૩. દીપઙ્કરબુદ્ધવંસો

૧. તદા તે ભોજયિત્વાન, સસઙ્ઘં લોકનાયકં;

ઉપગચ્છું સરણં તસ્સ, દીપઙ્કરસ્સ સત્થુનો.

૨. સરણાગમને કઞ્ચિ, નિવેસેસિ તથાગતો;

કઞ્ચિ પઞ્ચસુ સીલેસુ, સીલે દસવિધે પરં.

૩. કસ્સચિ દેતિ સામઞ્ઞં, ચતુરો ફલમુત્તમે;

કસ્સચિ અસમે ધમ્મે, દેતિ સો પટિસમ્ભિદા.

૪. કસ્સચિ વરસમાપત્તિયો, અટ્ઠ દેતિ નરાસભો;

તિસ્સો કસ્સચિ વિજ્જાયો, છળભિઞ્ઞા પવેચ્છતિ.

૫. તેન યોગેન જનકાયં, ઓવદતિ મહામુનિ;

તેન વિત્થારિકં આસિ, લોકનાથસ્સ સાસનં.

૬. મહાહનુસભક્ખન્ધો, દીપઙ્કરસ્સ નામકો;

બહૂ જને તારયતિ, પરિમોચેતિ દુગ્ગતિં.

૭. બોધનેય્યં જનં દિસ્વા, સતસહસ્સેપિ યોજને;

ખણેન ઉપગન્ત્વાન, બોધેતિ તં મહામુનિ.

૮. પઠમાભિસમયે બુદ્ધો, કોટિસતમબોધયિ;

દુતિયાભિસમયે નાથો, નવુતિકોટિમબોધયિ.

૯. યદા ચ દેવભવનમ્હિ, બુદ્ધો ધમ્મમદેસયિ;

નવુતિકોટિસહસ્સાનં, તતિયાભિસમયો અહુ.

૧૦. સન્નિપાતા તયો આસું, દીપઙ્કરસ્સ સત્થુનો;

કોટિસતસહસ્સાનં, પઠમો આસિ સમાગમો.

૧૧. પુન નારદકૂટમ્હિ, પવિવેકગતે જિને;

ખીણાસવા વીતમલા, સમિંસુ સતકોટિયો.

૧૨. યમ્હિ કાલે મહાવીરો, સુદસ્સનસિલુચ્ચયે;

નવકોટિસહસ્સેહિ, પવારેસિ મહામુનિ.

૧૩. દસવીસસહસ્સાનં, ધમ્માભિસમયો અહુ;

એકદ્વિન્નં અભિસમયા, ગણનાતો અસઙ્ખિયા.

૧૪. વિત્થારિકં બાહુજઞ્ઞં, ઇદ્ધં ફીતં અહૂ તદા;

દીપઙ્કરસ્સ ભગવતો, સાસનં સુવિસોધિતં.

૧૫. ચત્તારિ સતસહસ્સાનિ, છળભિઞ્ઞા મહિદ્ધિકા;

દીપઙ્કરં લોકવિદું, પરિવારેન્તિ સબ્બદા.

૧૬. યે કેચિ તેન સમયેન, જહન્તિ માનુસં ભવં;

અપત્તમાનસા સેખા, ગરહિતા ભવન્તિ તે.

૧૭. સુપુપ્ફિતં પાવચનં, અરહન્તેહિ તાદિહિ;

ખીણાસવેહિ વિમલેહિ, ઉપસોભતિ સબ્બદા.

૧૮. નગરં રમ્મવતી નામ, સુદેવો નામ ખત્તિયો;

સુમેધા નામ જનિકા, દીપઙ્કરસ્સ સત્થુનો.

૧૯. દસવસ્સસહસ્સાનિ, અગારં અજ્ઝ સો વસિ [અજ્ઝાવસી જિનો (સ્યા. ક.)];

હંસા કોઞ્ચા મયૂરા ચ, તયો પાસાદમુત્તમા.

૨૦. તીણિસતસહસ્સાનિ, નારિયો સમલઙ્કતા;

પદુમા નામ સા નારી, ઉસભક્ખન્ધો અત્રજો.

૨૧. નિમિત્તે ચતુરો દિસ્વા, હત્થિયાનેન નિક્ખમિ;

અનૂનદસમાસાનિ, પધાને પદહી જિનો.

૨૨. પધાનચારં ચરિત્વાન, અબુજ્ઝિ માનસં મુનિ;

બ્રહ્મુના યાચિતો સન્તો, દીપઙ્કરો મહામુનિ.

૨૩. વત્તિ ચક્કં મહાવીરો, નન્દારામે સિરીઘરે [સિરીધરે (સી.)];

નિસિન્નો સિરીસમૂલમ્હિ, અકા તિત્થિયમદ્દનં.

૨૪. સુમઙ્ગલો ચ તિસ્સો ચ, અહેસું અગ્ગસાવકા;

સાગતો [સોભિતો (ક.)] નામુપટ્ઠાકો, દીપઙ્કરસ્સ સત્થુનો.

૨૫. નન્દા ચેવ સુનન્દા ચ, અહેસું અગ્ગસાવિકા;

બોધિ તસ્સ ભગવતો, પિપ્ફલીતિ પવુચ્ચતિ.

૨૬. તપુસ્સભલ્લિકા [તપસ્સુભલ્લિકા (સી.)] નામ, અહેસું અગ્ગુપટ્ઠકા;

સિરિમા કોણા ઉપટ્ઠિકા, દીપઙ્કરસ્સ સત્થુનો.

૨૭. અસીતિહત્થમુબ્બેધો, દીપઙ્કરો મહામુનિ;

સોભતિ દીપરુક્ખોવ, સાલરાજાવ ફુલ્લિતો.

૨૮. સતસહસ્સવસ્સાનિ, આયુ તસ્સ મહેસિનો;

તાવતા તિટ્ઠમાનો સો, તારેસિ જનતં બહું.

૨૯. જોતયિત્વાન સદ્ધમ્મં, સન્તારેત્વા મહાજનં;

જલિત્વા અગ્ગિક્ખન્ધોવ, નિબ્બુતો સો સસાવકો.

૩૦. સા ચ ઇદ્ધિ સો ચ યસો, તાનિ ચ પાદેસુ ચક્કરતનાનિ;

સબ્બં તમન્તરહિતં [સમન્તરહિતં (સી. સ્યા. ક.)], નનુ રિત્તા સબ્બસઙ્ખારા [સબ્બસઙ્ખારાતિ (સબ્બત્થ)].

૩૧. દીપઙ્કરો જિનો સત્થા, નન્દારામમ્હિ નિબ્બુતો;

તત્થેવસ્સ જિનથૂપો, છત્તિંસુબ્બેધયોજનોતિ.

દીપઙ્કરસ્સ ભગવતો વંસો પઠમો.