૭. રેવતબુદ્ધવંસો

૧. સુમનસ્સ અપરેન, રેવતો નામ નાયકો;

અનૂપમો અસદિસો, અતુલો ઉત્તમો જિનો.

૨. સોપિ ધમ્મં પકાસેસિ, બ્રહ્મુના અભિયાચિતો;

ખન્ધધાતુવવત્થાનં, અપ્પવત્તં ભવાભવે.

૩. તસ્સાભિસમયા તીણિ, અહેસું ધમ્મદેસને;

ગણનાય ન વત્તબ્બો, પઠમાભિસમયો અહુ.

૪. યદા અરિન્દમં રાજં [રાજાનં (ક.)], વિનેસિ રેવતો મુનિ;

તદા કોટિસહસ્સાનં, દુતિયાભિસમયો અહુ.

૫. સત્તાહં પટિસલ્લાના, વુટ્ઠહિત્વા નરાસભો;

કોટિસતં નરમરૂનં, વિનેસિ ઉત્તમે ફલે.

૬. સન્નિપાતા તયો આસું, રેવતસ્સ મહેસિનો;

ખીણાસવાનં વિમલાનં, સુવિમુત્તાન તાદિનં.

૭. અતિક્કન્તા ગણનપથં, પઠમં યે સમાગતા;

કોટિસતસહસ્સાનં, દુતિયો આસિ સમાગમો.

૮. યોપિ [યો સો (સ્યા. કં. ક.)] પઞ્ઞાય અસમો, તસ્સ ચક્કાનુવત્તકો;

સો તદા બ્યાધિતો આસિ, પત્તો જીવિતસંસયં.

૯. તસ્સ ગિલાનપુચ્છાય, યે તદા ઉપગતા મુની;

કોટિસહસ્સા અરહન્તો, તતિયો આસિ સમાગમો.

૧૦. અહં તેન સમયેન, અતિદેવો નામ બ્રાહ્મણો;

ઉપગન્ત્વા રેવતં બુદ્ધં, સરણં તસ્સ ગઞ્છહં.

૧૧. તસ્સ સીલં સમાધિઞ્ચ, પઞ્ઞાગુણમનુત્તમં;

થોમયિત્વા યથાથામં, ઉત્તરીયમદાસહં.

૧૨. સોપિ મં બુદ્ધો બ્યાકાસિ, રેવતો લોકનાયકો;

‘‘અપરિમેય્યિતો કપ્પે, અયં બુદ્ધો ભવિસ્સતિ.

૧૩. ‘‘પધાનં પદહિત્વાન…પે… હેસ્સામ સમ્મુખા ઇમં’’.

૧૪. તસ્સાપિ વચનં સુત્વા, ભિય્યો ચિત્તં પસાદયિં;

ઉત્તરિં વતમધિટ્ઠાસિં, દસપારમિપૂરિયા.

૧૫. તદાપિ તં બુદ્ધધમ્મં, સરિત્વા અનુબ્રૂહયિં;

આહરિસ્સામિ તં ધમ્મં, યં મય્હં અભિપત્થિતં.

૧૬. નગરં સુધઞ્ઞવતી નામ [સુધમ્મકં નામ (સી.), સુધઞ્ઞકં નામ (સ્યા.)], વિપુલો નામ ખત્તિયો;

વિપુલા નામ જનિકા, રેવતસ્સ મહેસિનો.

૧૭. છ ચ વસ્સસહસ્સાનિ [છબ્બસ્સસહસ્સાનિ (સી. સ્યા.)], અગારં અજ્ઝ સો વસિ;

સુદસ્સનો રતનગ્ઘિ, આવેળો ચ વિભૂસિતો;

પુઞ્ઞકમ્માભિનિબ્બત્તા, તયો પાસાદમુત્તમા.

૧૮. તેત્તિંસ ચ સહસ્સાનિ, નારિયો સમલઙ્કતા;

સુદસ્સના નામ નારી, વરુણો નામ અત્રજો.

૧૯. નિમિત્તે ચતુરો દિસ્વા, રથયાનેન નિક્ખમિ;

અનૂનસત્તમાસાનિ, પધાનં પદહી જિનો.

૨૦. બ્રહ્મુના યાચિતો સન્તો, રેવતો લોકનાયકો;

વત્તિ ચક્કં મહાવીરો, વરુણારામે સિરીઘરે.

૨૧. વરુણો બ્રહ્મદેવો ચ, અહેસું અગ્ગસાવકા;

સમ્ભવો નામુપટ્ઠાકો, રેવતસ્સ મહેસિનો.

૨૨. ભદ્દા ચેવ સુભદ્દા ચ, અહેસું અગ્ગસાવિકા;

સોપિ બુદ્ધો અસમસમો, નાગમૂલે અબુજ્ઝથ.

૨૩. પદુમો કુઞ્જરો ચેવ, અહેસું અગ્ગુપટ્ઠિકા;

સિરીમા ચેવ યસવતી, અહેસું અગ્ગુપટ્ઠિકા.

૨૪. ઉચ્ચત્તનેન સો બુદ્ધો, અસીતિહત્થમુગ્ગતો;

ઓભાસેતિ દિસા સબ્બા, ઇન્દકેતુવ ઉગ્ગતો.

૨૫. તસ્સ સરીરે નિબ્બત્તા, પભામાલા અનુત્તરા;

દિવા વા યદિ વા રત્તિં, સમન્તા ફરતિ યોજનં.

૨૬. સટ્ઠિવસ્સસહસ્સાનિ, આયુ વિજ્જતિ તાવદે;

તાવતા તિટ્ઠમાનો સો, તારેસિ જનતં બહું.

૨૭. દસ્સયિત્વા બુદ્ધબલં, અમતં લોકે પકાસયં;

નિબ્બાયિ અનુપાદાનો, યથગ્ગુપાદાનસઙ્ખયા.

૨૮. સો ચ કાયો રતનનિભો, સો ચ ધમ્મો અસાદિસો;

સબ્બં તમન્તરહિતં, નનુ રિત્તા સબ્બસઙ્ખારા.

૨૯. રેવતો યસધરો બુદ્ધો, નિબ્બુતો સો મહાપુરે;

ધાતુવિત્થારિકં આસિ, તેસુ તેસુ પદેસતોતિ.

રેવતસ્સ ભગવતો વંસો પઞ્ચમો.