૯. અનોમદસ્સીબુદ્ધવંસો

૧. સોભિતસ્સ અપરેન, સમ્બુદ્ધો દ્વિપદુત્તમો;

અનોમદસ્સી અમિતયસો, તેજસ્સી દુરતિક્કમો.

૨. સો છેત્વા બન્ધનં સબ્બં, વિદ્ધંસેત્વા તયો ભવે;

અનિવત્તિગમનં મગ્ગં, દેસેસિ દેવમાનુસે.

૩. સાગરોવ અસઙ્ખોભો, પબ્બતોવ દુરાસદો;

આકાસોવ અનન્તો સો, સાલરાજાવ ફુલ્લિતો.

૪. દસ્સનેનપિ તં બુદ્ધં, તોસિતા હોન્તિ પાણિનો;

બ્યાહરન્તં ગિરં સુત્વા, અમતં પાપુણન્તિ તે.

૫. ધમ્માભિસમયો તસ્સ, ઇદ્ધો ફીતો તદા અહુ;

કોટિસતાનિ અભિસમિંસુ, પઠમે ધમ્મદેસને.

૬. તતો પરં અભિસમયે, વસ્સન્તે ધમ્મવુટ્ઠિયો;

અસીતિકોટિયોભિસમિંસુ, દુતિયે ધમ્મદેસને.

૭. તતોપરઞ્હિ વસ્સન્તે, તપ્પયન્તે ચ પાણિનં;

અટ્ઠસત્તતિકોટીનં, તતિયાભિસમયો અહુ.

૮. સન્નિપાતા તયો આસું, તસ્સાપિ ચ મહેસિનો;

અભિઞ્ઞાબલપ્પત્તાનં, પુપ્ફિતાનં વિમુત્તિયા.

૯. અટ્ઠસતસહસ્સાનં, સન્નિપાતો તદા અહુ;

પહીનમદમોહાનં, સન્તચિત્તાન તાદિનં.

૧૦. સત્તસતસહસ્સાનં, દુતિયો આસિ સમાગમો;

અનઙ્ગણાનં વિરજાનં, ઉપસન્તાન તાદિનં.

૧૧. છન્નં સતસહસ્સાનં, તતિયો આસિ સમાગમો;

અભિઞ્ઞાબલપ્પત્તાનં, નિબ્બુતાનં તપસ્સિનં.

૧૨. અહં તેન સમયેન, યક્ખો આસિં મહિદ્ધિકો;

નેકાનં યક્ખકોટીનં, વસવત્તિમ્હિ ઇસ્સરો.

૧૩. તદાપિ તં બુદ્ધવરં, ઉપગન્ત્વા મહેસિનં;

અન્નપાનેન તપ્પેસિં, સસઙ્ઘં લોકનાયકં.

૧૪. સોપિ મં તદા બ્યાકાસિ, વિસુદ્ધનયનો મુનિ;

‘‘અપરિમેય્યિતો કપ્પે, અયં બુદ્ધો ભવિસ્સતિ.

૧૫. ‘‘પધાનં પદહિત્વાન…પે… હેસ્સામ સમ્મુખા ઇમં’’.

૧૬. તસ્સાપિ વચનં સુત્વા, હટ્ઠો સંવિગ્ગમાનસો;

ઉત્તરિં વતમધિટ્ઠાસિં, દસપારમિપૂરિયા.

૧૭. નગરં ચન્દવતી નામ, યસવા નામ ખત્તિયો;

માતા યસોધરા નામ, અનોમદસ્સિસ્સ સત્થુનો.

૧૮. દસવસ્સસહસ્સાનિ, અગારં અજ્ઝ સો વસિ;

સિરી ઉપસિરી વડ્ઢો, તયો પાસાદમુત્તમા.

૧૯. તેવીસતિસહસ્સાનિ, નારિયો સમલઙ્કતા;

સિરિમા નામ સા નારી, ઉપવાણો નામ અત્રજો.

૨૦. નિમિત્તે ચતુરો દિસ્વા, સિવિકાયાભિનિક્ખમિ;

અનૂનદસમાસાનિ, પધાનં પદહી જિનો.

૨૧. બ્રહ્મુના યાચિતો સન્તો, અનોમદસ્સી મહામુનિ;

વત્તિ ચક્કં મહાવીરો, ઉય્યાને સો સુદસ્સને [સુદસ્સનુય્યાનમુત્તમે (સ્યા. કં.)].

૨૨. નિસભો ચ અનોમો ચ [અસોકો ચ (સી.)], અહેસું અગ્ગસાવકા;

વરુણો નામુપટ્ઠાકો, અનોમદસ્સિસ્સ સત્થુનો.

૨૩. સુન્દરી ચ સુમના ચ, અહેસું અગ્ગસાવિકા;

બોધિ તસ્સ ભગવતો, અજ્જુનોતિ પવુચ્ચતિ.

૨૪. નન્દિવડ્ઢો સિરિવડ્ઢો, અહેસું અગ્ગુપટ્ઠકા;

ઉપ્પલા ચેવ પદુમા ચ, અહેસું અગ્ગુપટ્ઠિકા.

૨૫. અટ્ઠપણ્ણાસરતનં, અચ્ચુગ્ગતો મહામુનિ;

પભા નિદ્ધાવતી તસ્સ, સતરંસીવ ઉગ્ગતો.

૨૬. વસ્સસતસહસ્સાનિ, આયુ વિજ્જતિ તાવદે;

તાવતા તિટ્ઠમાનો સો, તારેસિ જનતં બહું.

૨૭. સુપુપ્ફિતં પાવચનં, અરહન્તેહિ તાદિહિ;

વીતરાગેહિ વિમલેહિ, સોભિત્થ જિનસાસનં.

૨૮. સો ચ સત્થા અમિતયસો, યુગાનિ તાનિ અતુલિયાનિ;

સબ્બં તમન્તરહિતં, નનુ રિત્તા સબ્બસઙ્ખારા.

૨૯. અનોમદસ્સી જિનો સત્થા, ધમ્મારામમ્હિ નિબ્બુતો;

તત્થેવસ્સ જિનથૂપો, ઉબ્બેધો પઞ્ચવીસતીતિ.

અનોમદસ્સિસ્સ ભગવતો વંસો સત્તમો.