૧૪. બુદ્ધવગ્ગો

૧૭૯. યસ્સ જિતં નાવજીયતિ, જિતં યસ્સ [જિતમસ્સ (સી. સ્યા. પી.), જિતં મસ્સ (ક.)] નો યાતિ કોચિ લોકે;

તં બુદ્ધમનન્તગોચરં, અપદં કેન પદેન નેસ્સથ.

૧૮૦. યસ્સ જાલિની વિસત્તિકા, તણ્હા નત્થિ કુહિઞ્ચિ નેતવે;

તં બુદ્ધમનન્તગોચરં, અપદં કેન પદેન નેસ્સથ.

૧૮૧. યે ઝાનપસુતા ધીરા, નેક્ખમ્મૂપસમે રતા;

દેવાપિ તેસં પિહયન્તિ, સમ્બુદ્ધાનં સતીમતં.

૧૮૨. કિચ્છો મનુસ્સપટિલાભો, કિચ્છં મચ્ચાન જીવિતં;

કિચ્છં સદ્ધમ્મસ્સવનં, કિચ્છો બુદ્ધાનમુપ્પાદો.

૧૮૩. સબ્બપાપસ્સ અકરણં, કુસલસ્સ ઉપસમ્પદા [કુસલસ્સૂપસમ્પદા (સ્યા.)];

સચિત્તપરિયોદપનં [સચિત્તપરિયોદાપનં (?)], એતં બુદ્ધાન સાસનં.

૧૮૪. ખન્તી પરમં તપો તિતિક્ખા, નિબ્બાનં [નિબ્બાણં (ક. સી. પી.)] પરમં વદન્તિ બુદ્ધા;

ન હિ પબ્બજિતો પરૂપઘાતી, ન [અયં નકારો સી. સ્યા. પી. પાત્થકેસુ ન દિસ્સતિ] સમણો હોતિ પરં વિહેઠયન્તો.

૧૮૫. અનૂપવાદો અનૂપઘાતો [અનુપવાદો અનુપઘાતો (સ્યા. ક.)], પાતિમોક્ખે ચ સંવરો;

મત્તઞ્ઞુતા ચ ભત્તસ્મિં, પન્તઞ્ચ સયનાસનં;

અધિચિત્તે ચ આયોગો, એતં બુદ્ધાન સાસનં.

૧૮૬. ન કહાપણવસ્સેન, તિત્તિ કામેસુ વિજ્જતિ;

અપ્પસ્સાદા દુખા કામા, ઇતિ વિઞ્ઞાય પણ્ડિતો.

૧૮૭. અપિ દિબ્બેસુ કામેસુ, રતિં સો નાધિગચ્છતિ;

તણ્હક્ખયરતો હોતિ, સમ્માસમ્બુદ્ધસાવકો.

૧૮૮. બહું વે સરણં યન્તિ, પબ્બતાનિ વનાનિ ચ;

આરામરુક્ખચેત્યાનિ, મનુસ્સા ભયતજ્જિતા.

૧૮૯. નેતં ખો સરણં ખેમં, નેતં સરણમુત્તમં;

નેતં સરણમાગમ્મ, સબ્બદુક્ખા પમુચ્ચતિ.

૧૯૦. યો ચ બુદ્ધઞ્ચ ધમ્મઞ્ચ, સઙ્ઘઞ્ચ સરણં ગતો;

ચત્તારિ અરિયસચ્ચાનિ, સમ્મપ્પઞ્ઞાય પસ્સતિ.

૧૯૧. દુક્ખં દુક્ખસમુપ્પાદં, દુક્ખસ્સ ચ અતિક્કમં;

અરિયં ચટ્ઠઙ્ગિકં મગ્ગં, દુક્ખૂપસમગામિનં.

૧૯૨. એતં ખો સરણં ખેમં, એતં સરણમુત્તમં;

એતં સરણમાગમ્મ, સબ્બદુક્ખા પમુચ્ચતિ.

૧૯૩. દુલ્લભો પુરિસાજઞ્ઞો, ન સો સબ્બત્થ જાયતિ;

યત્થ સો જાયતિ ધીરો, તં કુલં સુખમેધતિ.

૧૯૪. સુખો બુદ્ધાનમુપ્પાદો, સુખા સદ્ધમ્મદેસના;

સુખા સઙ્ઘસ્સ સામગ્ગી, સમગ્ગાનં તપો સુખો.

૧૯૫. પૂજારહે પૂજયતો, બુદ્ધે યદિ વ સાવકે;

પપઞ્ચસમતિક્કન્તે, તિણ્ણસોકપરિદ્દવે.

૧૯૬. તે તાદિસે પૂજયતો, નિબ્બુતે અકુતોભયે;

ન સક્કા પુઞ્ઞં સઙ્ખાતું, ઇમેત્તમપિ કેનચિ.

બુદ્ધવગ્ગો ચુદ્દસમો નિટ્ઠિતો.