૮. પટિસલ્લાનસુત્તં

૪૫. વુત્તઞ્હેતં ભગવતા, વુત્તમરહતાતિ મે સુતં –

‘‘પટિસલ્લાનારામા [પટિસલ્લાનારામા (ક.)], ભિક્ખવે, વિહરથ પટિસલ્લાનરતા, અજ્ઝત્તં ચેતોસમથમનુયુત્તા, અનિરાકતજ્ઝાના, વિપસ્સનાય સમન્નાગતા, બ્રૂહેતા સુઞ્ઞાગારાનં. પટિસલ્લાનારામાનં, ભિક્ખવે, વિહરતં પટિસલ્લાનરતાનં અજ્ઝત્તં ચેતોસમથમનુયુત્તાનં અનિરાકતમજ્ઝાનાનં વિપસ્સનાય સમન્નાગતાનં બ્રૂહેતાનં સુઞ્ઞાગારાનં દ્વિન્નં ફલાનં અઞ્ઞતરં ફલં પાટિકઙ્ખં – દિટ્ઠેવ ધમ્મે અઞ્ઞા, સતિ વા ઉપાદિસેસે અનાગામિતા’’તિ. એતમત્થં ભગવા અવોચ. તત્થેતં ઇતિ વુચ્ચતિ –

‘‘યે સન્તચિત્તા નિપકા, સતિમન્તો ચ [સતિમન્તોવ (સી. ક.)] ઝાયિનો;

સમ્મા ધમ્મં વિપસ્સન્તિ, કામેસુ અનપેક્ખિનો.

‘‘અપ્પમાદરતા સન્તા, પમાદે ભયદસ્સિનો;

અભબ્બા પરિહાનાય, નિબ્બાનસ્સેવ સન્તિકે’’તિ.

અયમ્પિ અત્થો વુત્તો ભગવતા, ઇતિ મે સુતન્તિ. અટ્ઠમં.