૮. સિવિરાજચરિયા

૫૧. ‘‘અરિટ્ઠસવ્હયે નગરે, સિવિનામાસિ ખત્તિયો;

નિસજ્જ પાસાદવરે, એવં ચિન્તેસહં તદા.

૫૨. ‘‘‘યં કિઞ્ચિ માનુસં દાનં, અદિન્નં મે ન વિજ્જતિ;

યોપિ યાચેય્ય મં ચક્ખું, દદેય્યં અવિકમ્પિતો’.

૫૩. ‘‘મમ સઙ્કપ્પમઞ્ઞાય, સક્કો દેવાનમિસ્સરો;

નિસિન્નો દેવપરિસાય, ઇદં વચનમબ્રવિ.

૫૪. ‘‘‘નિસજ્જ પાસાદવરે, સિવિરાજા મહિદ્ધિકો;

ચિન્તેન્તો વિવિધં દાનં, અદેય્યં સો ન પસ્સતિ.

૫૫. ‘‘‘તથં નુ વિતથં નેતં, હન્દ વીમંસયામિ તં;

મુહુત્તં આગમેય્યાથ, યાવ જાનામિ તં મનં’.

૫૬. ‘‘પવેધમાનો પલિતસિરો, વલિગત્તો [વલિતગત્તો (સી.)] જરાતુરો;

અન્ધવણ્ણોવ હુત્વાન, રાજાનં ઉપસઙ્કમિ.

૫૭. ‘‘સો તદા પગ્ગહેત્વાન, વામં દક્ખિણબાહુ ચ;

સિરસ્મિં અઞ્જલિં કત્વા, ઇદં વચનમબ્રવિ.

૫૮. ‘‘‘યાચામિ તં મહારાજ, ધમ્મિક રટ્ઠવડ્ઢન;

તવ દાનરતા કિત્તિ, ઉગ્ગતા દેવમાનુસે.

૫૯. ‘‘‘ઉભોપિ નેત્તા નયના, અન્ધા ઉપહતા મમ;

એકં મે નયનં દેહિ, ત્વમ્પિ એકેન યાપય’.

૬૦. ‘‘તસ્સાહં વચનં સુત્વા, હટ્ઠો સંવિગ્ગમાનસો;

કતઞ્જલી વેદજાતો, ઇદં વચનમબ્રવિં.

૬૧. ‘‘‘ઇદાનાહં ચિન્તયિત્વાન, પાસાદતો ઇધાગતો;

ત્વં મમ ચિત્તમઞ્ઞાય, નેત્તં યાચિતુમાગતો.

૬૨. ‘‘‘અહો મે માનસં સિદ્ધં, સઙ્કપ્પો પરિપૂરિતો;

અદિન્નપુબ્બં દાનવરં, અજ્જ દસ્સામિ યાચકે.

૬૩. ‘‘‘એહિ સિવક ઉટ્ઠેહિ, મા દન્ધયિ મા પવેધયિ;

ઉભોપિ નયનં દેહિ, ઉપ્પાટેત્વા વણિબ્બકે’.

૬૪. ‘‘તતો સો ચોદિતો મય્હં, સિવકો વચનં કરો;

ઉદ્ધરિત્વાન પાદાસિ, તાલમિઞ્જંવ યાચકે.

૬૫. ‘‘દદમાનસ્સ દેન્તસ્સ, દિન્નદાનસ્સ મે સતો;

ચિત્તસ્સ અઞ્ઞથા નત્થિ, બોધિયાયેવ કારણા.

૬૬. ‘‘ન મે દેસ્સા ઉભો ચક્ખૂ, અત્તા ન મે ન દેસ્સિયો;

સબ્બઞ્ઞુતં પિયં મય્હં, તસ્મા ચક્ખું અદાસહ’’ન્તિ.

સિવિરાજચરિયં અટ્ઠમં.