૪. કોણ્ડઞ્ઞબુદ્ધવંસો

૧. દીપઙ્કરસ્સ અપરેન, કોણ્ડઞ્ઞો નામ નાયકો;

અનન્તતેજો અમિતયસો, અપ્પમેય્યો દુરાસદો.

૨. ધરણૂપમો ખમનેન, સીલેન સાગરૂપમો;

સમાધિના મેરૂપમો, ઞાણેન ગગનૂપમો.

૩. ઇન્દ્રિયબલબોજ્ઝઙ્ગ-મગ્ગસચ્ચપ્પકાસનં;

પકાસેસિ સદા બુદ્ધો, હિતાય સબ્બપાણિનં.

૪. ધમ્મચક્કં પવત્તેન્તે, કોણ્ડઞ્ઞે લોકનાયકે;

કોટિસતસહસ્સાનં, પઠમાભિસમયો અહુ.

૫. તતો પરમ્પિ દેસેન્તે, નરમરૂનં સમાગમે;

નવુતિકોટિસહસ્સાનં, દુતિયાભિસમયો અહુ.

૬. તિત્થિયે અભિમદ્દન્તો, યદા ધમ્મમદેસયિ;

અસીતિકોટિસહસ્સાનં, તતિયાભિસમયો અહુ.

૭. સન્નિપાતા તયો આસું, કોણ્ડઞ્ઞસ્સ મહેસિનો;

ખીણાસવાનં વિમલાનં, સન્તચિત્તાન તાદિનં.

૮. કોટિસતસહસ્સાનં, પઠમો આસિ સમાગમો;

દુતિયો કોટિસહસ્સાનં, તતિયો નવુતિકોટિનં.

૯. અહં તેન સમયેન, વિજિતાવી નામ ખત્તિયો;

સમુદ્દં અન્તમન્તેન, ઇસ્સરિયં વત્તયામહં.

૧૦. કોટિસતસહસ્સાનં, વિમલાનં મહેસિનં;

સહ લોકગ્ગનાથેન, પરમન્નેન તપ્પયિં.

૧૧. સોપિ મં બુદ્ધો બ્યાકાસિ, કોણ્ડઞ્ઞો લોકનાયકો;

‘‘અપરિમેય્યિતો કપ્પે, બુદ્ધો લોકે ભવિસ્સતિ.

૧૨. ‘‘પધાનં પદહિત્વાન, કત્વા દુક્કરકારિકં;

અસ્સત્થમૂલે સમ્બુદ્ધો, બુજ્ઝિસ્સતિ મહાયસો.

૧૩. ‘‘ઇમસ્સ જનિકા માતા, માયા નામ ભવિસ્સતિ;

પિતા સુદ્ધોદનો નામ, અયં હેસ્સતિ ગોતમો.

૧૪. ‘‘કોલિતો ઉપતિસ્સો ચ, અગ્ગા હેસ્સન્તિ સાવકા;

આનન્દો નામુપટ્ઠાકો, ઉપટ્ઠિસ્સતિમં જિનં.

૧૫. ‘‘ખેમા ઉપ્પલવણ્ણા ચ, અગ્ગા હેસ્સન્તિ સાવિકા;

બોધિ તસ્સ ભગવતો, અસ્સત્થોતિ પવુચ્ચતિ.

૧૬. ‘‘ચિત્તો ચ હત્થાળવકો, અગ્ગા હેસ્સન્તુપટ્ઠકા;

નન્દમાતા ચ ઉત્તરા, અગ્ગા હેસ્સન્તુપટ્ઠિકા;

આયુ વસ્સસતં તસ્સ, ગોતમસ્સ યસસ્સિનો’’.

૧૭. ઇદં સુત્વાન વચનં, અસમસ્સ મહેસિનો;

આમોદિતા નરમરૂ, બુદ્ધબીજં કિર અયં.

૧૮. ઉક્કુટ્ઠિસદ્દા વત્તન્તિ, અપ્ફોટેન્તિ હસન્તિ ચ;

કતઞ્જલી નમસ્સન્તિ, દસસહસ્સિદેવતા.

૧૯. ‘‘યદિમસ્સ લોકનાથસ્સ, વિરજ્ઝિસ્સામ સાસનં;

અનાગતમ્હિ અદ્ધાને, હેસ્સામ સમ્મુખા ઇમં.

