૧. અપણ્ણકવગ્ગો

૧. અપણ્ણકજાતકં

૧. અપણ્ણકં ઠાનમેકે, દુતિયં આહુ તક્કિકા;

એતદઞ્ઞાય મેધાવી, તં ગણ્હે યદપણ્ણકન્તિ [તં ગણ્હેય્ય અપણ્ણકં (ક.)].

અપણ્ણકજાતકં પઠમં.

૨. વણ્ણુપથજાતકં

૨. અકિલાસુનો વણ્ણુપથે [વણ્ણપથે (ક.)] ખણન્તા, ઉદઙ્ગણે તત્થ પપં અવિન્દું;

એવં મુની વીરિય [મુનિ વિરિય (પી.), મુનિ વીરિય (સ્યા. ક.)] બલૂપપન્નો, અકિલાસુ વિન્દે હદયસ્સ સન્તિન્તિ.

વણ્ણુપથજાતકં દુતિયં.

૩. સેરિવવાણિજજાતકં

૩. ઇધ ચે નં [ઇધ ચે હિ નં (સી. પી.)] વિરાધેસિ, સદ્ધમ્મસ્સ નિયામતં [નિયામકં (સ્યા. ક.)];

ચિરં ત્વં અનુતપ્પેસિ [અનુતપેસ્સસિ (સી. પી.), અનુતપ્પિસ્સસિ (?)], સેરિવાયંવ વાણિજોતિ.

સેરિવવાણિજજાતકં તતિયં.

૪. ચૂળસેટ્ઠિજાતકં

૪. અપ્પકેનપિ મેધાવી, પાભતેન વિચક્ખણો;

સમુટ્ઠાપેતિ અત્તાનં, અણું અગ્ગિંવ સન્ધમન્તિ.

ચૂળ [ચુલ્લ (સી.), ચુલ્લક (સ્યા. પી.)] સેટ્ઠિજાતકં ચતુત્થં.

૫. તણ્ડુલનાળિજાતકં

૫. [કિમગ્ઘતી તણ્ડુલનાળિકા ચ, બારાણસી અન્તરબાહિરાનિ; અસ્સપઞ્ચસતે તાનિ, એકા તણ્ડુલનાળિકાતિ; (સ્યા.)] કિમગ્ઘતિ તણ્ડુલનાળિકાય, અસ્સાન મૂલાય વદેહિ રાજ [નાળિકા ચ (સી.), નાળિકાય (ક. સી. અટ્ઠ.)];

બારાણસિં સન્તરબાહિરતો [બાહિરન્તં (સી.)], અયમગ્ઘતિ તણ્ડુલનાળિકાતિ [કિમગ્ઘતી વણ્ડુલનાળિકા ચ, બારાણસી અન્તરબાહિરાનિ; અસ્સપઞ્ચસતે તાનિ, એકા તણ્ડુલનાળિકાતિ; (સ્યા.)].

તણ્ડુલનાળિજાતકં પઞ્ચમં.

૬. દેવધમ્મજાતકં

૬. હિરિઓત્તપ્પસમ્પન્ના, સુક્કધમ્મસમાહિતા;

સન્તો સપ્પુરિસા લોકે, દેવધમ્માતિ વુચ્ચરેતિ.

દેવધમ્મજાતકં છટ્ઠં.

૭. કટ્ઠહારિજાતકં

૭. પુત્તો ત્યાહં મહારાજ, ત્વં મં પોસ જનાધિપ;

અઞ્ઞેપિ દેવો પોસેતિ, કિઞ્ચ [કિઞ્ચિ (ક.)] દેવો સકં પજન્તિ.

કટ્ઠહારિ [કટ્ઠવાહન (ક.)] જાતકં સત્તમં.

૮. ગામણિજાતકં

૮. અપિ અતરમાનાનં, ફલાસાવ સમિજ્ઝતિ;

વિપક્કબ્રહ્મચરિયોસ્મિ, એવં જાનાહિ ગામણીતિ.

ગામણિજાતકં અટ્ઠમં.

૯. મઘદેવજાતકં

૯. ઉત્તમઙ્ગરુહા મય્હં, ઇમે જાતા વયોહરા;

પાતુભૂતા દેવદૂતા, પબ્બજ્જાસમયો મમાતિ.

મઘદેવ [મખાદેવ (સી. પી.), દેવદૂત (ક.)] જાતકં નવમં.

૧૦. સુખવિહારિજાતકં

૧૦. યઞ્ચ અઞ્ઞે ન રક્ખન્તિ, યો ચ અઞ્ઞે ન રક્ખતિ;

સ વે રાજ સુખં સેતિ, કામેસુ અનપેક્ખવાતિ.

સુખવિહારિજાતકં દસમં.

અપણ્ણકવગ્ગો પઠમો.

તસ્સુદ્દાનં –

વરાપણ્ણક વણ્ણુપથ સેરિવરો, સુવિચક્ખણ તણ્ડુલનાળિકસ્સા;

હિરિ પુત્તવરુત્તગામણિના, યો ચ ન રક્ખતિ તેન દસાતિ.