૨૯. ધાતુભાજનીયકથા

૧. મહાગોતમો જિનવરો, કુસિનારમ્હિ નિબ્બુતો;

ધાતુવિત્થારિકં આસિ, તેસુ તેસુ પદેસતો.

૨. એકો અજાતસત્તુસ્સ, એકો વેસાલિયા પુરે;

એકો કપિલવત્થુસ્મિં, એકો ચ અલ્લકપ્પકે.

૩. એકો ચ રામગામમ્હિ, એકો ચ વેઠદીપકે;

એકો પાવેય્યકે મલ્લે, એકો ચ કોસિનારકે.

૪. કુમ્ભસ્સ થૂપં કારેસિ, બ્રાહ્મણો દોણસવ્હયો;

અઙ્ગારથૂપં કારેસું, મોરિયા તુટ્ઠમાનસા.

૫. અટ્ઠ સારીરિકા થૂપા, નવમો કુમ્ભચેતિયો;

અઙ્ગારથૂપો દસમો, તદાયેવ પતિટ્ઠિતો.

૬. ઉણ્હીસં ચતસ્સો દાઠા, અક્ખકા દ્વે ચ ધાતુયો;

અસમ્ભિન્ના ઇમા સત્ત, સેસા ભિન્નાવ ધાતુયો.

૭. મહન્તા મુગ્ગમત્તા ચ [મુગ્ગમાસાવ (ક.)], મજ્ઝિમા ભિન્નતણ્ડુલા;

ખુદ્દકા સાસપમત્તા ચ, નાનાવણ્ણા ચ ધાતુયો.

૮. મહન્તા સુવણ્ણવણ્ણા ચ, મુત્તવણ્ણા ચ મજ્ઝિમા;

ખુદ્દકા મકુલવણ્ણા ચ, સોળસદોણમત્તિકા.

૯. મહન્તા પઞ્ચ નાળિયો, નાળિયો પઞ્ચ મજ્ઝિમા;

ખુદ્દકા છ નાળી ચેવ, એતા સબ્બાપિ ધાતુયો.

૧૦. ઉણ્હીસં સીહળે દીપે, બ્રહ્મલોકે ચ વામકં;

સીહળે દક્ખિણક્ખઞ્ચ, સબ્બાપેતા પતિટ્ઠિતા.

૧૧. એકા દાઠા તિદસપુરે, એકા નાગપુરે અહુ;

એકા ગન્ધારવિસયે, એકા કલિઙ્ગરાજિનો.

૧૨. ચત્તાલીસસમા દન્તા, કેસા લોમા ચ સબ્બસો;

દેવા હરિંસુ એકેકં, ચક્કવાળપરમ્પરા.

૧૩. વજિરાયં ભગવતો, પત્તો દણ્ડઞ્ચ ચીવરં;

નિવાસનં કુલઘરે, પચ્ચત્થરણં કપિલવ્હયે [સિલવ્હયે (સ્યા.)].

૧૪. પાટલિપુત્તપુરમ્હિ, કરણં કાયબન્ધનં;

ચમ્પાયુદકસાટિયં, ઉણ્ણલોમઞ્ચ કોસલે.

૧૫. કાસાવં બ્રહ્મલોકે ચ, વેઠનં તિદસે પુરે;

નિસીદનં અવન્તીસુ, રટ્ઠે [દેવરટ્ઠે (સ્યા.)] અત્થરણં તદા.

૧૬. અરણી ચ મિથિલાયં, વિદેહે પરિસાવનં;

વાસિ સૂચિઘરઞ્ચાપિ, ઇન્દપત્થપુરે તદા.

૧૭. પરિક્ખારા અવસેસા, જનપદે અપરન્તકે;

પરિભુત્તાનિ મુનિના, અકંસુ મનુજા તદા.

૧૮. ધાતુવિત્થારિકં આસિ, ગોતમસ્સ મહેસિનો;

પાણીનં અનુકમ્પાય, અહુ પોરાણિકં તદાતિ.

ધાતુભાજનીયકથા નિટ્ઠિતા.