૨૦. ‘‘યથા મનુસ્સા નદિં તરન્તા, પટિતિત્થં વિરજ્ઝિય;

હેટ્ઠાતિત્થે ગહેત્વાન, ઉત્તરન્તિ મહાનદિં.

૨૧. ‘‘એવમેવ મયં સબ્બે, યદિ મુઞ્ચામિમં જિનં;

અનાગતમ્હિ અદ્ધાને, હેસ્સામ સમ્મુખા ઇમં’’.

૨૨. તસ્સાહં વચનં સુત્વા, ભિય્યો ચિત્તં પસાદયિં;

તમેવ અત્થં સાધેન્તો, મહારજ્જં જિને અદં;

મહારજ્જં દદિત્વાન [ચજિત્વા (સી.)], પબ્બજિં તસ્સ સન્તિકે.

૨૩. સુત્તન્તં વિનયઞ્ચાપિ, નવઙ્ગં સત્થુસાસનં;

સબ્બં પરિયાપુણિત્વાન, સોભયિં જિનસાસનં.

૨૪. તત્થપ્પમત્તો વિહરન્તો, નિસજ્જટ્ઠાનચઙ્કમે;

અભિઞ્ઞાપારમિં ગન્ત્વા, બ્રહ્મલોકમગઞ્છહં.

૨૫. નગરં રમ્મવતી નામ, સુનન્દો નામ ખત્તિયો;

સુજાતા નામ જનિકા, કોણ્ડઞ્ઞસ્સ મહેસિનો.

૨૬. દસવસ્સસહસ્સાનિ, અગારં અજ્ઝ સો વસિ [અગારમજ્ઝે ચ સો વસિ (સ્યા.)];

સુચિ સુરુચિ સુભો ચ, તયો પાસાદમુત્તમા.

૨૭. તીણિસતસહસ્સાનિ, નારિયો સમલઙ્કતા;

રુચિદેવી નામ નારી, વિજિતસેનો અત્રજો.

૨૮. નિમિત્તે ચતુરો દિસ્વા, રથયાનેન નિક્ખમિ;

અનૂનદસમાસાનિ, પધાનં પદહી જિનો.

૨૯. બ્રહ્મુના યાચિતો સન્તો, કોણ્ડઞ્ઞો દ્વિપદુત્તમો;

વત્તિ ચક્કં મહાવીરો, દેવાનં નગરુત્તમે.

૩૦. ભદ્દો ચેવ સુભદ્દો ચ, અહેસું અગ્ગસાવકા;

અનુરુદ્ધો નામુપટ્ઠાકો, કોણ્ડઞ્ઞસ્સ મહેસિનો.

૩૧. તિસ્સા ચ ઉપતિસ્સા ચ, અહેસું અગ્ગસાવિકા;

સાલકલ્યાણિકો બોધિ, કોણ્ડઞ્ઞસ્સ મહેસિનો.

૩૨. સોણો ચ ઉપસોણો ચ, અહેસું અગ્ગુપટ્ઠકા;

નન્દા ચેવ સિરીમા ચ, અહેસું અગ્ગુપટ્ઠિકા.

૩૩. સો અટ્ઠાસીતિ હત્થાનિ, અચ્ચુગ્ગતો મહામુનિ;

સોભતે ઉળુરાજાવ સૂરિયો મજ્ઝન્હિકે યથા.

૩૪. વસ્સસતસહસ્સાનિ, આયુ વિજ્જતિ તાવદે;

તાવતા તિટ્ઠમાનો સો, તારેસિ જનતં બહું.

૩૫. ખીણાસવેહિ વિમલેહિ, વિચિત્તા આસિ મેદની;

યથા ગગનમુળૂહિ, એવં સો ઉપસોભથ.

૩૬. તેપિ નાગા અપ્પમેય્યા, અસઙ્ખોભા દુરાસદા;

વિજ્જુપાતંવ દસ્સેત્વા, નિબ્બુતા તે મહાયસા.

૩૭. સા ચ અતુલિયા જિનસ્સ ઇદ્ધિ, ઞાણપરિભાવિતો ચ સમાધિ;

સબ્બં તમન્તરહિતં, નનુ રિત્તા સબ્બસઙ્ખારા.

૩૮. કોણ્ડઞ્ઞો પવરો બુદ્ધો, ચન્દારામમ્હિ નિબ્બુતો;

તત્થેવ ચેતિયો ચિત્તો, સત્ત યોજનમુસ્સિતોતિ.

કોણ્ડઞ્ઞસ્સ ભગવતો વંસો દુતિયો.