૮. સોભિતબુદ્ધવંસો

૧. રેવતસ્સ અપરેન, સોભિતો નામ નાયકો;

સમાહિતો સન્તચિત્તો, અસમો અપ્પટિપુગ્ગલો.

૨. સો જિનો સકગેહમ્હિ, માનસં વિનિવત્તયિ;

પત્વાન કેવલં બોધિં, ધમ્મચક્કં પવત્તયિ.

૩. યાવ હેટ્ઠા અવીચિતો, ભવગ્ગા ચાપિ ઉદ્ધતો;

એત્થન્તરે એકપરિસા, અહોસિ ધમ્મદેસને.

૪. તાય પરિસાય સમ્બુદ્ધો, ધમ્મચક્કં પવત્તયિ;

ગણનાય ન વત્તબ્બો, પઠમાભિસમયો અહુ.

૫. તતો પરમ્પિ દેસેન્તે, મરૂનઞ્ચ સમાગમે;

નવુતિકોટિસહસ્સાનં, દુતિયાભિસમયો અહુ.

૬. પુનાપરં રાજપુત્તો, જયસેનો નામ ખત્તિયો;

આરામં રોપયિત્વાન, બુદ્ધે નિય્યાદયી તદા.

૭. તસ્સ યાગં પકિત્તેન્તો, ધમ્મં દેસેસિ ચક્ખુમા;

તદા કોટિસહસ્સાનં, તતિયાભિસમયો અહુ.

૮. સન્નિપાતા તયો આસું, સોભિતસ્સ મહેસિનો;

ખીણાસવાનં વિમલાનં, સન્તચિત્તાન તાદિનં.

૯. ઉગ્ગતો નામ સો રાજા, દાનં દેતિ નરુત્તમે;

તમ્હિ દાને સમાગઞ્છું, અરહન્તા [અરહતં (ક.)] સતકોટિયો.

૧૦. પુનાપરં પુરગણો [પુગગણો (ક.)], દેતિ દાનં નરુત્તમે;

તદા નવુતિકોટીનં, દુતિયો આસિ સમાગમો.

૧૧. દેવલોકે વસિત્વાન, યદા ઓરોહતી જિનો;

તદા અસીતિકોટીનં, તતિયો આસિ સમાગમો.

૧૨. અહં તેન સમયેન, સુજાતો નામ બ્રાહ્મણો;

તદા સસાવકં બુદ્ધં, અન્નપાનેન તપ્પયિં.

૧૩. સોપિ મં બુદ્ધો બ્યાકાસિ, સોભિતો લોકનાયકો;

‘‘અપરિમેય્યિતો કપ્પે, અયં બુદ્ધો ભવિસ્સતિ.

૧૪. ‘‘પધાનં પદહિત્વાન…પે… હેસ્સામ સમ્મુખા ઇમં’’.

૧૫. તસ્સાપિ વચનં સુત્વા, હટ્ઠો સંવિગ્ગમાનસો;

તમેવત્થમનુપ્પત્તિયા, ઉગ્ગં ધિતિમકાસહં.

૧૬. સુધમ્મં નામ નગરં, સુધમ્મો નામ ખત્તિયો;

સુધમ્મા નામ જનિકા, સોભિતસ્સ મહેસિનો.

૧૭. નવવસ્સસહસ્સાનિ, અગારં અજ્ઝ સો વસિ;

કુમુદો નાળિનો પદુમો, તયો પાસાદમુત્તમા.

૧૮. સત્તતિંસસહસ્સાનિ, નારિયો સમલઙ્કતા;

મણિલા [મખિલા (અટ્ઠ.), સમઙ્ગી (સી.), મકિલા (સ્યા. કં.)] નામ સા નારી, સીહો નામાસિ અત્રજો.

૧૯. નિમિત્તે ચતુરો દિસ્વા, પાસાદેનાભિનિક્ખમિ;

સત્તાહં પધાનચારં, ચરિત્વા પુરિસુત્તમો.

૨૦. બ્રહ્મુના યાચિતો સન્તો, સોભિતો લોકનાયકો;

વત્તિ ચક્કં મહાવીરો, સુધમ્મુય્યાનમુત્તમે.

૨૧. અસમો ચ સુનેત્તો ચ, અહેસું અગ્ગસાવકા;

અનોમો નામુપટ્ઠાકો, સોભિતસ્સ મહેસિનો.

૨૨. નકુલા ચ સુજાતા ચ, અહેસું અગ્ગસાવિકા;

બુજ્ઝમાનો ચ સો બુદ્ધો, નાગમૂલે અબુજ્ઝથ.

૨૩. રમ્મો ચેવ સુદત્તો ચ, અહેસું અગ્ગુપટ્ઠકા;

નકુલા ચેવ ચિત્તા ચ, અહેસું અગ્ગુપટ્ઠિકા.

૨૪. અટ્ઠપણ્ણાસરતનં, અચ્ચુગ્ગતો મહામુનિ;

ઓભાસેતિ દિસા સબ્બા, સતરંસીવ ઉગ્ગતો.

૨૫. યથા સુફુલ્લં પવનં, નાનાગન્ધેહિ ધૂપિતં;

તથેવ તસ્સ પાવચનં, સીલગન્ધેહિ ધૂપિતં.

૨૬. યથાપિ સાગરો નામ, દસ્સનેન અતપ્પિયો;

તથેવ તસ્સ પાવચનં, સવણેન અતપ્પિયં.

૨૭. નવુતિવસ્સસહસ્સાનિ, આયુ વિજ્જતિ તાવદે;

તાવતા તિટ્ઠમાનો સો, તારેસિ જનતં બહું.

૨૮. ઓવાદં અનુસિટ્ઠિઞ્ચ, દત્વાન સેસકે જને;

હુતાસનોવ તાપેત્વા, નિબ્બુતો સો સસાવકો.

૨૯. સો ચ બુદ્ધો અસમસમો, તેપિ સાવકા બલપ્પત્તા;

સબ્બં તમન્તરહિતં, નનુ રિત્તા સબ્બસઙ્ખારા.

૩૦. સોભિતો વરસમ્બુદ્ધો, સીહારામમ્હિ નિબ્બુતો;

ધાતુવિત્થારિકં આસિ, તેસુ તેસુ પદેસતોતિ.

સોભિતસ્સ ભગવતો વંસો છટ્ઠો.