૨૮. બુદ્ધપકિણ્ણકકણ્ડં

૧. અપરિમેય્યિતો કપ્પે, ચતુરો આસું વિનાયકા;

તણ્હઙ્કરો મેધઙ્કરો, અથોપિ સરણઙ્કરો;

દીપઙ્કરો ચ સમ્બુદ્ધો, એકકપ્પમ્હિ તે જિના.

૨. દીપઙ્કરસ્સ અપરેન, કોણ્ડઞ્ઞો નામ નાયકો;

એકોવ એકકપ્પમ્હિ, તારેસિ જનતં બહું.

૩. દીપઙ્કરસ્સ ભગવતો, કોણ્ડઞ્ઞસ્સ ચ સત્થુનો;

એતેસં અન્તરા કપ્પા, ગણનાતો અસઙ્ખિયા.

૪. કોણ્ડઞ્ઞસ્સ અપરેન, મઙ્ગલો નામ નાયકો;

તેસમ્પિ અન્તરા કપ્પા, ગણનાતો અસઙ્ખિયા.

૫. મઙ્ગલો ચ સુમનો ચ, રેવતો સોભિતો મુનિ;

તેપિ બુદ્ધા એકકપ્પે, ચક્ખુમન્તો પભઙ્કરા.

૬. સોભિતસ્સ અપરેન, અનોમદસ્સી મહાયસો;

તેસમ્પિ અન્તરા કપ્પા, ગણનાતો અસઙ્ખિયા.

૭. અનોમદસ્સી પદુમો, નારદો ચાપિ નાયકો;

તેપિ બુદ્ધા એકકપ્પે, તમન્તકારકા મુની.

૮. નારદસ્સ અપરેન, પદુમુત્તરો નામ નાયકો;

એકકપ્પમ્હિ ઉપ્પન્નો, તારેસિ જનતં બહું.

૯. નારદસ્સ ભગવતો, પદુમુત્તરસ્સ સત્થુનો;

તેસમ્પિ અન્તરા કપ્પા, ગણનાતો અસઙ્ખિયા.

૧૦. કપ્પસતસહસ્સમ્હિ, એકો આસિ મહામુનિ;

પદુમુત્તરો લોકવિદૂ, આહુતીનં પટિગ્ગહો.

૧૧. તિંસકપ્પસહસ્સમ્હિ, દુવે આસું વિનાયકા [આસિંસુ નાયકા (સ્યા. ક.)];

સુમેધો ચ સુજાતો ચ, ઓરતો પદુમુત્તરા.

૧૨. અટ્ઠારસે કપ્પસતે, તયો આસું વિનાયકા [આસિંસુ નાયકા (સ્યા. ક.)];

પિયદસ્સી અત્થદસ્સી, ધમ્મદસ્સી ચ નાયકા.

૧૩. ઓરતો ચ સુજાતસ્સ, સમ્બુદ્ધા દ્વિપદુત્તમા;

એકકપ્પમ્હિ તે બુદ્ધા, લોકે અપ્પટિપુગ્ગલા.

૧૪. ચતુન્નવુતિતો કપ્પે, એકો આસિ મહામુનિ;

સિદ્ધત્થો સો લોકવિદૂ, સલ્લકત્તો અનુત્તરો.

૧૫. દ્વેનવુતે ઇતો કપ્પે, દુવે આસું વિનાયકા;

તિસ્સો ફુસ્સો ચ સમ્બુદ્ધા, અસમા અપ્પટિપુગ્ગલા.

૧૬. એકનવુતિતો કપ્પે, વિપસ્સી નામ નાયકો;

સોપિ બુદ્ધો કારુણિકો, સત્તે મોચેસિ બન્ધના.

૧૭. એકતિંસે ઇતો કપ્પે, દુવે આસું વિનાયકા;

સિખી ચ વેસ્સભૂ ચેવ, અસમા અપ્પટિપુગ્ગલા.

૧૮. ઇમમ્હિ ભદ્દકે કપ્પે, તયો આસું વિનાયકા;

કકુસન્ધો કોણાગમનો, કસ્સપો ચાપિ નાયકો.

૧૯. અહમેતરહિ સમ્બુદ્ધો, મેત્તેય્યો ચાપિ હેસ્સતિ;

એતેપિમે પઞ્ચ બુદ્ધા, ધીરા લોકાનુકમ્પકા.

૨૦. એતેસં ધમ્મરાજૂનં, અઞ્ઞેસંનેકકોટિનં;

આચિક્ખિત્વાન તં મગ્ગં, નિબ્બુતા તે સસાવકાતિ.

બુદ્ધપકિણ્ણકકણ્ડં નિટ્ઠિતં.