિં ઞાતિકુલા સુગત્તે;

ન ચાપિ મે અપ્પિયતં અવેદિ, અઞ્ઞત્ર કામા પરિચારયન્તા [પરિચારયન્તી (સી. પી.)];

અથ કેન વણ્ણેન મયા તે ભોતિ, સંવાસધમ્મો અહુ એવરૂપો.

૭૦. આરા દૂરે નયિધ કદાચિ અત્થિ, પરમ્પરા નામ કુલે ઇમસ્મિં;

તં કુલ્લવત્તં અનુવત્તમાના, માહં કુલે અન્તિમગન્ધિની અહું;

એતસ્સ વાદસ્સ જિગુચ્છમાના, અકામિકા પદ્ધચરામ્હિ [પટ્ઠચરામ્હિ (સ્યા. ક.)] તુય્હં.

૭૧. મણ્ડબ્ય ભાસિં યમભાસનેય્યં [ભાસિસ્સં અભાસનેય્યં (સી. સ્યા. પી.), ભાસિસ્સ’મભાસનેય્યં (?)], તં ખમ્યતં પુત્તકહેતુ મજ્જ;

પુત્તપેમા ન ઇધ પરત્થિ કિઞ્ચિ, સો નો અયં જીવતિ યઞ્ઞદત્તોતિ.

કણ્હદીપાયનજાતકં [મણ્ડબ્યજાતકં (સ્યા. ક.)] છટ્ઠં.