૫. મઙ્ગલબુદ્ધવંસો

૧. કોણ્ડઞ્ઞસ્સ અપરેન, મઙ્ગલો નામ નાયકો;

તમં લોકે નિહન્ત્વાન, ધમ્મોક્કમભિધારયિ.

૨. અતુલાસિ પભા તસ્સ, જિનેહઞ્ઞેહિ ઉત્તરિં;

ચન્દસૂરિયપભં હન્ત્વા, દસસહસ્સી વિરોચતિ.

૩. સોપિ બુદ્ધો પકાસેસિ, ચતુરો સચ્ચવરુત્તમે;

તે તે સચ્ચરસં પીત્વા, વિનોદેન્તિ મહાતમં.

૪. પત્વાન બોધિમતુલં, પઠમે ધમ્મદેસને;

કોટિસતસહસ્સાનં, ધમ્માભિસમયો અહુ.

૫. સુરિન્દદેવભવને, બુદ્ધો ધમ્મમદેસયિ;

તદા કોટિસહસ્સાનં [નવકોટિસહસ્સાનં (સી.)], દુતિયો સમયો અહુ.

૬. યદા સુનન્દો ચક્કવત્તી, સમ્બુદ્ધં ઉપસઙ્કમિ;

તદા આહનિ સમ્બુદ્ધો, ધમ્મભેરિં વરુત્તમં.

૭. સુનન્દસ્સાનુચરા જનતા, તદાસું નવુતિકોટિયો;

સબ્બેપિ તે નિરવસેસા, અહેસું એહિ ભિક્ખુકા.

૮. સન્નિપાતા તયો આસું, મઙ્ગલસ્સ મહેસિનો;

કોટિસતસહસ્સાનં, પઠમો આસિ સમાગમો.

૯. દુતિયો કોટિસતસહસ્સાનં, તતિયો નવુતિકોટિનં;

ખીણાસવાનં વિમલાનં, તદા આસિ સમાગમો.

૧૦. અહં તેન સમયેન, સુરુચી નામ બ્રાહ્મણો;

અજ્ઝાયકો મન્તધરો, તિણ્ણં વેદાન પારગૂ.

૧૧. તમહં ઉપસઙ્કમ્મ, સરણં ગન્ત્વાન સત્થુનો;

સમ્બુદ્ધપ્પમુખં સઙ્ઘં, ગન્ધમાલેન પૂજયિં;

પૂજેત્વા ગન્ધમાલેન, ગવપાનેન તપ્પયિં.

૧૨. સોપિ મં બુદ્ધો બ્યાકાસિ, મઙ્ગલો દ્વિપદુત્તમો;

‘‘અપરિમેય્યિતો કપ્પે, અયં બુદ્ધો ભવિસ્સતિ.

૧૩. ‘‘પધાનં પદહિત્વાન…પે… હેસ્સામ સમ્મુખા ઇમં’’.

૧૪. તસ્સાપિ વચનં સુત્વા, ભિય્યો ચિત્તં પસાદયિં;

ઉત્તરિં વતમધિટ્ઠાસિં, દસ પારમિપૂરિયા.

૧૫. તદા પીતિમનુબ્રૂહન્તો, સમ્બોધિવરપત્તિયા;

બુદ્ધે દત્વાન મં ગેહં, પબ્બજિં તસ્સ સન્તિકે.

૧૬. સુત્તન્તં વિનયઞ્ચાપિ, નવઙ્ગં સત્થુસાસનં;

સબ્બં પરિયાપુણિત્વા, સોભયિં જિનસાસનં.

૧૭. તત્થપ્પમત્તો વિહરન્તો, બ્રહ્મં ભાવેત્વ ભાવનં;

અભિઞ્ઞાપારમિં ગન્ત્વા, બ્રહ્મલોકમગચ્છહં.

૧૮. ઉત્તરં નામ નગરં, ઉત્તરો નામ ખત્તિયો;

ઉત્તરા નામ જનિકા, મઙ્ગલસ્સ મહેસિનો.

૧૯. નવવસ્સસહસ્સાનિ, અગારં અજ્ઝ સો વસિ;

યસવા સુચિમા સિરીમા, તયો પાસાદમુત્તમા.

૨૦. સમતિંસસહસ્સાનિ, નારિયો સમલઙ્કતા;

યસવતી નામ નારી, સીવલો નામ અત્રજો.

૨૧. નિમિત્તે ચતુરો દિસ્વા, અસ્સયાનેન નિક્ખમિ;

અનૂનઅટ્ઠમાસાનિ, પધાનં પદહી જિનો.

૨૨. બ્રહ્મુના યાચિતો સન્તો, મઙ્ગલો નામ નાયકો;

વત્તિ ચક્કં મહાવીરો, વને સિરીવરુત્તમે.

૨૩. સુદેવો ધમ્મસેનો ચ, અહેસું અગ્ગસાવકા;

પાલિતો નામુપટ્ઠાકો, મઙ્ગલસ્સ મહેસિનો.

૨૪. સીવલા ચ અસોકા ચ, અહેસું અગ્ગસાવિકા;

બોધિ તસ્સ ભગવતો, નાગરુક્ખોતિ વુચ્ચતિ.

૨૫. નન્દો ચેવ વિસાખો ચ, અહેસું અગ્ગુપટ્ઠકા;

અનુલા ચેવ સુતના ચ, અહેસું અગ્ગુપટ્ઠિકા.

૨૬. અટ્ઠાસીતિ રતનાનિ, અચ્ચુગ્ગતો મહામુનિ;

તતો નિદ્ધાવતી રંસી, અનેકસતસહસ્સિયો.

૨૭. નવુતિવસ્સસહસ્સાનિ, આયુ વિજ્જતિ તાવદે;

તાવતા તિટ્ઠમાનો સો, તારેસિ જનતં બહું.

૨૮. યથાપિ સાગરે ઊમી, ન સક્કા તા ગણેતુયે;

તથેવ સાવકા તસ્સ, ન સક્કા તે ગણેતુયે.

૨૯. યાવ અટ્ઠાસિ સમ્બુદ્ધો, મઙ્ગલો લોકનાયકો;

ન તસ્સ સાસને અત્થિ, સકિલેસમરણં [સંકિલેસમરણં (સી.)] તદા.

૩૦. ધમ્મોક્કં ધારયિત્વાન, સન્તારેત્વા મહાજનં;

જલિત્વા ધૂમકેતૂવ, નિબ્બુતો સો મહાયસો.

૩૧. સઙ્ખારાનં સભાવત્થં, દસ્સયિત્વા સદેવકે;

જલિત્વા અગ્ગિક્ખન્ધોવ, સૂરિયો અત્થઙ્ગતો યથા.

૩૨. ઉય્યાને વસ્સરે નામ, બુદ્ધો નિબ્બાયિ મઙ્ગલો;

તત્થેવસ્સ જિનથૂપો, તિંસયોજનમુગ્ગતોતિ.

મઙ્ગલસ્સ ભગવતો વંસો તતિયો.