૬. સુમનબુદ્ધવંસો

૧. મઙ્ગલસ્સ અપરેન, સુમનો નામ નાયકો;

સબ્બધમ્મેહિ અસમો, સબ્બસત્તાનમુત્તમો.

૨. તદા અમતભેરિં સો, આહની મેખલે પુરે;

ધમ્મસઙ્ખસમાયુત્તં, નવઙ્ગં જિનસાસનં.

૩. નિજ્જિનિત્વા કિલેસે સો, પત્વા સમ્બોધિમુત્તમં;

માપેસિ નગરં સત્થા, સદ્ધમ્મપુરવરુત્તમં.

૪. નિરન્તરં અકુટિલં, ઉજું વિપુલવિત્થતં;

માપેસિ સો મહાવીથિં, સતિપટ્ઠાનવરુત્તમં.

૫. ફલે ચત્તારિ સામઞ્ઞે, ચતસ્સો પટિસમ્ભિદા;

છળભિઞ્ઞાટ્ઠસમાપત્તી, પસારેસિ તત્થ વીથિયં.

૬. યે અપ્પમત્તા અખિલા, હિરિવીરિયેહુપાગતા;

તે તે ઇમે ગુણવરે, આદિયન્તિ યથા સુખં.

૭. એવમેતેન યોગેન, ઉદ્ધરન્તો મહાજનં;

બોધેસિ પઠમં સત્થા, કોટિસતસહસ્સિયો.

૮. યમ્હિ કાલે મહાવીરો, ઓવદી તિત્થિયે ગણે;

કોટિસહસ્સાભિસમિંસુ [કોટિસતસહસ્સાનિ (સ્યા. કં.), કોટિસતસહસ્સાનં (ક.)], દુતિયે ધમ્મદેસને.

૯. યદા દેવા મનુસ્સા ચ, સમગ્ગા એકમાનસા;

નિરોધપઞ્હં પુચ્છિંસુ, સંસયઞ્ચાપિ માનસં.

૧૦. તદાપિ ધમ્મદેસને, નિરોધપરિદીપને;

નવુતિકોટિસહસ્સાનં, તતિયાભિસમયો અહુ.

૧૧. સન્નિપાતા તયો આસું, સુમનસ્સ મહેસિનો;

ખીણાસવાનં વિમલાનં, સન્તચિત્તાન તાદિનં.

૧૨. વસ્સંવુત્થસ્સ ભગવતો, અભિઘુટ્ઠે પવારણે;

કોટિસતસહસ્સેહિ, પવારેસિ તથાગતો.

૧૩. તતોપરં સન્નિપાતે, વિમલે કઞ્ચનપબ્બતે;

નવુતિકોટિસહસ્સાનં, દુતિયો આસિ સમાગમો.

૧૪. યદા સક્કો દેવરાજા, બુદ્ધદસ્સનુપાગમિ;

અસીતિકોટિસહસ્સાનં, તતિયો આસિ સમાગમો.

૧૫. અહં તેન સમયેન, નાગરાજા મહિદ્ધિકો;

અતુલો નામ નામેન, ઉસ્સન્નકુસલસઞ્ચયો.

૧૬. તદાહં નાગભાવના, નિક્ખમિત્વા સઞાતિભિ;

નાગાનં દિબ્બતુરિયેહિ, સસઙ્ઘં જિનમુપટ્ઠહિં.

૧૭. કોટિસતસહસ્સાનં, અન્નપાનેન તપ્પયિં;

પચ્ચેકદુસ્સયુગં દત્વા, સરણં તમુપાગમિં.

૧૮. સોપિ મં બુદ્ધો બ્યાકાસિ, સુમનો લોકનાયકો;

‘‘અપરિમેય્યિતો કપ્પે, અયં બુદ્ધો ભવિસ્સતિ.

૧૯. ‘‘પધાનં પદહિત્વાન…પે… હેસ્સામ સમ્મુખા ઇમં’’.

૨૦. તસ્સાપિ વચનં સુત્વા, ભિય્યો ચિત્તં પસાદયિં;

ઉત્તરિં વતમધિટ્ઠાસિં, દસપારમિપૂરિયા.

૨૧. નગરં મેખલં નામ [મેખલં નામ નગરં (સી. સ્યા.)], સુદત્તો નામ ખત્તિયો;

સિરિમા નામ જનિકા, સુમનસ્સ મહેસિનો.

૨૨. નવવસ્સસહસ્સાનિ, અગારં અજ્ઝ સો વસિ;

ચન્દો સુચન્દો વટંસો ચ, તયો પાસાદમુત્તમા.

૨૩. તેસટ્ઠિસતસહસ્સાનિ, નારિયો સમલઙ્કતા;

વટંસિકા નામ નારી, અનૂપમો નામ અત્રજો.

૨૪. નિમિત્તે ચતુરો દિસ્વા, હત્થિયાનેન નિક્ખમિ;

અનૂનદસમાસાનિ, પધાનં પદહી જિનો.

૨૫. બ્રહ્મુના યાચિતો સન્તો, સુમનો લોકનાયકો;

વત્તિ ચક્કં મહાવીરો, મેખલે પુરમુત્તમે.

૨૬. સરણો ભાવિતત્તો ચ, અહેસું અગ્ગસાવકા;

ઉદેનો નામુપટ્ઠાકો, સુમનસ્સ મહેસિનો.

૨૭. સોણા ચ ઉપસોણા ચ, અહેસું અગ્ગસાવિકા;

સોપિ બુદ્ધો અમિતયસો, નાગમૂલે અબુજ્ઝથ.

૨૮. વરુણો ચેવ સરણો ચ, અહેસું અગ્ગુપટ્ઠકા;

ચાલા ચ ઉપચાલા ચ, અહેસું અગ્ગુપટ્ઠિકા.

૨૯. ઉચ્ચત્તનેન [ઉચ્ચતરેન (ક.)] સો બુદ્ધો, નવુતિહત્થમુગ્ગતો;

કઞ્ચનગ્ઘિયસઙ્કાસો, દસસહસ્સી વિરોચતિ.

૩૦. નવુતિવસ્સસહસ્સાનિ, આયુ વિજ્જતિ તાવદે;

તાવતા તિટ્ઠમાનો સો, તારેસિ જનતં બહું.

૩૧. તારણીયે તારયિત્વા, બોધનીયે ચ બોધયિ;

પરિનિબ્બાયિ સમ્બુદ્ધો, ઉળુરાજાવ અત્થમિ.

૩૨. તે ચ ખીણાસવા ભિક્ખૂ, સો ચ બુદ્ધો અસાદિસો;

અતુલપ્પભં દસ્સયિત્વા, નિબ્બુતા યે મહાયસા.

૩૩. તઞ્ચ ઞાણં અતુલિયં, તાનિ ચ અતુલાનિ રતનાનિ;

સબ્બં તમન્તરહિતં, નનુ રિત્તા સબ્બસઙ્ખારા.

૩૪. સુમનો યસધરો બુદ્ધો, અઙ્ગારામમ્હિ નિબ્બુતો;

તત્થેવ તસ્સ જિનથૂપો, ચતુયોજનમુગ્ગતોતિ.

સુમનસ્સ ભગવતો વંસો ચતુત્થો.