૧૦. જાગરિયસુત્તં

૪૭. વુત્તઞ્હેતં ભગવતા, વુત્તમરહતાતિ મે સુતં –

‘‘જાગરો ચસ્સ, ભિક્ખવે, ભિક્ખુ વિહરેય્ય સતો સમ્પજાનો સમાહિતો પમુદિતો વિપ્પસન્નો ચ તત્થ કાલવિપસ્સી ચ કુસલેસુ ધમ્મેસુ. જાગરસ્સ, ભિક્ખવે, ભિક્ખુનો વિહરતો સતસ્સ સમ્પજાનસ્સ સમાહિતસ્સ પમુદિતસ્સ વિપ્પસન્નસ્સ તત્થ કાલવિપસ્સિનો કુસલેસુ ધમ્મેસુ દ્વિન્નં ફલાનં અઞ્ઞતરં ફલં પાટિકઙ્ખં – દિટ્ઠેવ ધમ્મે અઞ્ઞા, સતિ વા ઉપાદિસેસે અનાગામિતા’’તિ. એતમત્થં ભગવા અવોચ. તત્થેતં ઇતિ વુચ્ચતિ –

‘‘જાગરન્તા સુણાથેતં, યે સુત્તા તે પબુજ્ઝથ;

સુત્તા જાગરિતં સેય્યો, નત્થિ જાગરતો ભયં.

‘‘યો જાગરો ચ સતિમા સમ્પજાનો, સમાહિતો મુદિતો વિપ્પસન્નો ચ;

કાલેન સો સમ્મા ધમ્મં પરિવીમંસમાનો, એકોદિભૂતો વિહને તમં સો.

‘‘તસ્મા હવે જાગરિયં ભજેથ, આતાપી ભિક્ખુ નિપકો ઝાનલાભી;

સંયોજનં જાતિજરાય છેત્વા, ઇધેવ સમ્બોધિમનુત્તરં ફુસે’’તિ.

અયમ્પિ અત્થો વુત્તો ભગવતા, ઇતિ મે સુતન્તિ. દસમં.